តើអ្វីខ្លះដែលអ្នកត្រូវប្រាកដចិត្ត មុនពេលបើកអាជីវកម្មហាងកាហ្វេមួយ ?
អាជីវកម្មបើកហាងកាហ្វេ បានរីកដុះដាលដូចផ្សិតនៅជុំវិញសកលលោក មិនថាតែប្រទេសកំពុងអភិវឌ្ឍដូចប្រទេសកម្ពុជាយើងក្ដី។ វាជាប្រភេទអាជីវកម្មមួយដែលមនុស្សជាច្រើនយល់ឃើញថាងាយស្រួលរកប្រាក់ចំណូល និងទាមទារនូវជំនាញចាំបាច់មួយចំនួនប៉ុណ្ណោះសម្រាប់ទ្រទ្រង់មុខជំនួញប្រភេទនេះឲ្យឈរជើងជាប់បានយូរ។ យ៉ាងណាមិញ ភាពងាយស្រួលដែលពួកគេកំពុងផ្ដេកផ្ដួលមានផ្នត់គំនិតទៅលើអាជីវកម្មហាងកាហ្វេនេះ និងភាពជាក់ស្ដែងនៃការប្រកួតប្រជែងនៃអាជីវកម្មប្រភេទនេះ នឹងធ្វើឲ្យពួកគេចាប់ផ្ដើមស្ទាក់ស្ទើរនិងគិតសារជាថ្មី ក្រោយពេលពួកគេកំពុងស្ថិតនៅកណ្ដាលមហាសមុទ្រនៃការធ្វើអាជីវកម្មមួយនេះ។
ប្រសិនជាអ្នកពិតជាមានគោលដៅច្បាស់លាស់ថានឹងបង្កើតអាជីវកម្មហាងកាហ្វេនេះមែន ចំណុចសំខាន់ៗមួយចំនួនខាងក្រោមនេះ គួរតែជាភាពចាំបាច់ដែលអ្នកត្រូវប្រាកដជាមួយខ្លួនឯងថានឹងពុះពារឆ្លងកាត់ឲ្យបានជាមុនសិន។
១) មមាញឹករហូតស្ទើរដកឃ្លាមិនរួច
មុនពេលចង់បើកអាជីវកម្មហាងកាហ្វេនេះឡើង តើអ្នកប្រាកដទេថា អ្នកនឹងមានពេលគ្រប់គ្រាន់បូជាសម្រាប់ដំណើរការណ៍វាឲ្យបានរលូនទៅមុខ ? មានកិច្ចការកំប៉ិកកំប៉ុកជាច្រើននៅក្នុងហាងដែលតួនាទីអ្នកជាម្ចាស់ហាងត្រូវធ្វើ ដែលអ្នកអាចនឹងមិនធ្លាប់គិតដល់។ ដោយសារអាជីវកម្មហាងកាហ្វេនេះ ត្រូវជួលបុគ្គលិកមករត់តុ បម្រើនិងទទួលភ្ញៀវ និងឆុងកាហ្វេ ឬលាងសម្អាតជាដើម ការងារទាំងនេះមិនងាយនឹងមាននរណាមានកម្លាំងចិត្តចង់ធ្វើវាយូរនោះទេ ដូច្នេះអ្នកមិនគួររំពឹងរកបុគ្គលិកល្អៗមកធ្វើការឲ្យអ្នកបានយូរនោះឡើយ។ ហេតុនេះ អ្នកមិនត្រូវប្រកាន់ខ្លួនជាម្ចាស់ហាង មិនដាក់ខ្លួនជាបុគ្គលិក បដិសេធមិនធ្វើការងារទាំងនោះពេលខ្វះខាតបុគ្គលិកនោះទេ និងថែមទាំងត្រូវមានពេលបង្ហាញខ្លួននៅក្នុងហាងពេញមួយថ្ងៃទៀតផង។
២) មានភាពលេចធ្លោប្លែកពីគូប្រជែង
អាជីវកម្មហាងកាហ្វេមានច្រើនស្អេកស្កះបែបនេះ បើអ្នកមិនមានចំណុចលេចធ្លោពិសេសអ្វីសម្រាប់បង្ហាញអតិថិជនពីហាងរបស់អ្នកទេ នោះវាពិតជាពិបាកសម្រាប់អ្នកក្នុងការទប់លំនឹងខ្លួនមិនឲ្យលិចលង់ទៅក្នុងមហាសមុទ្រដែលពោរពេញដោយការប្រកួតប្រជែងខ្លាំងក្លានេះណាស់។ ដូច្នេះវាទាមទារឲ្យអ្នកចេះធ្វើការស្រាវជ្រាវជាមុននូវរសជាតិបែបណា គ្រឿងផ្សំពិសេសបែបណា ដែលនឹងទាក់ទាញអតិថិជន ដែលមានលើសពីការតុបតែងនិងរចនាហាងដែលសហគ្រិនថ្មីថ្មោងភាគច្រើនផ្ដោតទៅលើយ៉ាងខ្លាំងនោះ។
៣) ធ្វើការជាមួយពំនូកនៃឯកសារការងារនិងឯកសារគ្រប់គ្រងហាង
ជារៀងរាល់ថ្ងៃ អ្នកត្រូវដោះស្រាយជាមួយបញ្ជីទំនិញនិងគ្រឿងផ្សំ ប្រាក់ខែបុគ្គលិក បញ្ជីចំណូលចំណាយ និងកិច្ចការកំប៉ិកកំប៉ុកផ្សេងទៀតជាច្រើនយ៉ាង ដែលចំពោះអ្នកមិនសូវមានចំណង់ចំណូលចិត្តធ្វើការជាមួយពំនូកក្រដាសដ៏ស្មុគស្មាញទាំងនេះទេ អ្នកគួរគិតគូរសារជាថ្មីពីការបើកហាងកាហ្វេនេះហើយ៕
ប្រែសម្រួល៖ ស្រីពៅ
ប្រភព៖ www.ladyironchef.com
