ជំនាញ៥យ៉ាងដែលពិបាករៀនបំផុត ប៉ុន្តែក៏មានប្រយោជន៍បំផុតដែរសម្រាប់ជីវិតនៅពេលរៀនចេះ
ដើម្បីក្លាយជាមនុស្សម្នាក់ជោគជ័យក្នុងជីវិត គឺពិតជាទាមទារជំនាញសំខាន់ៗជាច្រើន ដើម្បីដោះស្រាយបញ្ហា និង ដើរទៅកាន់គោលដៅឲ្យបានឆាប់បំផុត។ ជំនាញដែលសំខាន់ៗទាំងនោះ ពិតជាមានការលំបាកក្នុងការរៀនសូត្រខ្លាំងណាស់ ប៉ុន្តែបើចេះស្ទាត់ហើយនោះ វានឹងផ្តល់ផលធំធេងនៅថ្ងៃអនាគត។
១) ការគ្រប់គ្រងពេលវេលា៖ ការរៀនគ្រប់គ្រងពេលវេលាឲ្យមានប្រសិទ្ធភាពនោះ វាអាចនឹងងាយស្រួលក្នុងការនិយាយ ប៉ុន្តែនៅពេលអនុវត្តវិញពិតជាមិនងាយនោះឡើយ។ ជំនាញគ្រប់គ្រងពេលវេលាឲ្យបានល្អនេះ មានមនុស្សមិនច្រើននោះទេដែលមាន ដូច្នេះបានជាភាគតិចប៉ុណ្ណោះដែលជោគជ័យក្នុងជីវិត។ បើគ្រប់គ្រង និង ប្រើប្រាស់ពេលវេលាដោយគ្មានប្រសិទ្ធភាពនោះ វានឹងនាំឲ្យភាគរយនៃការសម្រេចការងារទទួលបានតិចតួចដែរ។ ដូច្នេះហើយ អ្នកត្រូវយកចិត្តទុកដាក់លើជំនាញនេះឲ្យបានល្អបំផុត។
២) ការយល់ចិត្តអ្នកដទៃ៖ មនុស្សភាគច្រើន ព្យាយាមយល់ និង ធ្វើតាមតែចិត្តខ្លួនឯង ដោយមិនងាយនឹងព្យាយាមយល់ចិត្តរបស់អ្នកដទៃនោះទេ។ ការយល់ពីចិត្តអ្នកដទៃគឺជារឿងសំខាន់ ព្រោះការទំនាក់ទំនងក្នុងសង្គម គឺជារឿងជៀសមិនផុតឡើយ ហើយបើអ្នកមិនចេះយល់ពីចិត្តរបស់អ្នកដទៃទេ នោះទំនាក់ទំនងក៏មិនអាចដំណើរការទៅល្អដែរ។
៣) ការគេងគ្រប់គ្រាន់៖ មនុស្សភាគច្រើនមានបញ្ហាដំណេក ដែលនាំឲ្យប៉ះពាល់ដល់សុខភាព ការងារ និង ការសិក្សាផងដែរ។ បញ្ហាដំណេកនេះ ភាគច្រើនបណ្តាលមកពីមិនសូវចេះពីរបៀបគ្រប់គ្រងដំណេកឲ្យបានល្អប្រសើរ ដូចជា ការមិនកំណត់ពេលវេលាចូលគេងឲ្យបានទៀងទាត់ និង បរិភោគភេសជ្ជៈ និង អាហារដែលមិនអំណោយផលល្អដល់ការគេងជាដើម។ ដូច្នេះហើយ សូមកុំមើលរំលងការគេងឲ្យសោះ។
៤) ការលើកទឹកចិត្តខ្លួនឯង៖ មនុស្សភាគច្រើនតែងតែជួបបញ្ហាច្រើនយ៉ាងក្នុងជីវិតប្រចាំថ្ងៃ ហើយពួកគេតែងត្រូវការពាក្យលើកទឹកចិត្តពីមនុស្សជុំវិញខ្លួន។ ប៉ុន្តែត្រូវចាំថា ការលើកទឹកចិត្តពីមនុស្សជុំវិញខ្លួន គឺជាផ្នែកមួយប៉ុណ្ណោះហើយក៏មិនអាចយូរអង្វែងបានដែរ ពោលគឺមានតែការចេះលើកទឹកចិត្តខ្លួនឯងប៉ុណ្ណោះដែលពិតជា មិនអាចខ្វះបានក្នុងជីវិតជាក់ស្តែង។ ដូច្នេះហើយ ការលើកទឹកចិត្តខ្លួនឯងនៅពេលមានបញ្ហា គឺជាជំនាញមួយដែលអ្នកត្រូវរៀនសូត្រ និង ពង្រឹងឲ្យស្ទាត់ជំនាញ។
៥) ការបែងចែកអ្វីសំខាន់ និង មិនសូវសំខាន់៖ ជាការពិតណាស់ មនុស្សម្នាក់ៗមានកិច្ចការច្រើនយ៉ាងដែលត្រូវធ្វើ ហើយពេលខ្លះមិនដឹងថា គួរធ្វើមួយណានោះទេ ព្រោះសុទ្ធតែឃើញថា មួយណាក៏សំខាន់។ បញ្ហានេះគឺដោយសារតែ មិនទាន់ចេះបែងចែកថា មួយណាសំខាន់ខ្លាំងជាងមួយណា។ ដូច្នេះហើយ អ្នកត្រូវតែព្យាយាមស្វែងយល់ឲ្យច្បាស់ ដើម្បីបែងចែកប្រភេទការងារ ព្រោះវាងាយស្រួលក្នុងការធ្វើទៅតាមដំណាក់កាល និង ពេលវេលា៕
ដោយ៖ អ៊ុន ភក្តី ប្រភព៖ www.businessinsider.com
