លក្ខណៈសម្បត្តិពិសេស ១៣ចំណុច របស់នាយកប្រតិបត្តិ (CEO)ឆ្នើម
តើអ្នកមានដឹងទេថា ហេតុអ្វីបានជានៅក្នុងចំណោមសហគ្រិន ១០ នាក់មាន៩ នាក់បរាជ័យ? តាមពិតវាមានមូលហេតុជាច្រើនដែលនៅពីក្រោយសំនួរនេះដែលជាកំហុសរបស់សហគ្រិន នាយកប្រតិបត្តិក្រុមហ៊ុន និងកត្តាផ្សេងៗទៀត។ ប្រសិនបើអ្នកស្ថិតនៅក្នុងចំណោមជានាយកប្រតិបត្តិក្រុមហ៊ុន ឬ ក៏ត្រៀមខ្លួនដើម្បីក្លាយជាថ្នាក់ដឹកនាំ ក្រុមហ៊ុនមួយនៅពេលអនាគត អ្នកគួរស្វែងយល់ពីលក្ខណៈសម្បត្តិ១៣ ចំណុចនេះ៖
១. កសាងវប្បធម៌មួយក្នុងក្រុមហ៊ុន មិនមែនតែក្រុមហ៊ុនមួយប៉ុណ្ណោះទេ
នាយកប្រតិបត្តិ (CEO) ដ៏ឆ្នើមដូចជារូបលោក Tony Hsieh បានផ្តល់ដំបូន្មានថា ក្រុមហ៊ុនមួយគួរបង្កើតវប្បធម៌ល្អមួយក្នុងក្រុមហ៊ុនដែលអាចផ្តល់បេសកកម្មឲ្យបុគ្គលិកគ្រប់គ្នាបាន។ វាគឺជាវប្បធម៌ដែលធ្វើឲ្យបុគ្គលិកគ្រប់គ្នាយល់ថា ពួកគេមានអារម្មណ៍មិនចេះធុញទ្រាំនៅពេលធ្វើការងារឲ្យក្រុមហ៊ុននោះ។
២. ស្តាប់ និងអនុវត្ត
នាយកប្រតិបត្តិក្រុមហ៊ុនជាច្រើនចូលចិត្តនិយាយប្រាប់អ្នកពីអ្វីដែលអ្នកត្រូវធ្វើ ប៉ុន្តែនាយកប្រតិបត្តិល្អបំផុតគឺជាមនុស្សដែលចូលចិត្តស្តាប់ ការផ្តល់យោបល់ មតិរិះគន់កែលំអ ហើយថែមទាំងហ៊ានសម្រេចចិត្តយកមតិទាំងនោះទៅអនុវត្តទៀតផង។ នេះជាការលើកឡើងរបស់លោក Mike McCue នាយកប្រតិបត្តិក្រុមហ៊ុន Flipboard។
៣.មិនបោះបង់
លោក Brian Chesky នាយកប្រតិបត្តិក្រុមហ៊ុន Airbnbបាននិយាយថា ទោះបីគោលដៅ ១ ០០០ ជំហានរបស់អ្នកបរាជ័យ ៩៩៩ ដង ឲ្យតែមានក្តីសង្ឃឹមតែ១ដង ក៏ត្រូវបន្តដំណើរទៅ មុខទៀតដែរ។
៤. មានចក្ខុវិស័យច្បាស់លាស់
មាន CEO ល្បីល្បាញច្រើនណាស់នៅលើពិភពលោក ប៉ុន្តែប្រសិនបើអ្នកគ្មានសមត្ថភាពធ្វើឲ្យមនុស្សគ្រប់គ្នាចាប់អារម្មណ៍ គ្មានអ្នកណាម្នាក់ចាំឈ្មោះក្រុមហ៊ុនរបស់អ្នកនោះទេ។ ចំណុចស្នួលមួយនៅទីនេះ គឺ CEO គ្រប់រូបត្រូវបង្កើតចក្ខុវិស័យច្បាស់លាស់មួយសម្រាប់ក្រុមហ៊ុនដើម្បីដើរទៅថ្ងៃខាងមុខ។
៥. ផ្ដោតយកចិត្តទុក្ខដាក់លើការងារតែមួយគត់
កាលនៅរស់ Steve Jobes បានប្រាប់បុគ្គលិកគ្រប់គ្នាថា ពួកគេត្រូវតែផ្តោតលើការងាររបស់ពួកគេតែមួយគត់ ហើយមិនត្រូវផ្តោតលើអ្វីផ្សេងទេ លុះត្រាតែពួកគេធ្វើការងារនោះឲ្យចប់សព្វគ្រប់ជាមុនសិន។
៦. និយាយច្បាស់ៗ ហើយម៉ឺងម៉ាត់
នាយកប្រតិបត្តិដ៏ឆ្នើមម្នាក់ ជាអ្នកដឹកនាំមានភាពប៉ិនប្រសព្វនៅក្នុងការប្រើប្រាស់ពាក្យពេចន៍វោហារសាស្ត្រប្រកបដោយភាពម៉ឺងម៉ាត់ ធ្ងន់ៗ និងច្បាស់លាស់ដើម្បីប្រាប់ទៅមនុស្សគ្រប់គ្នាអំពីទិដ្ឋភាពទូទៅរបស់ក្រុមហ៊ុន និងប្រធានបទនានាទៅកាន់មនុស្សជុំវិញខ្លួន ។
៧. យល់ច្បាស់ពីតម្រូវការអតិថិជន
នាយកប្រតិបត្តិល្អបំផុតក៏ជាមនុស្សពូកែមានសមត្ថភាពអាចមើលធ្លុះចិត្តសាស្ត្ររបស់អតិថិជនថា តើពួកគេចង់បានអ្វី? ហើយតើធ្វើដូចម្តេចទើបអតិថិជនគាំទ្រផលិតផល ឬ សេវាកម្មរបស់ខ្លួន?
៨. ពូកែបញ្ចុះបញ្ចូលអ្នកដទៃ
នាយកប្រតិបត្តិដ៏ល្អមួយរូប គឺជាបុគ្គលដែលមានសមត្ថភាពអាចដោះស្រាយទំនាស់ផលប្រយោជន៍នានានៅក្នុងក្រុមហ៊ុន និងជាមួយអតិថិជនជាដើម។ ជាទូទៅអតិថិជនតែងតែចង់បានអ្វីដែលក្រុមហ៊ុនពិបាកផ្តល់ឲ្យ ប៉ុន្តែ នាយកប្រតិបត្តិពូកែម្នាក់ពិតជាបញ្ចុះបញ្ចូលអតិថិជនទាំងនោះឲ្យផ្លាស់ប្ដូរទស្សនៈរបស់ពួកគេបាន។
៩. មានភាពបត់បែនគ្រប់កាលៈទេសៈ
នេះជាជំនាញសំខាន់មួយទៀតរបស់នាយកប្រតិបត្តិឆ្លើម ពោលគឺអាចច្នៃផលិតផល កែតម្រូវ អភិវឌ្ឍផលិតផល ឬ គំរូអាជីវកម្មរបស់ខ្លួនបានយ៉ាងឆាប់រហ័សនៅពេលដែលការផ្លាស់ប្តូរឥតព្រាងទុកណាមួយបានកើតមានឡើងដើម្បីបំពេញតម្រូវការទីផ្សារ និងអតិថិជន។
១០.សម្រេចចិត្តបានភ្លាមៗ និងមានភាពឯករាជ្យ
មុនពេលសម្រេចចិត្ត នាយកប្រតិបត្តិដ៏ឆ្នើមមួយរូប មានភាពវ័យឆ្លាតនៅក្នុងការប្រើប្រាស់ពេលវេលាដ៏ ខ្លីដើម្បីសម្រេចចិត្តប្រកបដោយឯករាជ្យភាពជំនួសឲ្យអនាគតស្ថាប័នទាំងមូលដោយគ្មានភាពស្ទាក់ស្ទើរ ប៉ុន្តែមានប្រសិទ្ធភាព និងឆ្លងកាត់ការវិនិច្ឆ័យបានល្អិតល្អន់។
១១.ពូកែលើកទឹកចិត្ត
នៅក្នុងចំណោមគុណសម្បត្តិនានា នាយកប្រតិបត្តិដ៏ឆ្នើមត្រូវមានភាពប៉ិនប្រសព្វក្នុងការលើកទឹកចិត្តអ្នកដទៃ ជាពិសេសក្រុមការងារនៅក្នុងស្ថាប័នទាំងមូល។ នាយកប្រតិបត្តិរូបនេះគឺជាខ្នងបង្អែកដ៏សំខាន់ក្នុងការផ្តល់ភាពកក់ក្តៅនៅពេលដែលបុគ្គលិកគ្រាប់បង្គាប់ត្រូវការ និងបានផ្តល់អនុសាសន៍ល្អៗពេលពួកគេជួបបញ្ហាផ្សេងៗ។
១២. បង្កើតវប្បធម៌ចែករំលែកការងារ
ក្រៅពីការទទួលខុសត្រូវលើអនាគតក្រុមហ៊ុនទាំងមូល នាយកប្រតិបត្តិដ៏ឆ្នើមមួយរូបគឺត្រូវចេះប្រើគោលការណ៍បែងចែកការងារផ្ទេរទៅតាមផ្នែក និងបុគ្គលិកនីមួយៗ ពោលគឺមិនក្តោបក្តាប់ការងារទាំងមូលមកគ្រប់គ្រងតែម្នាក់ឯងនោះឡើយ។ មិនតែប៉ុណ្ណោះថែមទាំងផ្តល់ភាពជឿជាក់លើក្រុមការងារឲ្យបំពេញភារកិច្ចតាមសមត្ថភាពរៀងៗខ្លួន។
១៣. មានចិត្តសប្បុរស
ចិត្តសប្បុរសធម៌គឺជាគុណសម្បត្តិពិសេសមួយ ទៀតរបស់នាយកប្រតិបត្តិដ៏ឆ្នើម។ ក្រៅពីចំណេះដឹង អ្នកដឹកនាំបែបនេះត្រូវមានក្រមសីលធម៌ល្អ ចេះចែករំលែក យកចិត្តទុកដាក់ចំពោះបុគ្គលិក ដៃគូជំនួញ អតិថិជន និងជាមនុស្សចិត្តទូលាយឲ្យតម្លៃមនុស្សដោយមិនរើសអើង៕
ប្រភព៖ cnbc
