មូលហេតុ ៥យ៉ាង ដែលបុគ្គលិកទ្រាំលែងបាន ហើយសម្រេចលាឈប់ពីក្រុមហ៊ុន
ក្រុមហ៊ុននីមួយៗអាចដំណើរការទៅបានយ៉ាងល្អ គឺអាស្រ័យលើការរៀបចំយុទ្ធសាស្ត្ររបស់អ្នកគ្រប់គ្រង និង ការខិតខំប្រឹងប្រែងរបស់បុគ្គលិកផងដែរ។ ប៉ុន្តែអ្វីដែលក្រុមហ៊ុននីមួយៗតែងជួបប្រទះនោះ គឺចរន្តចេញចូលរបស់បុគ្គលិកមិនថេរ។ មានន័យថា បុគ្គលិកតែងតែលាឈប់ពីការងារដោយសារ ហេតុផលផ្សេងៗ ដែលប្រការនេះធ្វើឲ្យក្រុមហ៊ុនពិតមិនងាយក្នុងការដំណើរការដោយរលូននោះទេ ព្រោះថាទម្រាំអាចរកបុគ្គលិកថ្មីបាន ហើយទម្រាំតែបុគ្គលិកថ្មីយល់ពីការងារ គឺត្រូវប្រើពេលយូរទៅទៀត។
មានហេតុផលជាច្រើនដែលធ្វើឲ្យបុគ្គលិកសម្រេចចិត្តលាឈប់ពីក្រុមហ៊ុនមិនចេះចប់៖
១) ប្រាក់ខែ៖
ជាធម្មតាទេ មនុស្សគ្រប់រូបដែលសម្រេចចិត្តចូលធ្វើការនៅកន្លែងណាមួយនោះ គឺតែងរំពឹងថា នឹងទទួលបានប្រាក់ខែសមរម្យ ឬ ខ្ពស់ដើម្បីទ្រទ្រង់ការរស់នៅប្រចាំថ្ងៃរបស់ខ្លួន ក៏ដូចជាគ្រួសារ។ នៅពេលពួកគេបានខិតខំអស់ពីកម្លាំងកាយចិត្ត ប៉ុន្តែក្រុមហ៊ុនមិនបានផ្តល់ប្រាក់ខែសមស្របដើម្បីជាការលើកទឹកចិត្តទេ នោះនឹងធ្វើឲ្យបុគ្គលិកព្យាយាមសម្លឹងមើលការងារនៅក្រុមហ៊ុនផ្សេងទៀត ហើយពួកគេនឹងចាក់ចេញនៅពេលមានឱកាស។ ដូច្នេះហើយ ក្រុមហ៊ុនគួរតែគិតគូរអំពីចំណុចនេះ ជាពិសេសចំពោះបុគ្គលិកដែលមានការខិតខំខ្ពស់ដើម្បីការងារ។
២) ប្រធានពូកែត្រួតត្រា
ជាទូទៅ បើទោះបីជាមានប្រាក់ខែខ្ពស់ក្តី ប៉ុន្តែបើបុគ្គលិកធ្វើការក្រោមបង្គាប់ ប្រធានដែលពូកែខាងត្រួតត្រានោះវានឹងបង្កឲ្យមានភាពមិនចុះសម្រុងគ្នានៅកន្លែងការងារ។ ប្រធានមួយចំនួន គ្មានភាពជាអ្នកដឹកនាំទេ ប៉ុន្តែគឺ ខ្លាំងតែខាងត្រួតត្រា និង បញ្ជាតែបុគ្គលិកតែម្តង ពោលគឺគ្មានសិល្បៈក្នុងការដឹកនាំនោះទេ។ ប្រការនេះហើយ ដែលធ្វើឲ្យពួកគេ មានអារម្មណ៍ថា មានសម្ពាធខ្លាំងក្នុងការធ្វើការ ហើយមិនយូរមិនឆាប់ បុគ្គលិកដែលមានសមត្ថភាពនឹងមិនបន្តការងារទៀតឡើយ។ ដើម្បីបញ្ចៀសបញ្ហានេះ ប្រធានគ្រប់រូបមិនគួរប្រកាន់យកអាកប្បកិរិយាអវិជ្ជមានបែបនេះហើយ ពោលគឺគួរតែចេះធ្វើយ៉ាងណាឲ្យបុគ្គលិកមានអារម្មណ៍ថា ស្និទ្ធស្នាល និង ជាប្រធានដែលមានសមត្ថភាពខ្ពស់ក្នុងការគ្រប់គ្រង។
៣) ខ្វះការលើកទឹកចិត្តពីថ្នាក់លើ និង ក្រុមហ៊ុន
បុគ្គលិកខ្លះ គឺពិតជាមានសមត្ថភាព ហើយពួកគេបានខិតខំ និង យកចិត្តទុកដាក់លើការងារមែនទែន ប៉ុន្តែនៅពេលដែលពួកគេបានសម្រេចការងារជាច្រើន តែខ្វះការលើកទឹកចិត្តពីថ្នាក់លើ ក៏ដូចជាក្រុមហ៊ុននោះ លុះដល់ពេលយូរៗទៅអ្នកទាំងនោះនឹងមានអារម្មណ៍ថា ការខិតខំប្រឹងប្រែងរបស់ខ្លួន គឺគ្មានប្រយោជន៍អ្វី។ ការធ្វើការក្នុងស្ថានភាពបែបនេះយូរៗទៅ នឹងធ្វើឲ្យពួកគេមានអារម្មណ៍ថា នឿយហត់ ហើយបែរគិតចង់ផ្លាស់ប្ដូរកន្លែងការងារវិញម្តង។ សូមកុំកំណាញ់ចំពោះការលើកទឹកចិត្តលើបុគ្គលិកដែលបានសាងស្នាដៃ ព្រោះវាមិនខាតបង់អ្វីនោះទេ។
៤) ខ្វះការផ្តល់តម្លៃពីថ្នាក់លើ៖
បុគ្គលិកមួយចំនួនតែងព្យាយាម ស្វែងរកគំនិតល្អៗដើម្បីបង្ហាញទៅដល់ក្រុមការងារ និង ថ្នាក់លើ ប៉ុន្តែអ្វីៗដែលពួកគេបានខិតខំនោះ មិនត្រូវបានថ្នាក់លើយកទៅពិចារណា ឬ ស្តាប់ហេតុផលឲ្យបានច្បាស់សិននោះទេ។ លើសពីនេះទៀត ប្រធានមួយចំនួនហាក់ចាត់ទុកខ្លួនឯងជា មនុស្សអស្ចារ្យហើយមិនផ្តល់តម្លៃច្រើនលើបុគ្គលិករបស់ខ្លួនទេ។ ប្រការនេះ នឹងធ្វើឲ្យបុគ្គលិកទាំងនោះ មានអារម្មណ៍ថាខ្លួនគ្មានតម្លៃនៅក្នុងក្រុមហ៊ុន ហើយគិតចង់ឈប់ពីការងារប្រសិនបើអាច។
៥) ខ្វះការអធ្យាស្រ័យពីក្រុមហ៊ុន ឬ ថ្នាក់លើ
គ្មានមនុស្សណាដែលល្អគ្រប់ដប់នោះទេ ពោលគឺ វាជារឿងដែលជៀសមិនផុត ពីការសាងកំហុស។ ពេលខ្លះបុគ្គលិកបានព្យាយាមអស់ពីលទ្ធភាពហើយ ប៉ុន្តែនៅតែមានចន្លោះប្រហោងកើតឡើង ដែលចំណុចនេះ ធ្វើឲ្យក្រុមហ៊ុន ឬថ្នាក់លើរបស់ពួកគេបើកវេទិកាស្តីបន្ទោសតែម្តង។ ជាការពិតណាស់ នៅពេលបុគ្គលិកណាមួយសាងកំហុស វាត្រូវតែមានការណែនាំ និង កែតម្រូវ ប៉ុន្តែត្រូវធ្វើឡើងក្នុងន័យស្ថាបនា ពោលគឺមិនមែនស្តីបន្ទោសគ្មានដឹងក្បាលកន្ទុយនោះទេ។ ការស្តីបន្ទោសបែបនេះ គឺមិនអាចជួយកែប្រែស្ថានភាពបាននោះទេ ប៉ុន្តែវាធ្វើឲ្យអ្វីៗកាន់តែអាក្រក់ឡើងៗថែមទៀត ហើយនៅទីបំផុត បុគ្គលិកខ្លះអាចនឹងសម្រេចចិត្តចាក់ចេញ៕
ដោយ៖ អ៊ុន ភក្តី
