មេរៀន​​ដ៏មានតម្លៃ៣យ៉ាង​ពី​ស្ថាបនិក​ក្រុមហ៊ុន​Amazon លោក Jeff Bezos ​​​ដែល​អ្នក​គួរ​រៀន​សូត្រ​



មនុស្ស​ជា​ច្រើន​លាន​នាក់​នៅ​ជុំវិញ​ពិភពលោក​កំពុង​តែ​ទទួល​បាន​ប្រយោជន៍​សម្រួល​ដល់​ការ​ទិញ​ទំនិញ​របស់​ពួកគេ តាមរយៈ​ការ​ទិញ​ទំនិញ​តាម​អនឡាញ​របស់​ក្រុមហ៊ុន​លក់រាយ​តាម​អនឡាញ​ដ៏​ធំ​បំផុត​របស់​អាមេរិក ដែល​គ្រប់​គ្នា​ស្គាល់​ថា Amazon។ តើ​ក្រុមហ៊ុន​ដែល​បាន​ចាប់កំណើត​ឡើង​ក្នុង​ឆ្នាំ​១៩៩៤​ មួយ​នេះ អាច​ឈរ​ជើង​បាន​យ៉ាង​រឹងមាំ​ក្នុង​ពិភព​ប្រកួតប្រជែង​នៃ​ការ​ធ្វើ​ជំនួញ​បាន​ដោយ​មាន​នរណា​នៅ​ពី​ក្រោយ ?

តើ​ស្ថាបនិក​របស់​ក្រុមហ៊ុន​ដ៏​ជោគជ័យ​របស់​អាមេរិក​មួយ​នេះ មាន​កេរ្តិ៍មរតក​មេរៀន​ជំនួញ​អ្វី​ខ្លះ​ដែល​អាច​ឲ្យ​យើង​រៀន​ពី​គាត់​បាន ?

១) មាន​ភាព​ចចេស​រឹងរូស និង​ភាព​បត់បែន៖ ដើម្បី​ឲ្យ​ជំនួញ​មួយ​អាច​ឈាន​ដល់​ចំណុច​កំពូល​បាន អ្នក​ដឹកនាំ​ដ៏​ឈ្លាសវៃ​ត្រូវ​បណ្ដុះ​នូវ​អត្តចរិត​ទាំង​២​នេះ​ក្នុង​ខ្លួន​ឲ្យ​បាន គឺ​ជា​ភាព​ចចេស​រឹងរូស និង​ភាព​បត់បែន។ បញ្ហា​ឋិត​នៅ​ត្រង់​ថា ពេល​ខ្លះ​អ្នក​មិន​អាច​បែងចែក​ដាច់​បាន​ទេ​ថា​តើ​ពេល​ណា​គួរ​មាន​ភាព​រឹងរូស ហើយ​ពេល​ណា​គួរ​មាន​ភាព​បត់បែន។ ស្ថាបនិក​និង​នាយក​ប្រតិបត្តិ​ក្រុមហ៊ុន​Amazon លោក Jeff Bezos បាន​ណែនាំ​ថា អ្នក​ដឹកនាំ​ល្អ​ត្រូវ​ប្រកាន់​យក​ភាព​ចចេស​រឹងរូស​ទៅលើ​ចក្ខុវិស័យ​របស់​ខ្លួន ហើយ​ត្រូវ​មាន​ភាព​បត់បែន​ទៅលើ​វិធី​ដោះស្រាយ​បញ្ហា ត្រូវ​មាន​ភាព​រហ័សរហួន និង​ឈ្លាសវៃ​ក្នុង​ការ​មើល​ឃើញ​នូវ​ដំណោះស្រាយ​ច្រើន​ចំពោះ​បញ្ហា​មួយ​នៅ​ពេល​វិធី​ដោះស្រាយ​បញ្ហា​ណាមួយ​មិន​ដំណើរការណ៍។

២) ការ​ដក​ពិសោធន៍៖ ស្ថាបនិក​ក្រុមហ៊ុន​Amazon​វ័យ​៥១​ឆ្នាំ​រូប​នេះ តែង​ឲ្យ​តម្លៃ​ជា​ខ្លាំង​ចំពោះ​ការ​ដក​ពិសោធន៍​គឺ​ជា​វប្បធម៌​នៃ​ក្រុមហ៊ុន​របស់​លោក។ ការ​ដក​ពិសោធន៍​គឺ​ជា​ចំណុច​ចាប់ផ្ដើម​ឆ្ពោះ​ទៅ​រក​ការ​លេច​ឡើង​នូវ​ការ​ច្នៃប្រឌិត​ទាំងឡាយ និង​ជា​មូលហេតុ​ដែល​ជំរុញ​ឲ្យ​អាជីវកម្ម​មួយ​អាច​ឈរ​ជើង​ប្រកួតប្រជែង​បាន​រឹងមាំ។ ការ​ដក​ពិសោធន៍​ទៀត​សោត ត្រូវ​មាន​ដំណើរការណ៍​ទៅ​ជា​និរន្ត។ នៅ​ពេល​សមាជិក​ក្រុម​ការងារ​ណា​ម្នាក់​លើកឡើង​ពី​គំនិត​ច្នៃប្រឌិត​អ្វី​មួយ​ដែល​ទាមទារ​ការ​ដក​ពិសោធន៍ នោះ​អ្នក​មិន​ត្រូវ​រួញរា​ចំពោះ​ការ​សម្រេច​ចិត្ត​ទៅលើ​ដំណើរការណ៍​នេះ​ឡើយ បើ​ទោះ​ជា​អ្នក​មិន​ទទួល​បាន​ប្រយោជន៍​អ្វី​វិញ​ក្នុង​រយៈពេល​ខ្លី​ក៏​ដោយ ដរាប​ណា​វា​តែងតែ​ល្អ​សម្រាប់​អតិថិជន នោះ​ក្នុង​រយៈពេល​វែង វា​នឹង​ល្អ​សម្រាប់​ក្រុមហ៊ុន​អ្នក​ដូច​គ្នា។ ម្យ៉ាងទៀត ត្រឹមតែ​ការ​ដក​ពិសោធន៍​តែ​មួយ​មុខ មិន​អាច​គ្រប់គ្រាន់​សម្រាប់​ការ​ច្នៃប្រឌិត​ដ៏​លេចធ្លោ​មួយ​បាន​ឡើយ អ្វី​ដែល​សំខាន់​ជាង​នេះ​ទៅ​ទៀត គឺ​ជា​ឆន្ទៈ​ក្នុង​ការ​ដំណើរការណ៍​គំនិត​ច្នៃប្រឌិត​នោះ​ឲ្យ​ចេញ​ជា​រូបរាង​ឡើង ទើប​អាច​ធានា​នូវ​សមិទ្ធផល​ដ៏​ល្អ​ឯក​សម្រាប់​ក្រុមហ៊ុន​អ្នក​បាន។

៣) ក្រុមការងារ​រួម​ទស្សនវិស័យ​តែ​មួយ៖ សហគ្រិន​ក្រុមហ៊ុន​លក់រាយ​ដ៏​ធំ​របស់​អាមេរិក​មួយ​នេះ មាន​គោលការណ៍​សម្រាប់​ក្រុម​ការងារ​របស់​ខ្លួន​ប្រកប​ដោយ​ភាព​វាងវៃ​បំផុត។ លោក​យល់​ឃើញ​ថា កាលណា​ចំនួន​សមាជិក​ក្រុម​ការងារ​កើន​ឡើង​កាន់​តែ​ច្រើន នោះ​ប្រសិទ្ធភាព​នៃ​ការងារ​ដែល​អាច​ផលិត​បាន​នឹង​មាន​ការ​ថយ​ចុះ​កាន់​តែ​ច្រើន​ដូច​គ្នា​ដែរ។ កាន់តែ​គួរ​ឲ្យ​ចាប់​អារម្មណ៍​ចំពោះ​វិធី​នៃ​ការ​រៀបចំ​ក្រុមការងារ​របស់​លោក​ទៅ​ទៀត​នោះ លោក Jeff Bezos ស្វែងរក​តែ​បុគ្គល​ណា​ដែល​មាន​DNA​ជា​អ្នក​ដែល​មាន​ចិត្ត​ពុះពោរ​ក្នុង​ការ​ខិតខំ​រិះរក​គ្រប់​មធ្យោបាយ​ដើម្បី​ច្នៃប្រឌិត​អភិវឌ្ឍ​ផលិតផល​ឲ្យ​មាន​ភាព​ប្រសើរ​ជាង​មុន​ជានិច្ច ជា​បុគ្គល​ដែល​មាន​ភាព​នាំ​មុខ​និង​ជា​អ្នក​រុករក​ការ​ច្នៃប្រឌិត​ថ្មី នោះ​ការ​ធ្វើការ​ជាមួយ​ក្រុម​ការងារ​ដែល​មាន​គំនិត​ដូច​គ្នា​តែ​មួយ​ចំពោះ​ការ​ច្នៃប្រឌិត នឹង​បំផុស​សក្ដានុពល​ក្រុមហ៊ុន​ឲ្យ​ឈាន​មុខ​គេ​ជាក់​ជា​មិនខាន៕

ប្រែសម្រួល៖ ស្រីពៅ ប្រភព៖ blog.kissmetrics  

X
5s