តើ​ការ​រៀន​នៅ​មហាវិទ្យាល័យ​ពិត​ជា​មានតម្លៃ​​ណាស់មែនទេ?​



នេះ​​គឺ​ជា​សំនួរ​មួយ​ដែល​កំពុង​ចាក់ដោត​នៅ​ក្នុង​ពេល​បច្ចុប្បន្ន​នេះ​។ នៅ​ខាងក្រោម​នេះ អ្នក​នឹង​បាន​ស្វែងយល់​បាន​យ៉ាង​លម្អិត​ទាក់ទង​ទៅ​នឹង​ប្រធានបទ​នេះ​ដែល​ថា តើ​ការ​អប់រំ​នៅ​មហាវិទ្យាល័យ​ពិត​ជា​មានតម្លៃ​ ឬ​យ៉ាងណា?

១.បើ​យោង​តាម​ការ​អះអាង​របស់​ធនាគារ​កណ្ដាល​អាមេរិក​បាន​បង្ហាញ​ថា ការ​អប់រំ​​នៅ​មហាវិទ្យាល័យ​ពិត​ជា​មាន​តម្លៃ​មែន
​ជាការពិត​​ថ្លៃ​ចំណាយ​លើ​​ការ​សិក្សា​នៅ​​ថ្នាក់​មហាវិទ្យាល័យ​​បាន​កើន​ឡើង​ជា​រៀងរាល់​ឆ្នាំ ហើយ​​បំណុល​របស់​និស្សិត​ក៏​កើន​ឡើង​ដែរ។ យ៉ាងណាមិញ ការ​ស្រាវជ្រាវ​របស់​ធនាគារ​កណ្តាល​​អាមេរិក​បាន​និយាយ​ថា ការ​សិក្សា​​​​នៅ​មហាវិទ្យាល័យ​នៅតែ​ជា​ការ​វិនិយោគ​ដ៏​ល្អ​​មួយ​។ សញ្ញាប័ត្រ​ដែល​សិស្ស​និស្សិត​ទទួល​បាន​ បាន​ជួយ​​ឲ្យ​​ពួកគេ​ទទួល​បាន​​ប្រាក់​ខែ​​​ខ្ពស់​ជាង​អ្នក​​ដែល​មិន​​មាន​សញ្ញាប័ត្រ។ ស្ថាប័ន​នេះ​បាន​បន្ថែម​ទៀត​ថា ជា​មធ្យម​និស្សិត​ដែល​បាន​បញ្ចប់​ថ្នាក់​មហាវិទ្យាល័យ អាច​រក​ចំណូល​បាន​ ៧៨ ០០០ ដុល្លារ​ក្នុង​មួយ​ឆ្នាំ បើ​ប្រៀបធៀប​ទៅ នឹង​អ្នក​មិន​មាន​សញ្ញាប័ត្រ​ដែល​រក​ប្រាក់​ចំណូល​បាន​ត្រឹម ៤៥ ០០០ ដុល្លារ​ និង ៣៣ ០០០ ដុល្លារ​សម្រាប់​អ្នក​ដែល​រៀន​ចប់​ត្រឹម​ថ្នាក់​វិទ្យាល័យ។

២.ប៉ុន្តែ​មាន​ករណី​លើកលែង​ផង​ដែរ
យ៉ាងណាក៏ដោយ ធនាគារ​កណ្តាល​អាមេរិក​ក៏​បាន​អះអាង​ផង​ដែរ​ថា ប្រសិន​បើ​អ្នក​រៀន​បាន​ត្រឹមតែ ២៥% នៃ​កម្មវិធី​សាលា បោះបង់​ការ​សិក្សា ឬ ចំណាយ​ពេល​រៀន​ច្រើន​ជាង​ ៤​ឆ្នាំ​ ផលប្រយោជន៍​ដែល​អ្នក​ទទួល​បាន​ពី​ការ​អប់រំ​នៅ​ថ្នាក់​មហាវិទ្យាល័យ​​​នឹង​មិន​​ល្អ​ដូច​អ្វី​ដែល​អ្នក​រំពឹង​ទុក​នោះ​ឡើយ។

៣.យ៉ាងណាក៏ដោយ វា​ក៏​អាស្រ័យ​ផង​ដែរ​លើ​​ប្រភេទ​មហាវិទ្យាល័យ​ដែល​អ្នក​រៀន
វា​មាន​ការ​ពិបាក​ក្នុង​ការ​និយាយ​ទូទៅ​អំពី​ពាក្យ​ថា "មហាវិទ្យាល័យ" នៅ​ពេល​ដែល​​វា​មាន​​ច្រើន​ប្រភេទ​ផ្សេងៗ​គ្នា។ ឧទាហរណ៍​មាន​ មហាវិទ្យាល័យ​របស់​ក្រុមហ៊ុន​ឯកជន មហាវិទ្យាល័យ​សាធារណៈ ​របស់​រដ្ឋ  វិទ្យាស្ថាន និង​សាលា​បណ្ដុះបណ្ដាល​​ជា​ច្រើន​ទៀត។ គុណ​តម្លៃ​តិច ឬ​ច្រើន មាន​ឬ​អត់ គឺ​អាស្រ័យ​ផង​ដែរ​លើ​គុណភាព​​​ដែល​អ្នក​ទទួល​បាន​ពី​​សាលា​ដែល​អ្នក​រៀន។

៤.ស្ថានភាព​របស់​មនុស្ស​ម្នាក់ គឺ​​​ផ្សេងៗ​គ្នា
វា​ជា​រឿង​ពិបាក​ក្នុង​ការ​និយាយ​ថា ការ​រៀន​នៅ​មហាវិទ្យាល័យ "ត្រឹមត្រូវ​សម្រាប់​អ្នក​" ពី​ព្រោះ​និស្សិត​ម្នាក់ៗ​មាន​ស្ថានភាព​ខុសៗគ្នា។ មនុស្ស​ម្នាក់ៗ​ស្ថិត​នៅ​ក្នុង​កាលៈទេសៈ​​ ស្ថានភាព​រស់នៅ ស្ថានភាព​ហិរញ្ញវត្ថុ ឬ​ក្នុង​លក្ខខណ្ឌ​មួយ​រៀងៗ​ខ្លួន។ នៅ​ពេល​អ្នក​យល់​ឃើញ​​ថា រៀន​មុខវិជ្ជា​​មួយ​សំខាន់​​ ឬ​ធ្វើ​ឲ្យ​អ្នក​​​​​រក​លុយ​បាន​ច្រើន អ្នក​នឹង​ហ៊ាន​ចំណាយ​លុយ​ដើម្បី​រៀន​មុខវិជ្ជា​នោះ​ ហើយ​​ការ​រៀន​នៅ​មហាវិទ្យាល័យ​ពិត​ជា​សំខាន់​សម្រាប់​អ្នក​។ ប៉ុន្តែ​ប្រសិន​បើ​អ្នក​​មាន​សមត្ថភាព​អាច​រក​លុយ​ ឬ​មាន​វិធី​ធ្វើ​ឲ្យ​អ្នក​អាច​ទទួល​បាន​ចំណេះដឹង​ច្រើន​ជាង​នៅ​សាលា នោះ​ការ​រៀន​នៅ​មហាវិទ្យាល័យ វា​មិនមែន​ជា​​រឿង​ចាំបាច់​សម្រាប់​​អ្នក​នោះ​ទេ។ ​​​​អ្នក​ខ្លះ​ទៀត ​​បើក​ជំនួញ​ជោគជ័យ​​ដោយ​មិន​ចាំបាច់​រៀន​ថ្នាក់​មហាវិទ្យាល័យ។ នេះ​មានន័យ​ថា កាលៈទេសៈ​មនុស្ស​មាន​រៀងៗ​ខ្លួន ហើយ​វា​អាស្រ័យ​លើ​ការ​សម្រេចចិត្ត និង​ជម្រើស​ដែល​​​មនុស្ស​ម្នាក់ៗ​ជ្រើសរើស។

៥.មុខវិជ្ជា​ និង​​អាជីព​របស់​អ្នក​ពិត​ជា​រឿង​សំខាន់​ខ្លាំង​ណាស់
នៅ​ពេល​អ្នក​ចាប់​ផ្តើម​ចូលរៀន​ថ្នាក់​មហាវិទ្យាល័យ វា​អាច​ជា​រឿង​លំបាក​សម្រាប់​​អ្នក​​ដើម្បី​ឲ្យ​ប្រាកដ​ថា តើ​គួរ​ជ្រើសរើស​មុខវិជ្ជា​ណាមួយ​មក​រៀន​ និង​​ជោគជ័យ​ក្នុង​អាជីព​ការងារ​​នៅ​ពេល​អនាគត​? ប្រសិន​បើ​មុខវិជ្ជា​ដែល​អ្នក​ជ្រើសរើស​​ជា​ចំណង់ចំណូលចិត្ត​របស់​អ្នក មាន​ទីផ្សារ​ខ្ពស់​ អាច​​ធ្វើ​ឲ្យ​អ្នក​រក​លុយ​បាន​ច្រើន នោះ​ឱកាស​ជោគជ័យ​របស់​អ្នក​ក៏​ច្រើន។ ដូចនេះ ពាក្យ​ថា រៀន​មហាវិទ្យាល័យ​មិន​មាន​តម្លៃ​ជា​រឿង​មួយ​មិន​អាច ទទួល​យក​បាន។ យ៉ាងណាមិញ ប្រសិន​បើ​មុខ​ជំនាញ​របស់​​អ្នក​​មិន​អាច​យក​ទៅ​អនុវត្ត​បាន មិន​អាច​​ឲ្យ​អ្នក​ទាញ​យក​ផលប្រយោជន៍​ច្រើន​ពី​វា​បាន​ទេ​ នោះ​មានន័យ​ថា ការ​ចំណាយ​ពេល​ ៤ ឆ្នាំ​របស់​អ្នក​​នៅ​ថ្នាក់​មហាវិទ្យាល័យ​បញ្ចប់​ទៅ​ដោយ​ការ​ដើរ​ទាត់ខ្យល់។

៦.កុំ​ធ្វើ​តាម​អ្វី​ដែល​អ្នក​ផ្សេង​ទៀត​កំពុង​ធ្វើ
ហេតុ​អ្វី? ពីព្រោះ​ថា មនុស្ស​ម្នាក់ៗ​មាន​គោលដៅ ផ្លូវ​ដែល​ត្រូវ​ទៅ ស្ថានភាព និង​ក្តី​សុបិន​ខុសគ្នា។ អ្នក​​សម្រេចចិត្ត​ធ្វើ​អ្វី​មួយ​​ស្តាប់​តាម​បេះដូង​របស់​អ្នក។ អ្នក​​ផ្សេង​ធ្វើ​អ្វី​មួយ​តាម​​តម្រូវការ​របស់​គេ។ អ្នក​គឺ​ជា​អ្នក​គ្រប់គ្រង ដឹកនាំ និង​​កំណត់​ជោគវាសនា​របស់​អ្នក។ គ្មាន​អ្នកណា​ម្នាក់​មក​ឈឺឆ្អាល យកចិត្ត​ទុកដាក់ និង​បារម្ភ​អ្នក​ជាង​ខ្លួន​អ្នក និង​គ្រួសារ​របស់​អ្នក​ឡើយ។ ​​​​​​ភាព​ជោគជ័យ​ បរាជ័យ ឬ​គុណ​តម្លៃ​​ក្នុង​ការ​សិក្សា អាជីព​ការងារ ស្នេហា ។ល។ គឺ​មានតែ​អ្នក​ប៉ុណ្ណោះ​ដែល​ដឹង​ច្បាស់​ជាង​អ្នកណា​ទាំងអស់៕

ប្រភព៖ Forbes

X
5s