ឃ្លាទាំង ៤ដែលអ្នកដឹកនាំល្អតែងមានជាមួយកូនចៅជាប្រចាំ
ការរីកចម្រើនរបស់កូនចៅឬការអន់ថយរបស់កូនចៅត្រូវអាស្រ័យទៅលើភាពជាអ្នកដឹកនាំរបស់អ្នក។ អ្នកដឹកនាំល្អនឹងធ្វើឲ្យកូនចៅបានបំផុសឫសគល់ទេពកោសល្យរបស់ខ្លួន និងប្រើប្រាស់វាទៅដល់ចំណុចកំពូលរបស់វា។
ដោយសារវាត្រូវអាស្រ័យទៅលើទំនាក់ទំនងដែលអ្នកដឹកនាំមានជាមួយកូនចៅ ខាងក្រោមនេះគឺជាឃ្លាចំនួន៤ដែលអ្នកដឹកនាំល្អតែងមានជាមួយកូនចៅជាប្រចាំ៖
១) «តើខ្ញុំអាចជួយអ្នកដោយរបៀបណាបាន ?»៖ អ្នកដឹកនាំវៃឆ្លាតចេះធ្វើយ៉ាងណាឲ្យការទុកឯករាជ្យសម្រាប់បុគ្គលិកនិងការចូលឈឺឆ្អាលការងាររបស់ពួកគេមានតុល្យភាពនឹងគ្នា។ នៅពេលអ្នកចូលឈឺឆ្អាលរឿងការងាររបស់បុគ្គលិកពេក វានឹងបង្កើតជាការរំខានដល់ពួកគេ និងធ្វើឲ្យពួកគេមិនបានបញ្ចេញសមត្ថភាពដោះស្រាយបញ្ហានិងភាពច្នៃប្រឌិតរបស់ពួកគេឲ្យអស់ពីលទ្ធភាព។ យ៉ាងណាមិញ អ្នកក៏មិនអាចទុកពួកគេចោលដោយមិនខ្វាយខ្វល់អ្វីសោះនោះដែរ។ អ្នកគួរតែសួរពួកគេពីអ្វីដែលពួកគេត្រូវការឲ្យអ្នកជួយ ខណៈពេលដែលទុកពួកគេឲ្យរៀនសូត្រដោះស្រាយបញ្ហាដោយខ្លួនឯង។
២) «នេះគឺជាអ្វីដែលខ្ញុំចង់ឲ្យផ្ដល់អាទិភាពទៅលើវា»៖ ស្ថានការណ៍ផ្លាស់ប្ដូរ អ្វីៗមិនមែនចេះតែនៅទ្រឹងមួយកន្លែងរហូតនោះទេ។ ហេតុនេះអ្នកដឹកនាំត្រូវចេះប្រាប់បុគ្គលិកពីអ្វីដែលពួកគេត្រូវចំណាយថាមពលរបស់ពួកគេទៅលើនៅពេលស្ថានការណ៍ផ្លាស់ប្ដូរ និងមូលហេតុដែលពួកគេត្រូវធ្វើបែបនោះ។
៣) «នេះគឺជាផ្នែកដែលខ្ញុំចង់ឲ្យអ្នកអភិវឌ្ឍឲ្យបានប្រសើរជាងមុននៅខែក្រោយនេះ»៖ ការផ្ដល់មតិយោបល់ចំពោះការងាររបស់បុគ្គលិកគឺជាចំណុចសំខាន់មួយដែលនាំពួកគេឲ្យឆ្ពោះទៅរកការអភិវឌ្ឍក្នុងពេលអនាគត។ ប៉ុន្តែអ្នកក៏ត្រូវចាំថានរណាម្នាក់ក៏តែងតែមានកំហុសដែរ សូម្បីតែជាអ្នកដឹកនាំដូចជាអ្នកក៏ដោយ។ ហេតុនេះអ្នកត្រូវមានក្ដីមេត្តាចំពោះពួកគេ នៅពេលលើកឡើងពិភាក្សាពីបញ្ហានេះជាមួយកូនចៅ។
៤) «តើអ្វីទៅគឺជាគោលដៅរយៈពេលវែងរបស់អ្នក ?»៖ មានពេលខ្លះអ្នកបានដាក់ការងារដែលពួកគេមិនសូវចូលចិត្តធ្វើ ដោយមិនដឹងថាអ្វីទៅគឺជាចំណង់ចំណូលចិត្តនិងក្ដីស្រមៃរបស់ពួកគេ ជាហេតុនាំឲ្យពួកគេសម្រេចការងារមិនសូវបានលទ្ធផលល្អ។ ការយល់ដឹងពីចំណុចនេះនឹងជួយអ្នកឲ្យចេះប្រើបុគ្គលិកឲ្យចំគោលដៅ ពង្រឹងភាពខ្លាំងរបស់ពួកគេ និងជំរុញពួកគេឲ្យសម្រេចការងារឲ្យទទួលបានលទ្ធផលខ្ពស់៕
ដោយ៖ ស្រីពៅ
