ចង់ដឹងឬអត់? តើថ្នាក់ដឹកនាំមានយុទ្ធសាស្ត្ររបៀបណាក្នុងការធ្វើរឿងលំបាកឲ្យទៅជាស្រួលដូចបកចេកបាន?
អ្នកដឹកនាំគឺមិនត្រឹមតែជាមនុស្សចាំជំរុញទឹកចិត្តឲ្យកូនចៅនៅពីក្រោមឲ្យធ្វើការងារឲ្យបានល្អប៉ុណ្ណោះទេ តែអ្នកដឹកនាំក៏ជាមនុស្សដែលតែងតែមានការសម្រេចចិត្ត ដ៏ល្អបំផុតទៅលើការងារនីមួយៗដែរ។ ពេលខ្លះការសម្រេចចិត្តនោះវាពិតជាលំបាកសម្រាប់អ្នកណាស់ តែហេតុអីគេនៅតែធ្វើវាបានដោយងាយ ៗ ទៅវិញ? បើអ្នកដឹងពីយុទ្ធសាស្ត្រខ្លះៗ នោះអ្នកនឹងសម្រេចចិត្តបានងាយស្រួលជាងពីមុនៗ ដូចមេរបស់អ្នកធ្វើដែរហើយ។ តើមានអ្វីខ្លះទៅ?
១) កុំស្មុគស្មាញលើរឿងដែលមិនសំខាន់៖
ពេលខ្លះបើអ្នកគិតច្រើនពេក មិនថារឿងនោះតូចឬធំយ៉ាងណា វានឹងក្លាយទៅជាការសម្រេចចិត្តដ៏ស្មុគស្មាញសម្រាប់អ្នក។ កាលណាដែលចាប់ផ្ដើមដោយភាពស្មុគស្មាញហើយ អ្នកនឹងចង់ឈប់ភ្លាមតែម្ដង ដោយសារអស់ផ្លូវដើរ។ វិធីជួយកាត់បន្ថយការសម្រេចចិត្តដែលលំបាកៗ នោះគឺអ្នកគួរតែបែងចែកឲ្យដាច់ថាតើអ្វីទៅដែលអ្នកគួរចំណាយពេលគិតពីវា។ បើសិនជារឿងនោះមិនសូវជាចាំបាច់ ចូរកុំផ្ដោតអារម្មណ៍ខ្លាំងពេកនាំតែទាល់ខ្លួនទេ។
២) ត្រូវប្រៀបប្រដូចបញ្ហាក្រុមហ៊ុនឲ្យដូចជាបញ្ហាមិត្តភ័ក្ដិអ្នក៖
ពេលធ្វើការឲ្យក្រុមហ៊ុនគឺអ្នកមានសម្ពាធខ្លាំងណាស់ក្នុងការសម្រេចចិត្តលើអ្វីមួយ ព្រោះថា បើហ៊ានតែភ្លាត់ស្នៀតបន្តិចអ្នកអាចនាំបញ្ហាធំៗមិនខាន។ តែបើអ្នកសាកបម្លែងបញ្ហានោះ ទៅជាបញ្ហារបស់មិត្តភ័ក្ដិអ្នកវិញ តើអ្នកមានដំណោះស្រាយបែបណា? គិតថាវាជាបញ្ហារបស់មិត្តភ័ក្ដិគឺវាងាយស្រួលជាងការគិតថាបញ្ហានេះគេជាបញ្ហារបស់ក្រុមហ៊ុន។ ពេលខ្លះអ្នកមានយោបល់ល្អជាងក្នុងការដោះស្រាយបញ្ហាមិត្តភ័ក្ដិ ជាងបញ្ហាក្រុមហ៊ុន។
៣) បង្កើតពេលវេលាជាក់លាក់មួយក្នុងការសម្រេចចិត្តរបស់អ្នក៖
បើអ្នកសម្រេចចិត្តអ្នកគួរចំណាយពេល៦ខែក្នុងការគិតលើកិច្ចការណាមួយ អ្នកត្រូវតែចំណាយពេលឲ្យត្រឹម៦ខែ។ បើមិនកំណត់ពេលឲ្យច្បាស់ទេនោះ អ្នកនឹងពន្យារការសម្រេចចិត្តនោះ រហូតគ្មានថ្ងៃបញ្ចប់ ហើយវានឹងពន្យារពេលកិច្ច ការងាររហូតគ្មានពេលឈប់។
៤) បំបែករឿងឲ្យតូចៗសិនដើម្បីងាយស្រួលសម្រេចចិត្ត៖ បើរឿងនោះវាធំ នឹងទូទៅសម្រាប់អ្នកពេក វានឹងពិបាកបន្តិចហើយក្នុងការរិះរកផ្លូវដើរ។ តែបើអ្នកបំបែកបញ្ហាធំ ឲ្យក្លាយទៅជាតូច តូចហើយតូចទៀត ទាល់តែរកឃើញដំណោះស្រាយ ហើយវានឹងផ្ដល់គន្លឹះៗ តាមផ្នែកនីមួយៗ សម្រាប់អ្នកមិនខាន៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ entrepreneur.com
