លោក ហោ ចាន់រដ្ឋា៖ គន្លឹះសំខាន់៣យ៉ាងជួយអ្នកឲ្យអភិវឌ្ឍខ្លួនប្រកបដោយប្រសិទ្ធិភាព
ភាពជោគជ័យសុទ្ធតែអាចកើតឡើងទៅលើមនុស្សគ្រប់គ្នា ជាការពិត វាហាក់ដូចជាទ្វារមួយផ្ទាំងធំដែលបិទជិតដោយគន្លឹះតូចមួយអ៊ីចឹង នៅពេលដែលអ្នកអាចស្វែងរកគន្លឹះនោះឃើញអ្នកនឹកអាចបើកទ្វារនោះបានដោយងាយ ហើយអ្នកនឹងឃើញពីភាពធំទូលាយដែលស្ថិតនៅខាងក្រោយនៃទ្វារនោះ។ ជាមួយគ្នានេះដែរលោក ហោ ចាន់រដ្ឋា អ្នកស្រាវជ្រាវភាពជាអ្នកដឹកនាំ និងជាអ្នកចងក្រងសៀវភៅ «ភាពជាអ្នកមានកំពូល» បានបង្ហើបនូវគន្លឹះសំខាន់៣យ៉ាងអាចជួយឲ្យអ្នកមានឱកាសក្លាយជាបុគ្គលជោគជ័យ។
ទីមួយអ្នកត្រូវរៀនរស់ធ្វើយ៉ាងណាកុំឲ្យជំពាក់អ្នកដទៃ និងសុខចិត្តធ្វើឲ្យអ្នកដទៃជំពាក់ខ្លួនវិញ៖ ជាការពិតមនុស្សគ្រប់គ្នាតែងតែចង់ក្លាយជាអ្នកមាន ឬក្លាយជាមនុស្សជោគជ័យ ប៉ុន្តែប្រសិនបើអ្នកជំពាក់គេនោះទោះអ្នករកយ៉ាងណាក៏មិនសល់ក៏មិនរីកចម្រើនដែរ។ ឧទាហរណ៍ថា អ្នកធ្វើការនៅកន្លែងមួយដែលគេជួលក្នុងតម្លៃ៣០០ដុល្លារឲ្យធ្វើការ៨ម៉ោង អ្នកត្រូវធ្វើខ្លួនឲ្យស្មើរនឹងមនុស្សដែលមានប្រាក់ខែ៨០០ឬ១០០០ដុល្លារ មានន័យថាបើគេជួលអ្នក៣០០ហើយអ្នកធ្វើការឲ្យគេក្នុងតម្លៃ៣០០នោះអ្នកបានត្រឹមតែរួចខ្លួនប៉ុណ្ណោះ ហើយប្រសិនបើអ្នកធ្វើក្រោមនឹងនោះមានន័យថាអ្នកជំពាក់គេហើយ ដូច្នេះអ្នកគួរធ្វើខ្លួនឯងឲ្យអ្នកដទៃជំពាក់ ប្រសើរជាងជំពាក់អ្នកដទៃ។
ទីពីរធ្វើឲ្យខ្លួនឯងក្លាយជាអ្នកដឹកនាំ៖ ឧទាហរណ៍ថាអ្នកធ្វើការនៅកន្លែងមួយអ្នកត្រូវចាត់ទុកខ្លួនឯងជាម្ចាស់ក្រុមហ៊ុននោះ មានន័យថារាល់កិច្ចការនៅក្នុងក្រុមហ៊ុនឬស្ថាប័នដែលអ្នកធ្វើការអ្នកត្រូវធ្វើវាឲ្យល្អបំផុត គឺប្រៀបដូចជាការធ្វើការសម្រាប់ក្រុមហ៊ុនរបស់ខ្លួនឯងដូច្នោះដែរ ពោលគឺអ្នកត្រូវមានទំនូលខុសត្រូវមិនមែនធ្វើអ្វីមួយឲ្យតែរួចពីដៃហើយសម្អាងតែមេជាអ្នកត្រួតពិនិត្យដោះស្រាយនោះទេ។ ដូច្នេះប្រសិនបើអ្នកព្យាយាមធ្វើឲ្យខ្លួនឯងក្លាយជាអ្នកដឹកនាំ នោះអ្នកនឹងអាចក្លាយទៅជាអ្នកដឹកនាំនៅថ្ងៃណាមួយ បើទោះបីជាពេលដំបូងអ្នកធ្វើទៅមិនទាន់សមក្ដី។
ទីបីធ្វើខ្លួនឲ្យក្លាយជាគ្រូ៖ គ្រូមានន័យថាជាជនគម្រូ ជាមនុស្សដែលមានចំណេះវិជ្ជាខ្ពង់ខ្ពស់ អាចបង្រៀននិងអាចពន្យល់ឲ្យគេយល់បាន។ ឧទាហរណ៍ថា អ្នកមានគំនិតដ៏ល្អមួយចង់ប្រាប់ឬណែនាំឲ្យអ្នកដទៃជោគជ័យគេរីកចម្រើនជាដើម ប៉ុន្តែនៅពេលដែលអ្នកទៅនិយាយប្រាប់គេ គេបែជាមិនស្ដាប់គេបែជាមិនយល់និងមិនខ្វល់ចំពោះបំណងល្អរបស់អ្នកទៅវិញ តើនោះដោយសារមូលហេតុអ្វី? តើយើងពិតជាអន់ដល់ថ្នាក់ប្រាប់គេឲ្យល្អសោះគេបែជាមិនស្ដាប់? ជាការពិតនោះមានន័យថាអ្នកខ្វះសមត្ថភាពធ្វើជាគ្រូហើយ គឺខ្វះសមត្ថភាពក្នុងការពន្យល់ឲ្យអ្នកដទៃយល់ ដូច្នេះអ្នកត្រូវធ្វើខ្លួនឯងឲ្យដូចជាគ្រូសម្រាប់អ្នកដទៃ៕
អត្ថបទដោយ៖ ជួប ស្រីរ័ត្ន
