គន្លឹះសំខាន់ៗ ១២យ៉ាងដើម្បីក្លាយជាអ្នកធ្វើបទបង្ហាញដ៏ពូកែម្នាក់
អ្នករាល់គ្នាប្រាកដជាធ្លាប់ចូលរួមសិក្ខាសាលា វគ្គសិក្សានានាច្រើនមកហើយ ពិសេសជីវិតជានិស្សិតនៅសាកលវិទ្យាល័យចៀសមិនផុតពីការធ្វើបទបង្ហាញ (presentation) រហូតដល់ពេលអ្នកចេញធ្វើការ ការធ្វើបទបង្ហាញនៅតែសំខាន់ដើម្បីឲ្យអ្នកទទួលបានជោគជ័យក្នុងអាជីពការងារអ្នក។ មនុស្សភាគច្រើនតែងមានការព្រួយបារម្ភនៅរាល់ពេលត្រូវធ្វើបទបង្ហាញម្តងទោះពេលនៅរៀន ឬធ្វើបទបង្ហាញពីការងារ ពួកគេខ្លាចថាធ្វើមិនបានល្អ ខ្លាចភ្លេច ខ្លាចភ័យពេកនិយាយមិនចេញ។ ដូច្នេះដើម្បីអាចអភិវឌ្ឍខ្លួនជាអ្នកធ្វើបទបង្ហាញដ៏ល្អម្នាក់ អ្នកអាចរៀនតាមគន្លឹះ ១២ ចំនុចខាងក្រោមនេះ៖
១) ស្រាវជ្រាវពីប្រធានបទរបស់អ្នក៖
វាសំខាន់ណាស់ដែលអ្នកត្រូវធ្វើការស្រាវជ្រាវ ប្រមូលព័ត៌មានទាំងអស់ពាក់ព័ន្ធនឹងប្រធានបទរបស់អ្នក។ អ្នកត្រូវក្តាប់ឲ្យបានរាល់ព័ត៌មានពីអំពីអ្វីដែលអ្នកគួរដឹងដើម្បីធ្វើបទបង្ហាញ។ ការយល់ច្បាស់អំពីប្រធានបទរបស់អ្នកធ្វើឲ្យអ្នកមានទំនុកចិត្តក្នុងខ្លួន។
២) ធ្វើការរៀបចំ៖ រៀបចំចំនុចណាដែលសំខាន់ ដាក់ជាគោលៗក្នុងការធ្វើបទបង្ហាញ ចៀសវាងការដាក់នូវអត្ថបទ ឬប្រយោគពេញ។ បើខ្លាចភ្លេចអ្នកអាចត្រៀមជាក្រដាសតូចមួយកត់ចំនុចសំខាន់ៗនោះ ជាជាងការលើកក្រដាសទាំងផ្ទាំងមកមើលហើយអានតាម។ ការធ្វើបទបង្ហាញមិនមែនជាការអានទាំងដុលនោះទេ តែគឺជាការច្បិចយកចំណុចសំខាន់ៗមកនិយាយប្រាប់ទៅកាន់អ្នកទស្សនា។ ការអានទាំងដុលលើផ្ទាំងបទបង្ហាញធ្វើឲ្យអ្នកទស្សនាធុញទ្រាន់ ដូចនេះត្រូវចេះសង្វេបចំណុចសំខាន់ៗឲ្យបានល្អ។
៣) ប្រើរូបភាព៖ មិនមែននៅក្នុងការបង្ហាញត្រូវដាក់តែអក្សរឲ្យគេអានទេ តែអ្នកគួរប្រើជារូបភាពសំដៅលើចំនុចសំខាន់ណាមួយដើម្បីទាក់ទាញអ្នកស្តាប់។ អក្សរតែមួយមុខមិនអាចទាក់ចិត្តអ្នកទស្សនាបានទេ ប៉ុន្តែអ្នកគួរតែបន្ថែមរូបភាពដែលពាក់ពន្ធនឹងប្រធានបទរបស់អ្នក ដើម្បីទាក់ចិត្តអ្នកទស្សនា។ រូបភាពធ្វើឲ្យអ្នកទស្សនាចងចាំបានច្រើនជាងអក្សរ។
៤) សាកល្បង៖ ត្រូវចាំថាការធ្វើបទបង្ហាញមួយត្រូវធ្វើឡើងមានរយៈពេលកំណត់ អ្នកមិនត្រូវទន្ទេញឲ្យចាំគ្រប់ចំនុចទេ តែត្រូវប្រាកដថាអ្នកយល់ពីប្រធានបទរបស់អ្នកច្បាស់ ហើយសាកធ្វើវាមុនពេលការធ្វើបទបង្ហាញពិតប្រាកដយ៉ាងតិច ៣ដង។ យកល្អសាកធ្វើវាហើយយកមិត្តភក្តិ ឬក្រុមគ្រួសារអ្នកជាអ្នកស្តាប់ដើម្បីឲ្យគាត់ជួយកែលម្អចំនុចខ្វះខាត។ ដើម្បីទទួលបានលទ្ធផលល្អប្រសើរ អ្នកត្រូវអនុវត្ត ហាត់សមឲ្យបានច្រើនតាមដែលអាចធ្វើទៅបាន។ ដូចជាពាក្យគេនិយាយថា Pratice makes perfect។
៥) ប្រឈមនឹងបញ្ហាឲ្យហើយ៖ ពិតណាស់មុនធ្វើបទបង្ហាញម្តងៗម្នាក់គឺធុញថប់ (stress) ខ្លាំងណាស់។ គួរសម្រាកខ្លះដើម្បីបានអារម្មណ៍ល្អៗ គ្រប់គ្រងអារម្មណ៍ដើម្បីកុំឲ្យតានតឹងពេក។ ទទួលយកភាពខ្មាស់អៀនពីអ្នកស្តាប់ឲ្យហើយមុនធ្វើបទបង្ហាញ។ បន្ថែមពីនេះ ការធ្វើបទបង្ហាញគឺធ្វើឲ្យអ្នកមានភាពឈមទៅនឹងសំនួរជាច្រើនពីអ្នកទស្សនា ដូចនេះអ្នកគួរតែរៀនប្រឈមមុខតាមរយៈការស្រាវជ្រាវបន្ថែមពីប្រធានបទរបស់អ្នកឲ្យច្បាស់សិន។
៦) រៀបចំខ្លួនឲ្យមានភាពទាក់ទាញ៖ មិនមែនឲ្យអ្នកតែងខ្លួនដូចតារាទេ តែសំលៀកបំពាក់ត្រូវឲ្យសមរម្យតាមប្រភេទប្រធានបទ។ ពេលអ្នករៀបចំខ្លួនបានល្អគ្រាន់តែអ្នកស្តាប់ឃើញក៏ធ្វើឲ្យគេចង់ស្តាប់ការធ្វើបទបង្ហាញរបស់យើងដែរ។
៧) ការសំលឹងភ្នែក៖ សំលឹងទៅកាន់អ្នកស្តាប់ មើលភ្នែកគ្រប់គ្នា ចំនុចនេះសំខាន់ណាស់ វាបង្ហាញពីភាពក្លាហាន ការយកចិត្តទុកដាក់របស់អ្នក។ មនុស្សភាគច្រើនណាស់ដែលខ្លាចចំពោះការប្រើភ្នែកសំលឹងពេលគេកំពុងនិយាយ គេអាចអៀនខ្មាស ឬពេលខ្លះ ចង់ស្លន់ក៏មាន។ ទម្លាប់ធ្វើវាឲ្យហើយទៅបើអ្នកចង់ជោគជ័យហើយមានទំនាក់ទំនងល្អច្រើនជាមួយមនុស្សជុំវិញខ្លួន។ ដូចនេះ ការប្រើប្រាស់ក្រសែភ្នែកគឺពិតសំខាន់ណាស់។
៨) និយាយច្បាស់៖ ប្រើពាក្យសម្តីច្បាស់ៗមួយៗ កុំនិយាយលឿនពេក ឬយឺតពេក និយាយដោយក្លាហាន ទោះអ្នកភ័យក៏ត្រូវសម្រួលអារម្មណ៍ឲ្យល្អដែរ។
៩) ភ្ជាប់ខ្លួន ចូលរួមជាមួយអ្នកស្តាប់៖ អ្នកមិនមែនមានភារកិច្ចត្រឹមធ្វើបទបង្ហាញប្រជានបទមួយឲ្យអ្នកស្តាប់ទេ តែអ្នកជាអ្នកចែករំលែករវាងអ្នកនិងអ្នកស្តាប់ អាចបើកឱកាសឲ្យអ្នកស្ដាប់សួរសំនួរដើម្បីប្តូរបរិយាកាសខ្លះ។
១០) សំនួរ ចម្លើយ៖ រាល់ការធ្វើបទបង្ហាញមិនថាតូចឬធំត្រូវមានសំនួរចម្លើយនៅពេលបញ្ចប់។ មិនប្រាកដទេថាអ្វីដែលអ្នកបាននិយាយ អ្នកស្តាប់អាចយល់ទាំងអស់ ឬពេលខ្លះគាត់អាចមានសំនួរបន្ថែមចង់ដឹង ហើយវាក៏ជារឿងល្អដើម្បីបង្កើនចំនេះដឹងទាំងអស់គ្នា។ ត្រូវចាំថាមិនមែនគ្រប់សំនួរអ្នកត្រូវឆ្លើយឲ្យបាននោះទេ បើមានចំនុចណាអ្នកមិនដឹងប្រាប់តាមត្រង់ថាយើងខ្វះចន្លោះចំនុចនេះ។ ទោះជាយ៉ាងណាអ្នកបើសំនួរនៅក្នុងរង្វង់ប្រធានបទអ្នកអាចឆ្លើយបានយ៉ាងតិចបំផុតក៏ ៨០%ដែរ។
១១) រៀនពីបទពិសោធន៍៖ មានន័យថាពេលបញ្ចប់ អាចសួរទៅអ្នកដឹកនាំ អ្នកគ្រប់គ្រង លោកគ្រូ សាស្រ្តាចារ្យ ឬមិត្តភក្តិហើយស្នើសុំមតិរិះគន់ពីពួកគេដើម្បីមកវិញដើម្បីកែលំអពេលក្រោយ។ ការរៀនសូត្រដ៏ខ្លាំងគឺការរៀនពីកំហុសរបស់ខ្លួន។
១២) ចូលរួមក្នុងការស្តាប់បទបង្ហាញ៖ មិនមែនជាបទបង្ហាញរបស់ខ្លួនផ្ទាល់ទេ តែគួរចំណាយចូលរួមបទបង្ហាញផ្សេងដើម្បីទទួលចំនេះដឹងនិងអត្ថប្រយោជន៍ពីអ្នកធ្វើបទបង្ហាញដទៃទៀត។ ការធ្វើបទបង្ហាញគឺជាការរៀនស្ដាប់ រៀនមើលអ្នកធ្វើបទបង្ហាញល្បីៗក្នុងប្រទេសឬក្រៅប្រទេស។ ទោះបីអ្នកមិនមានពេលវេលាចូលរួមកម្មវិធីធ្វើបទបង្ហាញផ្ទាល់ តែអ្នកអាចរៀនសូត្រតាមវីដេអូលើ YouTube ជាច្រើនដែលសុទ្ធតែវាគ្មិនលំដាប់ពិភពលោក៕ រៀនច្រើន មើលច្រើន ចេះច្រើន៕
ដោយ៖ យ៉ាយ៉ា
