ហេតុផល៦យ៉ាងបញ្ជាក់ថា អ្នកអាចនឹងត្រូវគេដេញចេញពីការងារ ឬ ធ្វើការមួយជីវិតក៏មិនរីកចម្រើនដែរ
បុគ្គលិកក្រុមហ៊ុននីមួយៗ គឺតែងតែមានការប្រកួតប្រជែងគ្នា ដើម្បីបញ្ចេញសមត្ថភាព និង ស្នាដៃឲ្យបានច្រើន ព្រោះថា ក្រុមហ៊ុនមិនត្រូវការបុគ្គលិកដែលខ្ជិលច្រអូស ឬ ធ្វើការខ្ជីខ្ជានោះទេ។ អ្វីដែលជាការកត់សម្គាល់នោះ ក្រុមហ៊ុនមិនខ្លាចការបណ្តេញបុគ្គលិកចេញនោះឡើយ ប្រសិនបើសង្កេតឃើញថា គ្មានផ្តល់ចំណេញអ្វីតទៅទៀត។
ដូច្នេះហើយ ប្រសិនបើអ្នកមានចំណុចអវិជ្ជមានច្រើននៅកន្លែងធ្វើការនោះ មានន័យថា មិនយូរមិនឆាប់ ក្រុមហ៊ុននឹងបញ្ឈប់អ្នកមិនខាន។ ខាងក្រោមនេះ គឺជាហេតុផលមួយចំនួនដែលបញ្ជាក់ថា អ្នកអាចនឹងត្រូវបណ្តេញចេញឆាប់ៗ ហើយបើទោះបីជា គេមិនដេញ ក៏គ្មានការរីកចម្រើនអ្វីដែរ ទាំងប្រាក់ខែ និង ឋានៈ៖
១) ធ្វើការឲ្យតែរួចពីដៃ៖ បើអ្នកជាបុគ្គលិកម្នាក់ដែល គ្មានការតាំងចិត្តធ្វើការ ហើយគ្រាន់តែធ្វើឲ្យរួចតែពីដៃនោះ លទ្ធផលការងារក៏មិនល្អដែរ។ ប្រសិនបើ ក្រុមហ៊ុនសង្កេតឃើញថា សមិទ្ធិផលការងាររបស់អ្នកគ្មានការអភិវឌ្ឍ ឬ គ្មានអ្វីល្អប្រសើរជាងមុនទេនោះ អ្នកនឹងក្លាយជាមុខសញ្ញាដែលត្រូវគេបណ្តេញចេញឆាប់ៗខាងមុខនេះ។ ដូច្នេះហើយ ត្រូវខិតខំធ្វើការឲ្យអស់ពីលទ្ធភាព ដើម្បីកុំឲ្យថ្ងៃអាក្រក់មកដល់ ព្រោះវាជារឿងអាម៉ាស់មួយ ប្រសិនបើអ្នកត្រូវបានគេបណ្តេញចេញមែន។
២) មិនគោរពពេលវេលា៖ ការធ្វើការនៅក្រុមហ៊ុន មិនមែនមានមនុស្សតែម្នាក់ឬ ពីរនាក់នោះទេ ដូច្នេះហើយប្រសិនបើអ្នកមានទំលាប់មិនគោរពពេលវេលាឲ្យច្បាស់លាស់ទេ នោះក្រុមហ៊ុននឹងពិចារណាលើអនាគតរបស់អ្នកមិនខាន ព្រោះមិនចង់ឲ្យមនុស្សម្នាក់ផ្តល់គំរូមិនល្អដល់បុគ្គលិកផ្សេងៗទៀត។ ដូច្នេះហើយ គួរបង្ហាញដល់ថ្នាក់លើ និង បុគ្គលិកដទៃទៀតថា អ្នកគឺជាមនុស្សម្នាក់ដែលឲ្យតម្លៃខ្ពស់លើពេលវេលា ព្រោះវាជាតម្លៃដែលមិនគួរមើលរំលង។
៣) និយាយកិច្ចការសំខាន់របស់ក្រុមហ៊ុនប្រាប់អ្នកដទៃ៖ ក្រុមហ៊ុននីមួយៗ គឺតែងតែមានកិច្ចការសម្ងាត់របស់ខ្លួន ដែលមានតែថ្នាក់លើ និង បុគ្គលិកសំខាន់ប៉ុណ្ណោះដែលអាចដឹង។ ដូច្នេះហើយ ប្រសិនបើអ្នកជាមនុស្សម្នាក់ដែលក្រុមហ៊ុនទម្លាយឲ្យដឹងនូវកិច្ចការសំខាន់មួយចំនួន ហើយបែរជានិយាយរឿងទាំងនេះប្រាប់ដល់អ្នកដទៃ ឬ ក្រុមហ៊ុនផ្សេងនោះ វាអាចនឹងបង្កហានិភ័យដល់ក្រុមហ៊ុនមិនខាន។ ក្នុងស្ថានភាពនេះ អ្នកនឹងប្រឈមមុខនឹងបញ្ហាផងដែរ។
៤) និយាយអាក្រក់ពីថ្នាក់លើ៖ ប្រសិនបើ ពិតជាមិនពេញចិត្តថ្នាក់លើរបស់អ្នកមែន គឺ គួរតែសុំជួបនិយាយគ្នាដោយត្រង់ៗ និង បញ្ជាក់អំពីមូលហេតុច្បាស់លាស់ដល់ថ្នាក់លើ តែអ្វីដែលគួរជៀសវាងនោះ គឺមិនត្រូវនិយាយអាក្រក់ពីក្រោយខ្នងនោះឡើយ។ ប្រសិនបើអ្នកនិយាយមិនល្អពីក្រោយខ្នង នោះអ្នកនឹងប្រឈមមុខនឹងការបណ្តេញចេញមិនខាន ព្រោះក្រុមហ៊ុនក៏មិនត្រូវការបុគ្គលិកប្រភេទនេះដែរ។
៥) ចូលចិត្តនិយាយកុហក៖ ភាពស្មោះត្រង់ គឺ ពិតជាសំខាន់ខ្លាំងណាស់ ក្នុងការធ្វើការជាក្រុម។ តែប្រសិនបើអ្នកជាមនុស្សដែល ចូលចិត្តតែនិយាយកុហកដើម្បីចំណេញសម្រាប់ប្រយោជន៍ផ្ទាល់ខ្លួននោះ ក៏គ្មាននរណាម្នាក់ពេញចិត្តនោះដែរ ហើយបើនិយាយអំពីក្រុមហ៊ុនវិញ គឺរឹតតែមិនត្រូវការមនុស្សប្រភេទនេះទៅទៀត។ ដូច្នេះហើយ គួររក្សាភាពស្មោះត្រង់ឲ្យបាន ព្រោះវាជាតម្លៃមួយដែលមនុស្សគ្រប់គ្នាត្រូវការបំផុត។
៦) អួត៖ ទោះបីជាអ្នកពូកែនិយាយថាខ្លួនអាចធ្វើបាន ឬ អស្ចារ្យប៉ុណ្ណាក៏ដោយ ប៉ុន្តែបើលទ្ធផលមិនល្អទេ នោះ មានន័យថា អ្នកជាមនុស្សពូកែតែខាងអួត តែគ្មានយកជាសាច់ការអ្វីបាននោះទេ។ មនុស្សប្រភេទនេះ គឺទុកក៏មិនចំណេញ ដកចេញក៏មិនខាតដែរ៕
ដោយ៖ រតនា វិចិត្រ
