កម្លាំងទាំង ៥ ដែលជះឥទ្ធិពលលើអាជីវកម្មរបស់អ្នក
ចង់ប្រលូកក្នុងអាជីពជាអ្នកជំនួញ ឬចង់ទទួលបានភាពជោគជ័យទាមទារឲ្យអ្នកធ្វើការស្វែងយល់ពីមជ្ឍដ្ឋានជុំវិញខ្លួនឲ្យបានច្រើនដើម្បីងាយស្រួលសម្រប ទប់ទល់ និងប្រកួតប្រជែង។ ដោយឃើញពីភាពចាំបាច់ទាំងនេះសាស្រ្តាចារ្យសាកលវិទ្យាល័យ Harvard លោក Michael Porter បានបង្កើតទ្រឹស្តីមួយដែលបានចេញផ្សាយនៅឆ្នាំ ១៩៧៩ វិភាគទៅលើកំលាំងទាំងប្រាំដែលជះឥទ្ធិពលលើអាជីវកម្មរបស់អ្នក។
១) កត្តាដៃគូប្រកួតប្រជែង÷ មិនថាអ្នកចង់ចាប់ផ្តើមអាជីវកម្មឬអ្នកនៅក្នុងអាជីវកម្មនេះយូរហើយក៏ដោយ ដៃគូប្រកួតប្រជែងមានឥទ្ធិពលខ្លាំងក្នុងការផ្តួលរំលំអ្នកបើអ្នកមិនបានប្រុងប្រយ័ត្ន។ ចំនួននៃដៃគូប្រកួតប្រជែងកាន់តែច្រើនអ្នកកាន់តែពិបាករកកន្លែងឈរជើង។ អ្នកត្រូវដឹងឲ្យច្បាស់ថា÷
ក. អ្នកណាខ្លះជាដៃគូប្រកួតរបស់អ្នក?
ខ. គុណភាពទំនិញឬសេវាកម្មរបស់គេបែបណា?
គ. ការផ្តល់សេវាកម្មរបស់គេទៅដល់អតិថិជនកម្រិតណា?
ឃ. តម្លៃនៃទំនិញឬសេវាកម្មរបស់គូប្រជែងខ្ពស់ឬទាបជាងយើង?
ង. យុទ្ធសាស្ត្រទីផ្សាររបស់គេយ៉ាងណាខ្លះ ក្នុងការទាក់ទាញអតិថិជន?
២) កត្តាអ្នកផ្គត់ផ្គង់÷ ទោះជាអាជីវកម្មប្រភេទណាដាច់ខាតគឺត្រូវការអ្នកផ្គត់ផ្គង់។ ជាពិសេសដូចជាអាជីវកម្មប្រភេទភោជនីយដ្ឋាន សណ្ឋាគារជាដើម បើគ្មានអ្នកផ្គង់ផ្គង់ទេតើអ្នកបន្តអាជីវកម្មអ្នកដោយរបៀបណា? ច្បាស់ណាស់ដែលថាអ្នកផ្គត់ផ្គង់តែងតម្លើងថ្លៃទំនិញដែលត្រូវលក់ឲ្យយើង។ ពេលគេលក់មកឲ្យយើងតម្លៃថ្លៃ វានាំឲ្យថ្លៃដើមផលិតយើងខ្ពស់ យើងក៏ត្រូវបង្កើនថ្លៃលក់ផលិតផលទៅឲ្យអតិថិជនដូចគ្នា។ ដើម្បីចៀសវាងការរះស្ទះដំណើរការអាជីវកម្មដោយសារអ្នកផ្គត់ផ្គង់ក្រឡុកទីផ្សារយើងមិនត្រូវមានអ្នកផ្គត់ផ្គង់ត្រឹមតែមួយឬពីរទេ។ ពេលយើងមានអ្នកផ្គត់ផ្គង់ត្រឹមតែពីរ គេអាចត្រូវរូវគ្នាកំណត់ថ្លៃខ្ពស់ធ្វើបានយើង។ យើងគប្បីរកអ្នកផ្គត់ផ្គង់យ៉ាងតិចបីឬបួន ព្រោះថាបើអ្នកផ្គត់ផ្គង់មួយឬពីរតម្លើងថ្លៃឬខកខានការផ្គត់ផ្គង់របស់គេក៏មិនមានអ្វីរាំងស្ទះដល់អាជីវកម្មរបស់យើងដែរ។
៣) កត្តាអតិថិជន÷ ធម្មតាការរកទទួលទានគឺការលក់ផលិតផលទំនិញឬសេវាកម្មទៅឲ្យអតិថិជន។ អាជីវកម្មជោគជ័យពេលអ្នកអាចលក់ទៅឲ្យអតិថិជនបានកាន់តែច្រើន។ ដូច្នេះអ្វីដែលយើងត្រូវដឹងពីអតិថិជនយើងគឺ÷
ក. ចំនួនអតិថិជនរបស់អ្នក
ខ. អ្នកណាជាអតិថិជនគោលដៅរបស់អ្នក
គ. ទំហំ ឬចំនួនផលិតផលដែលពួកគេនឹងទិញ
ឃ. ប្រភេទផលិតផលដែលអតិថិជនដែលអ្នកត្រូវការ តើខុសពីផលិតផលដៃគូប្រកួតប្រជែងយើងឬទេ
ង. កម្រិតតម្លៃដែលអតិថិជនត្រូវការ
ច. ផលិតផលជំនួសដែលពួកគេងាយទទួលយកក្រៅពីផលិតផលយើង
៤) កត្តាអ្នកចូលប្រលូកថ្មីក្នុងអាជីវកម្ម÷ យើងដឹងថាអ្នកទើបនឹងប្រលូកក្នុងអាជីវកម្មមានហានិភ័យច្រើនដែលងាយនឹងដួលរលំ ក៏ប៉ុន្តែកុំភ្លេចថាពួកគេអាចនឹងមានគំនិតអាជីវកម្មថ្មីៗដែលជាហេតុអាចស្រូបទាញអតិថិជនពីយើង ព្រោះមនុស្សតែងចូលចិត្តសាកល្បងអ្វីថ្មីៗដូចគ្នា។ ពួកគេអាចនឹងមានជំនាញនិងចំនេះដឹងច្បាស់លាស់ដើម្បីឈានជើងចូលទីផ្សារមួយនេះ។ ដើម្បីទប់ទល់ជាមួយអ្នកប្រលូកទីផ្សារថ្មីនេះអ្នកគួរចេះអភិវឌ្ឍខ្លួនជានិច្ច តាមឲ្យទាន់បច្ចេកវិទ្យា និងសិក្សាអ្វីថ្មី។
៥) កត្តាផលិតផលជំនួស÷ ដូចដែលបានលើកឡើងហើយថាអតិថិជនតែងចង់សាកល្បងអ្វីថ្មីៗ ទោះផលិតផលខ្លះមិនមែនជាផលិតផលថ្មី តែការដែលបរិភោគអាហារឬប្រើប្រាស់ផលិតផលដដែលមួយចំនួនក៏អាចមានការធុញទ្រាន់ ដូចនេះអតិថិជនអាចនឹងងាកទៅរកផលិតផលជំនួស។ បើយើងមិនប្រុងប្រយ័ត្នរក្សាគុណភាពផលិតផលឬសេវាកម្មរបស់យើងឲ្យល្អទេ យើងនឹងប្រឈមនឹងការបាត់បង់អតិថិជននៅថ្ងៃណាមួយមិនខាន។
ដោយ÷ ទីន ម៉ាទីយ៉ា
ប្រភព÷ Michael E. Porter, March 1979. Copyright © 1979 by the Harvard Business School Publishing Corporation; all rights reserved.
