កំហុសរបស់ម្ចាស់អាជីវកម្មក្នុងទំនាក់ទំនងជាមួយបុគ្គលិក ដែលនាំភាពបរាជ័យមករកពួកគេ
មានម្ចាស់អាជីវកម្មជាច្រើន មិនថាតូចក្ដីធំក្ដី តែងមើលរំលងទៅលើតម្លៃនៃទំនាក់ទំនងរវាងខ្លួនដែលជាអ្នកដឹកនាំគេ ឬមេគេជាមួយនឹងបុគ្គលិកតូចតាចក្រោមបង្គាប់របស់ខ្លួន។ ពួកគេច្រើនតែមានគំនិតថាបុគ្គលិកតូចតាចទាំងនោះនឹងស្ដាប់នូវរាល់អ្វីដែលពួកគេជាថ្នាក់លើបង្គាប់បញ្ជាឲ្យធ្វើ ក៏ព្រោះតែយល់ថាពួកគេមកធ្វើការក៏ដើម្បីតែប្រាក់ដែរ។ ប៉ុន្តែ បើអ្នកគិតបែបនេះ និងមានឥរិយាបថស្ដែងចេញមកពីការគិតបែបនេះទៅលើបុគ្គលិក នោះប្រាកដណាស់ថាអ្នកនឹងទទួលបានការកោតខ្លាចពីពួកគេ តែគ្មានថ្ងៃទទួលបានការគោរពពីពួកគេនោះឡើយ។
ដូចដែលអ្នកគិតដូច្នោះថាពួកគេមកធ្វើការឲ្យអ្នកហើយព្រមស្ដាប់ពាក្យគំរោះគំរើយនិងឥរិយាបថជាមេគេនេះ ក៏ព្រោះតែដើម្បីលុយ ដូច្នេះពួកគេមិនធ្វើការចេញពីចិត្តប្រឹងប្រែងដើម្បីជួយអ្នកទៅដល់គោលដៅនេះឡើយ។ អ្វីៗនឹងល្អនៅតែសម្បកក្រៅ ម្នាក់ៗប្រែជាមនុស្សគ្មានទំនួលខុសត្រូវទៅលើកិច្ចការងារដែលជាតួនាទីរបស់ខ្លួន និងចាំតែមើលបំណាំគ្នា និងបន្ទោសគ្នាទៅវិញទៅមកដើម្បីឲ្យតែរួចខ្លួនប៉ុណ្ណោះ។ ដោយគ្មានការយកចិត្តទុកដាក់ពីអ្នកដឹកនាំទាំងទៅលើរឿងការងារនិងរឿងផ្ទាល់ខ្លួន បុគ្គលិកនឹងអស់កម្លាំងចិត្តធ្វើការឲ្យអ្នក ហើយវានឹងប៉ះពាល់ដល់ប្រសិទ្ធភាពនិងផលិតភាពការងាររបស់ពួកគេ។ អ្នកអាចគិតថាវាមិនសំខាន់សម្រាប់អ្នក ប៉ុន្តែបើមិនមែនបុគ្គលិកអ្នកជាអ្នកបម្រើអតិថិជន ដែលអាចផ្ដល់ចំណូលដល់អ្នកបាននោះទេ តើអ្នកណាទៅវិញទៅ ? គឺជាអ្នកខ្លួនឯងនេះហើយដែលចុងក្រោយនាំខ្លួនឯងទៅរកការខាតបង់ដោយខ្លួនឯង ដោយសារមើលរំលងរឿងបន្តិចបន្តួច។
ម្យ៉ាងទៀត នេះក៏មិនមែនមានន័យថាអ្នកត្រូវយកចិត្តទុកដាក់គេខ្លាំងពេក ឬអាចនិយាយបានថាលូកដៃចូលជ្រៀតជ្រែកកិច្ចការដែលជាការទទួលខុសត្រូវដែលអ្នកបានផ្ដល់ឲ្យពួកគេនោះដែរ។ ការជ្រៀតជ្រែកខ្លាំងពេក វានឹងបង្កជាការមិនទុកចិត្តគ្នាពីអ្នកដឹកនាំចំពោះបុគ្គលិក។ នៅពេលអ្នកព្យាយាមត្រួតត្រាបុគ្គលិកគ្រប់សព្វបែបយ៉ាង វាដូចគ្នាទៅនឹងអ្នកមិនបានទុកចន្លោះសម្រាប់ពួកគេនឹករកនូវអ្វីដែលថ្មីប្លែក និងបំផុសនូវការច្នៃប្រឌិតរបស់ពួកគេនោះទេ នេះក៏ព្រោះតែអ្នកបានដាក់ដែនកំណត់កម្រិតពួកគេទៅតាមអ្វីដែលអ្នកបានកំណត់រួចមកហើយ ហើយពួកគេត្រូវតែដើរតាមដោយឥតប្រកែក។ អ្នកណាទៅដឹងទៅថា បុគ្គលិកដែលអ្នកយល់ថាតូចតាចនេះ អាចមានគំនិតអ្វីអស្ចារ្យជាងអ្នកដែលជាថ្នាក់លើគេនោះ ? ទំនាក់ទំនងគឺសំខាន់ បើអ្នកចង់ឲ្យអាជីវកម្មរបស់អ្នកដំណើរការណ៍ទៅមុខរលូនល្អ ទំនាក់ទំនងជាមួយអ្នកក្រោមបង្គាប់គួរតែជាអ្វីដែលអ្នកគួរគិតពិចារណាឲ្យបានល្អិតល្អន់ដូចដែលការព្រួយបារម្ភគិតអំពីយុទ្ធសាស្ត្រដើម្បីដំណើរការណ៍អាជីវកម្មរបស់អ្នកឲ្យជោគជ័យដែរ ព្រោះបើគ្មានការសហការពីពួកគេទេ កុំរំពឹងថាអ្នកអាចទៅដល់គោលដៅមួយនេះបានជោគជ័យឲ្យសោះ៕
ដោយ៖ ស្រីពៅ
