រឿងពិត ៥យ៉ាងរបស់មហាសេដ្ឋីនីមានប្រាក់រាប់ពាន់លានដំបូងរបស់ប្រទេសជប៉ុន លោកស្រី Yoshika Shinohara
ស្ត្រីជនជាតិជប៉ុនមួយរូបគឺ លោកស្រី Yoshika Shinoharaបានក្លាយជាមហាសេដ្ឋីស្ត្រីប្រាក់រាប់ពាន់ដំបូងរបស់ប្រទេសជប៉ុន និងជាមហាសេដ្ឋីស្ត្រីមួយរូបក្នុងចំណោមមហាសេដ្ឋីស្ត្រីប្រាក់រាប់ពាន់តែ២៦រូបរបស់អាសីុ។ លោកស្រីគឺជាអ្នកផ្ដួចផ្ដើមភ្នាក់ងារបុគ្គលិកបណ្ដោះអាសន្នមួយឈ្មោះ Temp Holdingsក្នុងឆ្នាំ១៩៧៣ក្នុងទីក្រុងនៃតូក្យូ ប្រទេសជប៉ុន ហើយជំនួញដែលមានអាយុកាល៤ទសវត្សមកហើយនេះទៀតសោត បាននាំភាពជោគជ័យដ៏លេចធ្លោសម្រាប់ស្ត្រីជប៉ុនវ័យ៨២ឆ្នាំរូបនេះ ដោយបានចាប់ផ្ដើមចេញពីទីស្នាក់ការដែលគ្រាន់តែជាអាគារមានបន្ទប់គេង១តែប៉ុណ្ណោះ។
នៅពីក្រោយភាពជោគជ័យរបស់លោកស្រី តើភាពប្រថុយប្រថាននឹងគ្រោះថ្នាក់ ព្រមជាមួយនឹងការលះបង់អ្វីខ្លះរបស់ស្ត្រីដ៏មានឥទ្ធិពលមួយរូបក្នុងចំណោមស្ត្រីដ៏មានឥទ្ធិពលដទៃទៀតទាំង៥០រូបក្នុងពិភពជំនួញទាំងសកលលោកនេះ?
១) លោកស្រីសុខចិត្តលះបង់អ្វីៗចោលទាំងអស់
ដោយសារមហាសេដ្ឋីស្ត្រីរូបនេះ មិនមានសេចក្ដីត្រេកត្រអាលនឹងការងារក្នុងប្រទេសជាដើមកំណើតរបស់ខ្លួន លោកស្រីក៏បានប្ដូរទីលំនៅទៅឯអឺរ៉ុបវិញ ហើយក៏ជាទីកន្លែងនោះដែរដែលនាំមកឲ្យលោកស្រីនូវគំនិតជំនួញសម្រាប់ការងារបណ្ដោះអាសន្ននាពេលក្រោយមកទៀតនោះ។ នៅពេលការត្រឡប់មកវិញរបស់លោកស្រី Shinoharaនៅក្នុងកំឡុងឆ្នាំ១៩៧០ គឺជាកំឡុងពេលនៃការចាប់កំណើតឡើងនៃភ្នាក់ងារបុគ្គលិកបណ្ដោះអាសន្នរបស់លោកស្រី និងកាន់តែជាការសម្រេចចិត្តប្រកបដោយភាពប្រថុយប្រថានដ៏គ្រោះថ្នាក់មួយផងដែរ ព្រោះថាការងារបណ្ដោះអាសន្នក្នុងកំឡុងពេលនោះ មិនត្រូវបានគេទទួលស្គាល់ស្របច្បាប់ក្នុងតំបន់អាសីុឡើយ។ តែទោះជាយ៉ាងណា លោកស្រីមហាសេដ្ឋីក៏នៅតែដើរតាមបេះដូងខ្លួនឯង និងប្រឈមនឹងភាពគ្រោះថ្នាក់ទាំងនោះជាដដែល។
២) លោកស្រីមិនដែលមានគោលបំណងនឹងក្លាយជាមហាសេដ្ឋីនោះឡើយ
អ្វីដែលគាត់ធ្វើ គឺមិនមែនតម្រង់ទៅរកគោលដៅក្លាយជាមហាសេដ្ឋីដូចអ្វីដែលមនុស្សជាច្រើនប៉ងប្រាថ្នានោះឡើយ។ អ្វីដែលលោកស្រីធ្វើ គឺផ្ទុយទៅវិញ គឺជាទឹកចិត្តនៃការចង់ចូលរួមចំណែកជួយដល់សង្គមតាមរយៈជំនួញរបស់គាត់នោះទេ។
៣) លោកស្រីបានដាក់សេចក្ដីសុខរបស់ខ្លួនមុនការរៀបការ
ក្រោយពេលលោកស្រីបានកត់សម្គាល់ដឹងថា អ្នកដែលលោកស្រីរៀបការជាមួយមិនមែនជាមនុស្សត្រឹមត្រូវម្នាក់សម្រាប់គាត់ ដូច្នេះការសម្រេចចិត្តចុងក្រោយរបស់គាត់គឺជាការលែងលះ និងជាលទ្ធផលនៃការខឹងសម្បាពីម្ដាយ និងបងប្រុសរបស់លោកស្រី។ លើសពីនេះទៅទៀត អ្នកផ្ដួចផ្ដើមការងារបណ្ដោះអាសន្នរូបនេះ ក៏បានធ្វើការសម្រេចចិត្តចំពោះផ្លូវដើរបន្តរបស់ខ្លួនក្រោយពីការលែងលះ ដែលមិនមែនជាអ្វីដែលស្ត្រីភាគច្រើនរបស់ជប៉ុនធ្វើនោះឡើយ ដែលជាស្ត្រីមេផ្ទះមួយរូប។
៤) លោកស្រីបានផ្ដល់ឱកាសដល់ស្ត្រីជប៉ុនដទៃទៀតជាច្រើនរូប
ទំនៀមទម្លាប់នៃការធ្វើការបណ្ដើរមើលថែទាំកូនបណ្ដើរបានចាក់ដោតឫសគល់យ៉ាងជ្រៅនៅក្នុងផ្នត់គំនិតនៃវប្បធម៌របស់ជនជាតិជប៉ុន។ ក្រោយពេលការរៀបការ ស្ត្រីជាទូទៅ មិនត្រូវបានគាំទ្រឲ្យត្រឡប់ទៅបំពេញកិច្ចការរបស់ខ្លួនវិញឡើយ និងបើមានក៏ជាឱកាសតិចតួចដ៏កម្រនោះដែរ។ មើលឃើញពីទុក្ខលំបាករបស់ស្ត្រីគ្រប់រូបដូច្នេះហើយ ទើបក្រុមហ៊ុនរបស់លោកស្រីបង្កើតឡើងក្នុងគោលបំណងបើកឱកាសយ៉ាងទូលំទូលាយទទួលយកស្ត្រីរៀបការរួចចូលមកបំពេញការងារវិញ។
៥) តែការជួលបុគ្គលិកជាបុរសបានជួយដល់ក្រុមហ៊ុនរបស់លោកស្រី
ក្នុងដំណាក់កាលដំបូងនៃការជួលបុគ្គលិក ការលើកទឹកចិត្តផ្ដល់ឱកាសការងារដល់ស្ត្រី ស្ទើរតែបានក្លាយជាតម្លៃនិយមរបស់ក្រុមហ៊ុនលោកស្រីទៅហើយ។ យ៉ាងណាមិញ ក្រោយពីទទួលនូវបទពិសោធន៍នៃការលក់ធ្លាក់ចុះ លោកស្រីក៏ចាប់ផ្ដើមមានគំនិតទទួលយកបុគ្គលិកបុរសមកបញ្ចូលជាមួយគ្នាវិញ ទើបពេលនោះក្រុមហ៊ុន Temp Holdings អាចឈរទប់លំនឹងរបស់ខ្លួនបានជាប់ដូចដើមវិញបាន៕
ប្រែសម្រួល៖ ស្រីពៅ ប្រភព៖ entrepreneur
