៣យ៉ាងអំពីភាពជាអ្នកដឹកនាំរបស់អ្នកនិពន្ធដ៏ល្បី លោក Simon Sinek
នៅលើពិភពលោកយើងនេះ មានអង្គភាពក្រុមហ៊ុនជាច្រើនដឹងពី "អ្វី" ដែលខ្លួនកំពុងធ្វើ និង "ដំណើរការណ៍" បែបណាដែលត្រូវប្រតិបត្តិដើម្បីសម្រេចបាននូវអ្វីដែលពួកគេកំពុងធ្វើ។ ប៉ុន្តែតើមានក្រុមហ៊ុនប៉ុន្មានដែលដឹងថា "ហេតុអ្វី" ទើបអង្គភាពពួកគេមានមុខនៅលើសកលលោកនេះមក ? តើអ្វីជាកម្លាំងជំរុញចិត្តពួកគេឲ្យធ្វើបែបនេះ ? ប្រហែលមានក្រុមហ៊ុនមិនតិចនោះទេ ដែលមិនដែលចាប់អារម្មណ៍ពីស្នូលដ៏សំខាន់នៃដំណើរឆ្ពោះទៅរកភាពជោគជ័យក្នុងការធ្វើជំនួញនេះ។ លោក Simon Sinek មានដើមកំណើតសញ្ជាតិអង់គ្លេស គឺជាអ្នកនិពន្ធដ៏ល្បីល្បាញមួយរូបរបស់សៀវភៅ Start With Why: How Great Leaders Inspire Everyone to Take Action ក៏ជាអ្នកថ្លែងសន្ទរកថាប្រកបដោយការបំផុសកម្លាំងចិត្តមួយរូប ដែលការថ្លែងសន្ទរកថារបស់គាត់ក្នុងTED Talk មានចំណងជើងថា How Great Leaders Inspire Actionជាប់ជាការថ្លែងសន្ទរកថាដ៏ល្បីល្បាញបំផុតមួយក្នុងលំដាប់ទី៣រហូតមក ព្រមទាំងជាអ្នកប្រឹក្សាផ្នែកទីផ្សារឲ្យក្រុមហ៊ុនធំៗដទៃជាច្រើនទៀតរួមទាំងក្រុមហ៊ុន Apple របស់ Steve Jobsផងដែរ។
ជាគ្រូបង្រៀនថ្នាក់បញ្ចប់ការសិក្សាផ្នែកប្រាស្រ័យទាក់ទងបែបយុទ្ធសាស្ត្រក្នុងសាកលវិទ្យាល័យកូឡុំប៊ីក្នុងសហរដ្ឋអាមេរិក ថាតើភាពជាអ្នកដឹកនាំដូចម្ដេចខ្លះដែលអ្នកអាចរៀនសូត្រយកជាគំរូបានពីលោក ដែលមានលក្ខណៈពិសេសខុសប្លែកពីភាពជាអ្នកដឹកនាំរបស់បុគ្គលដទៃទៀត ?
១) ចាប់ផ្ដើមជាមួយនឹង "ហេតុអ្វី" ៖
ដូចដែលបានរៀបរាប់ត្រួសៗពីខាងលើរួចមក ថាមានអង្គភាពជាច្រើនជាប់ខ្លួនទៅក្នុងអន្លង់ដ៏ជ្រៅលង់លក់ជាមួយនឹង "អ្វី" ដែលខ្លួនកំពុងធ្វើ និង "ដំណើរការណ៍" ដែលពួកគេប្រើប្រាស់ដើម្បីសម្រេចបាននូវអ្វីដែលពួកគេកំពុងធ្វើនោះ។ យ៉ាងណាមិញ តាំងពីដំបូងមកពួកគេមិនដែលចាប់អារម្មណ៍ឆ្លើយនឹងសំណួរ "ហេតុអ្វី" ទើបពួកគេធ្វើវានោះទេ។ ហេតុអ្វីទើបក្រុមហ៊ុនពួកគេត្រូវបានបង្កើតឡើងមក ? តើអ្វីជាកម្លាំងជំរុញចិត្តពួកគេ ? ហើយវាត្រូវតែមិនមែនជាកម្លាំងជំរុញដែលជាប់ពាក់ព័ន្ធនឹងលុយជាធំនោះទេ។ អ្នកត្រូវតែមានអ្វីដែលអ្នកជឿជាក់ ជាកម្លាំងជំរុញដែលប្ដេជ្ញាឲ្យអ្នកពេញចិត្តនឹងបំពេញប្រយោជន៍សម្រាប់មនុស្សក្នុងសង្គម វាត្រូវតែជាអ្វីដែលធំជាងខ្លួនអ្នក។
២) មានសេចក្ដីបញ្ជាក់ ភាពមានវិន័យ និងភាពស្ថិតស្ថេរ៖
សេចក្ដីបញ្ជាក់យ៉ាងដូចម្ដេច ? សេចក្ដីបញ្ជាក់ថា ហេតុអ្វីបានជាអ្នកធ្វើវា ? បើសូម្បីតែខ្លួនអ្នកជាអ្នកនាំមុខធ្វើវាឡើងមិនទាំងដឹងពីមូលហេតុដែលខ្លួនឯងធ្វើវាផង តើនឹងមានបុគ្គលិកឯណា អតិថិជនឯណានឹងយល់ពីវា ហើយស្ម័គ្រចិត្តដើរតាមអ្នក ប្រើប្រាស់របស់អ្នកនោះ ? ចុះត្រូវមានវិន័យយ៉ាងដូចម្ដេច ? ដំណើរការណ៍ ឬយុទ្ធសាស្ត្រដែលអ្នកយកមកប្រើប្រាស់ដើម្បីសម្រេចបាននូវអ្វីដែលអ្នកជឿជាក់ ត្រូវតែមានវិន័យ ឆ្លុះបញ្ចាំងពីអ្វីដែលជាតម្លៃរបស់អ្នក ភាពត្រឹមត្រូវរបស់អ្នក និងជំនឿដែលអ្នកមានលើអ្វីដែលអ្នកកំពុងធ្វើ។ ភាពស្ថិតស្ថេរនៅត្រង់ថា អ្វីដែលអ្នកធ្វើត្រូវតែជាលទ្ធផលជះត្រឡប់បង្ហាញពី "ហេតុអ្វី" អ្នកធ្វើវា និង "ដំណើរការណ៍" ដែលអ្នកប្រើប្រាស់ ដែលធាតុផ្សំនៃដង្ហើមភាពជោគជ័យទាំង៣នេះត្រូវមានភាពតោងស្អិតល្មួតនឹងគ្នាជានិច្ច។
៣) បម្រើអ្នកដែលបម្រើអ្នកដទៃ៖
មុខតំណែងមិនអាចឲ្យអ្នកក្លាយជាអ្នកដឹកនាំគេនោះទេ ព្រោះទោះបុគ្គលគ្មានមុខតំណែងជាអ្នកដឹកនាំ ក៏ពួកគេអាចក្លាយជាអ្នកដឹកនាំគេបានដែរ។ ការទទួលខុសត្រូវរបស់អ្នកជាអ្នកដឹកនាំ គឺត្រូវធ្វើខ្លួនឲ្យដូចជាឪពុកម្ដាយរបស់ពួកគេដូច្នោះ ផ្ដល់សុវត្ថិភាព ចំណេះដឹង និងភាពរីកចម្រើនដល់អ្នកក្រោមបង្គាប់។ ត្រូវមានភាពក្លាហានចេញមុខប្រឈមមុខមុនពួកគេ នៅពេលមានគ្រោះថ្នាក់មកដល់ ថែមទាំងសុខចិត្តលះបង់ប្រយោជន៍ និងភាពសុខស្រួលរបស់ខ្លួនដើម្បីការពារសុវត្ថិភាពពួកគេ។ ឯការលះបង់របស់ពួកគេនឹងតបស្នងមកវិញតាមរយៈញើសឈាមគ្រប់ដំណក់ ការតស៊ូប្រឹងប្រែងរបស់ពួកគេចំពោះអ្នក រួមគ្នាដើម្បីសម្រេចនូវអ្វីដែលអ្នកជឿជាក់ មូលហេតុនៃ "ហេតុអ្វី" របស់អ្នកឲ្យបានដល់គោលដៅ៕
ប្រែសម្រួល៖ ស្រីពៅ
ប្រភព៖ www.modgility.com & www.en.wikipedia.org
