ចំណុចមួយក្នុងសៀវភៅ Lean inពីCOOរបស់Facebookម្នាក់នេះ នឹងធ្វើឲ្យស្ត្រីពិចារណាជាថ្មីពីគោលដៅជីវិតរបស់ខ្លួន
ជាអ្នកដឹកនាំស្ត្រីដ៏មានឥទ្ធិពលនិងទទួលបានការគោរពស្រឡាញ់ច្រើនបំផុតមួយ លោកស្រី Sheryl Sandberg ត្រូវបានតែងតាំងនៅក្នុងតំណែងជាប្រធាននាយកប្រតិបត្តិ ឬCOO របស់បណ្ដាញសង្គមFacebook ចាប់តាំងពីឆ្នាំ២០០៨។ ជាអតីតអនុប្រធានមួយរូបរបស់ Google លោកស្រីក៏ធ្លាប់ជាអ្នកដឹកនាំមួយរូបនៅទីនោះអស់រយៈពេល៦ឆ្នាំផងដែរ។
ស្ត្រីដ៏អស្ចារ្យមួយនេះ ក៏ជាអ្នកនិពន្ធមួយរូបដែលនៅពីក្រោយសៀវភៅលក់ដាច់បំផុតដែលមានចំណងជើងថា "Lean in" កាលពីឆ្នាំ២០១៣ និងជាស្ថាបនិកអង្គការលើកកម្ពស់ស្ត្រីរបស់ Lean inផងដែរ។
សៀវភៅ Lean in របស់លោកស្រី Sheyl Sandberg មានលក្ខណៈជាការរៀបរាប់ពីបទពិសោធន៍ទុក្ខលំបាកផ្ទាល់ខ្លួនក្នុងនាមជាស្ត្រី ដែលព្យាយាមធ្វើឲ្យជីវិតការងារនិងជីវិតគ្រួសារមានតុល្យភាព និងឧបសគ្គដែលស្ត្រីតែងជួបប្រទះនៅពេលព្យាយាមរុញខ្លួនឯងឲ្យខ្ពស់នៅក្នុងការងារ។ សៀវភៅមួយក្បាលនេះ បានផ្ដល់ជាគំនិតស៊ីជម្រៅនិងពោរពេញដោយតម្លៃជាច្រើនសម្រាប់ស្ត្រីគ្រប់រូបយកទៅពិចារណា។ យ៉ាងណាមិញ នៅត្រង់ឧទាហរណ៍មួយដែលលោកស្រីបានលើកឡើងយកមកធ្វើជាភស្តុតាង គឺជាចំណុចដ៏សំខាន់មួយ ដែលមិនគួរឲ្យមើលរំលង។ ក្នុងឧទាហរណ៍នោះ គាត់បានលើកឡើងពីការសិក្សាមួយដែលបានធ្វើឡើងប្រហែលជាង១ទសវត្សកន្លងមកហើយ ដែលគេហៅការសិក្សានោះថា Howard/Heidi study។
ការសិក្សាមួយនេះនិយាយអំពីភាពជោគជ័យដែលកើតឡើងក្នុងតថភាពជាក់ស្ដែងមួយ ទៅលើសហគ្រិនជាស្ត្រីមួយរូបដែលបានក្លាយជាវិនិយោគិនដ៏ជោគជ័យមួយរូប ដោយសារអត្តចរិតរួសរាយ ព្រមទាំងមានបណ្ដាញទំនាក់ទំនងដ៏ធំទូលាយទៀតផង។ នៅតែជាសហគ្រិនស្ត្រីដដែល ប៉ុន្តែសាស្ត្រាចារ្យដែលដឹកនាំការសិក្សានោះរៀបរាប់អំពីភាពជោគជ័យរបស់ស្ត្រីនេះដោយរក្សាឈ្មោះ Heidi ជាស្ត្រីនេះដដែលទៅក្រុមមួយ។ ដោយឡែក គាត់ប្ដូរឈ្មោះរបស់សហគ្រិនស្ត្រីម្នាក់នេះមកជាឈ្មោះបុរស Howard វិញ សម្រាប់ក្រុមមួយផ្សេងទៀត។
រឿងរ៉ាវជោគជ័យរបស់សហគ្រិនតែមួយ ប៉ុន្តែគ្រាន់តែមួយជារបស់ស្ត្រី និងមួយទៀតរបស់បុរស លទ្ធផលសិក្សាបានបង្ហាញថា ក្រុមដែលអានអំពីភាពជោគជ័យរបស់តួអង្គ Howard បានវាយតម្លៃបុរសម្នាក់នេះជាមនុស្សគួរឲ្យរាប់អាន រីឯភាពជោគជ័យរបស់តួអង្គពិតប្រាកដ Heidi វិញ ក្រុមសិក្សាមួយទៀតវាយតម្លៃស្ត្រីនោះជាមនុស្សចង្អៀតចង្អល់ និងជាប្រភេទមនុស្សដែលពួកគេមិនចង់ផ្ដល់ការងារឲ្យឬក៏ធ្វើការឲ្យនោះទេ។ នៅពេលបុរសជោគជ័យ និងក្លាយជាអ្នកដឹកនាំ មនុស្សគ្រប់គ្នាសុទ្ធតែគាំទ្រនិងពេញចិត្តចំពោះសក្ដានុពលរបស់ពួកគេ។ ដោយឡែកស្ត្រីដែលក្លាយជាអ្នកដឹកនាំខ្ពស់ ពុំសូវមាននរណាពេញចិត្តនឹងពួកគេនោះឡើយ។
ការរើសអើងបែបនេះគឺជាមូលហេតុដូចគ្នាមួយ ដែលស្ត្រីភាគច្រើនបន្ទាបខ្លួនឯង និងមិនអាចឡើងទៅដល់សក្ដានុពលខ្ពស់បំផុតរបស់ខ្លួនបាន។ លោកស្រីក៏បានលើកឡើងពីបទពិសោធន៍ផ្ទាល់ខ្លួន នៅពេលលោកស្រីធ្វើការនៅក្រុមហ៊ុន Facebook បាន៦ខែ ជាពេលនៃការវាយតម្លៃលទ្ធផលការងារ ស្ថាបនិកនិងនាយកប្រតិបត្តិ Facebook លោក Mark Zuckerberg បាននិយាយប្រាប់គាត់ថា៖ "ក្ដីប្រាថ្នារបស់អ្នក ដែលចង់បំពេញចិត្តមនុស្សគ្រប់គ្នា គឺជាអ្វីដែលទាញអ្នកមិនឲ្យឈានដល់សក្ដានុពលរបស់ខ្លួនបាន។ បើអ្នកចង់បំពេញចិត្តមនុស្សគ្រប់គ្នា អ្នកនឹងមិនអាចផ្លាស់ប្ដូរអ្វីឡើយ"។ ចំពោះអ្នកដែលជាស្ត្រីមួយរូប ដែលមានក្ដីប្រាថ្នាក្នុងចិត្តថាចង់សម្រេចអ្វីមួយ ឬចង់ផ្លាស់ប្ដូរអ្វីមួយដើម្បីឲ្យពិភពលោកល្អប្រសើរ តើអ្នកយល់ឃើញដូចម្ដេចដែរ ?
ប្រែសម្រួល៖ ស្រីពៅ
ប្រភព៖ forbes
