បើចង់ក្លាយជាអ្នកគ្រប់គ្រង ឬ អ្នកដឹកនាំដ៏អស្ចារ្យម្នាក់ ត្រូវជម្រុះចំណុចអាក្រក់ទាំង ៦នេះ សិន !
មនុស្សភាគច្រើនសុទ្ធតែ មិនចង់ធ្វើតាមបញ្ជាគេទេ ប៉ុន្តែចង់ក្លាយជាអ្នកដែលបញ្ជាអ្នកដទៃ មានន័យថា ចង់ក្លាយជាអ្នកគ្រប់គ្រង ឬ អ្នកដឹកនាំ។ ប៉ុន្តែក្លាយជាអ្នកដឹកនាំគេ មិនថានៅក្រុមហ៊ុន ឬ ទីណានោះទេ វាមិនមែនជារឿងងាយស្រួលឡើយ ព្រោះអ្នកដឹកនាំគឺទាមទារចំណុចលេចធ្លោច្រើនណាស់ ដើម្បីអាចកាន់ការងារ និង ដឹកនាំអ្នកដទៃឲ្យដើរលើផ្លូវវិជ្ជមានបាន។ ដូច្នេះហើយប្រសិនបើ ចង់ក្លាយជាអ្នកដឹកនាំគេ គឺអ្នកត្រូវតែលះបង់ ឬ លុបបំបាត់ចោលចំណុចអវិជ្ជមានទាំងនេះសិន៖
១) ភាពភ័យខ្លាច
អ្នកនឹងមិនអាចក្លាយជា មនុស្សដែលដឹកនាំអ្នកដទៃបានឡើយ ប្រសិនបើអ្នកតែងតែមានភាពភ័យខ្លាចក្នុងចិត្ត។ ភាពភ័យខ្លាចនេះ អាចបណ្តាលឲ្យពីមជ្ឈដ្ឋានខាងក្រៅ និង ខ្លួនអ្នកផ្ទាល់ប៉ុន្តែបញ្ហាធំដែលបង្កឲ្យអ្នកមានភាពភ័យខ្លាចខ្លាំងនោះ គឺដោយសារតែមិនទុកចិត្តលើសមត្ថភាពខ្លួនឯង។ដូច្នេះហើយអ្នកត្រូវជម្រុះភាពភ័យខ្លាចចេញ ប្រសិនបើចង់ក្លាយជាអ្នកឈរនៅជួរមុខគេក្នុងស្ថាប័នណាមួយ តាមរយៈព្យាយាមបង្កើនការជឿជាក់លើខ្លួនឯងជាប្រចាំ។
២) ការសម្រេចចិត្តមិនច្បាស់លាស់
បើចង់ក្លាយជាអ្នកគ្រប់គ្រង និង ជាអ្នកដឹកនាំគំរូនោះ អ្នកមិនអាចមានភាពស្ទាក់ស្ទើរក្នុងការសម្រេចចិត្តឡើយ ព្រោះវាអាចធ្វើឲ្យបុគ្គលិកក្រោមបង្គាប់ មិនគោរពអ្នក។ ដូច្នេះហើយ មុននឹងសម្រេចចិត្តត្រូវគិតឲ្យច្បាស់ ហើយបើសម្រេចចិត្តហើយ គឺត្រូវតែធ្វើដើម្បីបង្ហាញថា អ្នកមានភាពច្បាស់លាស់លើខ្លួនឯងកម្រិតណា។
៣) និយាយឥតប្រយោជន៍
ក្លាយទៅជាអ្នកគ្រប់គ្រង ឬ ដឹកនាំគេ មិនមែនមានន័យថា អ្នកត្រូវចេះនិយាយឲ្យច្រើននោះទេ ប៉ុន្តែអ្វីដែលសំខាន់នោះ គឺរាល់ពេលនិយាយត្រូវតែមានខ្លឹមសារ និង មានប្រយោជន៍សម្រាប់អ្នកស្តាប់ ជាពិសេសបុគ្គលិកក្រោមបង្គាប់។ ប្រសិនបើអ្នក ពូកែតែខាងនិយាយច្រើន តែអត់ប្រយោជន៍នោះ គឺគ្មាននរណាម្នាក់ចង់ស្តាប់នោះឡើយ។
៤) អួតអាង
បើកាន់ការងារខ្ពស់ គឺត្រូវដាក់ខ្លួនឲ្យកាន់តែទាប ព្រោះថាការអួតក្អេងក្អាងហួសពីសមត្ថភាពពិតរបស់ខ្លួន គឺមិនមែនជាអ្វីដែលមនុស្សទូទៅចូលចិត្តនោះឡើយ។ ដូច្នេះហើយ អ្នកមិនត្រូវអូតខ្លួនថា ជាមនុស្សអស្ចារ្យអ្វីនោះឡើយ ព្រោះសម្ដីអ្នកគ្មានន័យអ្វីទាំងអស់ បើសកម្មភាពរបស់អ្នកមិនអាចឆ្លុះបញ្ចាំងបាន។
៥) គ្មានទំនួលខុសត្រូវ
បើនិយាយអំពី លំដាប់នៃតំណែង ឬ តួនាទីវិញ បើកាន់តែខ្ពស់ គឺត្រូវមានទំនួលខុសត្រូវកាន់តែខ្ពស់ដែរ។ មានន័យថា បើចង់ក្លាយជាអ្នកគ្រប់គ្រង ឬ ដឹកនាំគឺត្រូវតែមានទំនួលខុសត្រូវខ្ពស់ជាដាច់ខាត ព្រោះបើអ្នកគ្មានទំនួលខុសត្រូវ ឬ អាចនិយាយបានថា ទទួលតែ«ត្រូវ» តែមិនទទួលខុសនោះ គឺនឹងធ្វើឲ្យស្ថាប័នទាំងមូលជួបបញ្ហាជាច្រើន ជាពិសេសបុគ្គលិកនៅក្រោមបង្គាប់តែម្តង។ ដូច្នេះហើយអ្នកត្រូវតែជម្រុះទម្លាប់មិនទទួលខុសត្រូវចេញឲ្យបានលឿនបំផុត។
៦) ភាពឆេវឆាវ
ការឆេវឆាវ គឺជាឧបសគ្គធំបំផុតសម្រាប់មនុស្សម្នាក់ៗ ក្នុងការធ្វើកិច្ចការផ្សេងៗ ដើម្បីសម្រេចគោលដៅដោយមានប្រសិទ្ធភាព។ សម្រាប់ថ្នាក់ដឹកនាំ ឬ គ្រប់គ្រង ដែលមានចារិតឆេវឆាវនោះ នឹងធ្វើឲ្យបុគ្គលិកក្រោមបង្គាប់ មានអារម្មណ៍ថាទទួលរងសម្ពាធខ្លាំងមែនទែន ហើយបុគ្គលិកទាំងនោះ នឹងសម្រេចចិត្តចាក់ចេញប្រសិនបើមានឱកាស ព្រោះមិនអាចរស់នៅក្នុងស្ថានភាពចាំមើលតែទឹកមុខគេបែបនេះឡើយ៕
ដោយ៖ រតនា វិចិត្រ
