ជំនាញ ៤យ៉ាង អ្នកត្រូវតែពង្រឹងជាប្រចាំ ដើម្បីក្លាយជាសហគ្រិនជោគជ័យមួយរូប!
សហគ្រិន គឺពិតជាត្រូវការចំណេះដឹង និងជំនាញច្រើនដើម្បីប្រាកដថា ដំណើរការអាជីវកម្មរបស់ពួកគេអាចទៅមុខយ៉ាងរលូន ហើយរីកចម្រើនយ៉ាងឆាប់រហ័ស។ ដូច្នេះហើយ សម្រាប់អ្នកដែលចង់ក្លាយជា សហគ្រិនឆ្នើមយ៉ាងហោចណាស់ ត្រូវតែពង្រឹងជំនាញសំខាន់ៗខាងក្រោមនេះ៖
១) ការសរសេរ៖ អ្នកមិនចាំបាច់ក្លាយជាមនុស្សដែលពូកែសរសេរល្អឥតខ្ចោះនោះឡើយ ប៉ុន្តែក្នុងនាមជាសហគ្រិនម្នាក់ គឺត្រូវតែព្យាយាមសរសេរអ្វីដែលខ្លី ច្បាស់ និង ងាយយល់។ ជាធម្មតាទេ សហគ្រិនម្នាក់ៗតែងតែមានការសរសេរ និង ផ្ញើរអ៊ីមែលទៅកាន់បុគ្គលិក និង ដទៃគូររកស៊ី ឬ អតិថិជនអំពីកិច្ចការផ្សេងៗ ដូច្នេះហើយត្រូវតែប្រាកដថា ការសរសេររបស់អ្នកផ្តល់គោលដៅច្បាស់លាស់ ចំពោះអ្នកអានដើម្បីជៀសវាងការភាន់ច្រឡំ ព្រោះវាជាជំនាញទំនាក់ទំនងដ៏សែនសំខាន់។
២) ការធ្វើបទបង្ហាញ៖ បើទោះបីជាអ្នកមានផែនការ ឬ គម្រោងល្អប៉ុណ្ណាក៏ដោយ ប៉ុន្តែបើការធ្វើបទបង្ហាញរបស់អ្នកទៅមុខទៅក្រោយមិនរួច គឺប្រាកដជាមិនអាចផ្សាយគំនិតនេះដល់ពួកគេនោះឡើយ។ ដូច្នេះហើយត្រូវប្រាកដថា ការធ្វើបទបង្ហាញរបស់អ្នកពិតជា អាចទាក់ទាញអ្នកដទៃឲ្យស្តាប់គម្រោងឬផែនការនោះរហូតចប់ ហើយយល់ច្បាស់អំពីអ្វីដែលអ្នកចង់ប្រាប់។ ដូច្នេះអ្នកត្រូវតែព្យាយាមធ្វើបទបង្ហាញ ឲ្យកាន់តែល្អប្រសើរពីមួយថ្ងៃទៅមួយថ្ងៃ។
៣) ការចរចា៖ ជាធម្មតាទេ ការរកស៊ីគឺតែងតែមានការពិភាក្សាគ្នា និង ចរាចរគ្នាលើចំណុចមួយចំនួនក្នុងគោលដៅដើម្បី ភាពប្រសើរឡើងទាំងអស់គ្នាក្នុងអាជីវកម្ម។ ជាមួយគ្នានោះ បើអ្នកគ្មានសិល្បៈក្នុងការចរចាទេនោះ វានឹងមានការលំបាកក្នុងការធ្វើឲ្យអាជីវកម្មរបស់អ្នកឲ្យទទួលបានចំណុចវិជ្ជមានខ្លាំងណាស់ ព្រោះតែមិនអាចបញ្ចុះបញ្ចូលឲ្យភាគីម្ខាងទៀតព្រមតាមការចង់បានរបស់អ្នក។ ដូច្នេះហើយអ្នកត្រូវតែព្យាយាមពង្រឹង ជំនាញចរចាដើម្បី ឲ្យគ្រប់ភាគីទាំងអស់ព្រមទទួល។
៤) ការស្តាប់៖ អ្នកខ្លះ ពូកែតែខាងនិយាយតែម្នាក់ឯង មិនព្រមស្តាប់គេនោះទេ។ បើកាលណាអ្នកមិនពូកែស្តាប់ មានន័យថា អ្នកមិនអាចយល់ច្បាស់អំពីបំណង ឬ អ្វីដែលភាគីម្ខាងទៀតនិយាយបានឡើយ ជាហេតុធ្វើឲ្យការពិភាក្សាពិបាកនឹងសម្រេចខ្លាំងណាស់។ ដូច្នេះ ត្រូវស្តាប់ឲ្យបានច្រើន ដោយព្យាយាមយល់ឲ្យច្បាស់ មុនពេលនិយាយឆ្លើយតបដើម្បីប្រាកដថា អ្វីដែលអ្នកនិយាយទៅនោះគឺមិនបង្កបញ្ហា ហើយផ្តល់ប្រយោជន៍ច្រើនទៀត៕
ដោយ៖ អ៊ុន ភក្តី ប្រភព៖ www.entrepreneur.com
