ចំណុចអាក្រក់ ២យ៉ាង គ្រប់គ្រាន់នឹងធ្វើឲ្យអ្នក«នៅតែក្រ» ឬ «ក្រមួយជីវិត» ទោះចំណូលច្រើនប៉ុណ្ណាក៏ដោយ
ចំណូលច្រើន គឺជារឿងល្អ ប៉ុន្តែមិនទាន់ល្អខ្លាំងណាស់នោះ បើកាលណាអ្នករកនោះ មិនដឹងពីវិធីក្នុងការសន្សំ ឬ ទុកដាក់។ អ៊ីចឹងហើយបានលោក Robert Kiyosaki អ្នកនិពន្ធរបស់សៀវភៅ«ឪពុកអ្នកមានបង្រៀនកូនអ្នកក្រ» បានអះអាងថា រកបានប៉ុន្មានមិនទាន់សំខាន់ទេ តែសំខាន់តើយើងចេះទុកដាក់វាក្នុងកម្រិតណា។
មនុស្សទូទៅចូលចិត្តចាយវាយតាមអារម្មណ៍ដោយគ្មានផែនការចំណាយច្បាស់លាស់ អ៊ីចឹងហើយទោះបីជារកបានប៉ុន្មានក៏មិនដែលសល់ដូចគ្នា ហើយបែរជាឆ្លៀតខ្ចីលុយគេចាយនៅចុងខែទៀត។ ខាងក្រោមនេះចំណុចអាក្រក់២យ៉ាងអាក្រក់ពាក់ព័ន្ធនឹងលុយជាហេតុ ធ្វើឲ្យមនុស្សជាច្រើននៅតែក្រ៖
១) គ្មានផែនការហិរញ្ញវត្ថុច្បាស់លាស់
មនុស្សទូទៅមិនដែលខ្វល់ពីផែនការក្នុងការចំណូល និង ការសន្សំអ្វីនោះឡើយ ហើយក៏មិនដែលគិតថា ខែក្រោយប្រសិនបើខ្លួនបាត់បង់ការងារធ្វើ តើត្រូវរស់យ៉ាងម៉េច។ នៅពេលដែលគ្មានផែនការច្បាស់លាស់ហើយ នោះការចាយគឺមិនពិបាកនោះទេ ពោលគឺឲ្យតែមានលុយក្នុងហោប៉ៅដែលអាចចាយបាន គឺដឹងតែចាយ អ៊ីចឹងហើយ មានប៉ុន្មានក៏មិនសល់ គឺចុងក្រោយសល់តែបំណុលដែលជំពាក់គេបន្ថែមទៀត។
២) មិនចេះបែងចែកអ្វីជាបំណុល និង អ្វីជាទ្រព្យ
មនុស្សទូទៅមិនខ្វល់ និង គិតថា អ្វីជាបំណុល និង ទ្រព្យនោះទេ អ៊ីចឹងហើយពួកគេតែងចំណាយទៅលើបំណុលជាជាងទ្រព្យ។ បំណុលគឺជាអ្វីៗដែលធ្វើឲ្យអ្នកត្រូវចំណាយជាប្រចាំ ហើយធ្វើឲ្យអ្នកខាត និង បន្តខាតរហូត មានដូចជា ទូរស័ព្ទ (ដេញតាមស៊េរី) ឡាន និង ម៉ូតសំលៀកបំពាក់ថ្លៃៗ។ ដោយឡែកទ្រព្យវិញ មានដូចជា ផ្ទះ ដី និង ការសិក្សាជាដើម ព្រោះធ្វើឲ្យអ្នកចំណេញនៅពេលក្រោយ បន្ទាប់ពីវិនិយោគទៅលើវា។ ប៉ុន្តែដោយហេតុថា ចំណូលចិត្តចំណាយលើបំណុលជាជាងទ្រព្យបែបនេះ ទើបធ្វើឲ្យមនុស្សជាច្រើន នៅតែក្រ និង បន្តភាពក្រីក្រជារៀងរហូត៕
ដោយ៖ រតនា វិចិត្រ
