៥ គន្លឹះសម្រាប់អ្នកដែលមានអាជីវកម្មជាលក្ខណៈគ្រួសារគួរដឹង
អាជីវកម្មជាលក្ខណៈគ្រួសារ គឺជាអាជីវកម្មដ៏ពេញនិយម និងកំពុងរួមចំណែកយ៉ាងសំខាន់ដល់សេដ្ឋកិច្ចជាតិ។ មិនដឹងថា អ្នកកំពុងប្រកបមុខរបរអ្វី រយៈពេលយូរប៉ុណ្ណា ឬមានគន្លឹះដឹកនាំរបៀបណា អ្នកគួរត្រៀមខ្លួនទុកជាមុនថា អ្នកត្រូវបង្កើតគំរូដឹកនាំអាជីវកម្មមួយដែលមានស្តង់ដារ និងដើរបានវែងឆ្ងាយ ព្រមទាំងឈរជើងបានយូរអង្វែងនៅលើទីផ្សារ។
នៅខាងក្រោមនេះ អ្នកអាចសិក្សាពីគន្លឹះខ្លះៗដែលអ្នកគួរដឹងប្រសិនបើអ្នកកំពុងមានអាជីវកម្មជាលក្ខណៈគ្រួសារ៖
១.កំណត់ពីគុណសម្បត្តិអាជីវកម្មតាមបែបគ្រួសារ
គុណសម្បត្តិដ៏គួរឲ្យទាក់ទាញបំផុតមួយនៅក្នុងអាជីវកម្មដែលគ្រប់គ្រងជាលក្ខណៈក្រុមគ្រួសារថា វាមានភាពឆាប់រហ័ស និងងាយស្រួលក្នុងការសម្រេចចិត្ត។ ការសម្រេចចិត្តក្នុងអាជីវកម្មរបស់អ្នកកាន់តែឆាប់រហ័ស គឺថាតើ វាសំអាងទៅទិន្នន័យជាក់ស្តែង ទំនាក់ទំនងជាមួយអតិថិជន ឬអ្វីមួយផ្សេងទៀត។ មានការសិក្សាស្រាវជ្រាវជាច្រើនបានលើកឡើងថា ពីគុណសម្បត្តិនៃអាជីវកម្មជាលក្ខណៈគ្រួសារនេះដូចខាងក្រោម៖
-ឆាប់រហ័ស៖ នៅក្នុងអាជីវកម្មជាលក្ខណៈគ្រួសារ ការសម្រេចចិត្តមិនសូវចំណាយពេលយូរទេ ពោលគឺធ្វើឡើងភ្លាមៗ តែម្តងដោយមិនចាំបាច់ស្នើសុំឆ្លងតាមដំណាក់កាល នីតិវិធី ឬ លក្ខខណ្ឌផ្សេងៗដូចក្រុមហ៊ុនធំៗដើម្បីអនុម័តយល់ព្រមលើសំណើអ្វីមួយនោះឡើយ។ ទន្ទឹមនឹងនេះ ល្បឿននៃការផ្លាស់ប្ដូរក្រុមហ៊ុនទៅមុខ ឬថយក្រោយ ក៏មិនពិបាកសាំញ៉ាំ ច្រើនដែរ។
-ស្ថិរភាព៖
មានក្រុមហ៊ុនជាច្រើនបានតស៊ូយ៉ាងលំបាកដើម្បីឈរជើងយូរនៅ លើទីផ្សារ ខណៈដែលពិភពលោកមានការផ្លាស់ប្ដូរឥតឈប់ឈរ។ សម្រាប់អាជីវកម្មដែលមានលក្ខណៈជាគ្រួសារវិញ ការឈរជើងយូរនៅលើទីផ្សារមិនមែនជាបញ្ហាចោទខ្លាំងនោះ។ ឆ្លងកាត់ការដឹកនាំប្រកបដោយបទពិសោធន៍រាប់ទសវត្សរ៍ បានធ្វើឲ្យម្ចាស់គ្រប់គ្រងអាជីវកម្មប្រភេទនេះបានដឹកកិច្ចការផ្ទៃក្នុង កន្លុកកន្លៀត ស្គាល់ពីបញ្ហាប្រឈម យុទ្ធសាស្ត្រ និងបានសម្របខ្លួនក្លាយជាអ្នកជំនាញត្រួតត្រាក្រុមហ៊ុនបានយ៉ាងល្អ។
-ការប្ដេជ្ញាចិត្ត៖ សម្រាប់អាជីវកម្មដែលមានលក្ខណៈជាគ្រួសារ គឺមានចំណុចពិសេសបើគេនិយាយពីការប្ដេជ្ញាចិត្ត និងគណនេយ្យភាពនៅក្នុងក្រុមហ៊ុន។ អ្នកបន្តវេនពីអាជីវកម្មប្រភេទនេះ អាចទទួលខុសត្រូវ និងត្រូវបានបង្ហាត់បង្រៀនលត់ដំទាំងចំណេះដឹង និងការអនុវត្តឲ្យស្ទាត់ជំនាញជាមុនរួចទៅហើយដើម្បីប្ដេជ្ញាចិត្តដឹកនាំក្រុមហ៊ុនបន្តទៀតដែលខុសពីក្រុមហ៊ុនទូទៅ ដែលអ្នកដឹកនាំបានផ្លាស់ប្ដូររាប់ភ្លេច។
-ចក្ខុវិស័យ៖ គ្មានអ្វីដែលធ្វើឲ្យអ្នកសប្បាយរីករាយស្មើនឹងការបានមនុស្សជាច្រើនដែលសម្រេចដើរលើទំព័រជីវិត និងទិសដៅដូចគ្នាទៅនឹងអ្នកនោះទេ។ ដូច្នេះកេរ្តិ៍ដំណែលនៃគុណតម្លៃ និងចក្ខុវិស័យរួមគ្នាជាមួយនឹងការប្ដេជ្ញាចិត្តសម្រាប់រយៈពេលវែង គឺជាអ្វីដែលអាចផ្លាស់ប្ដូរអ្នកដែលពាក់ព័ន្ធក្នុងអាជីវកម្មប្រភេទនេះ។ គោលដៅនៃអាជីវកម្មជាលក្ខណៈគ្រួសារមិនមែនគ្រាន់តែធ្វើ ឡើងដើម្បីជោគជ័យតែមួយមុខប៉ុណ្ណោះទេ ប៉ុន្តែវាក៏ជាជីវកម្មដែលមានគំរូម៉ូដែលដឹកនាំគ្រប់គ្រងដ៏ល្អមួយសម្រាប់មនុស្សជំនាន់ក្រោយផងដែរ។
២.ប្រកាន់គោលការណ៍សមភាព
យកគោលការណ៍អនុវត្តដោយសម្អាងលើវ័យចាស់ជាង ធ្វើការយូរជាង ឬរៀនបានច្រើនជាង មិនមែនជាគោលការណ៍ឈ្នះៗនៅក្នុងអាជីវកម្មរបស់អ្នកនោះឡើយ។ អ្នកត្រូវផ្តល់តម្លៃទៅលើគុណសម្បត្តិនៃចំណេះជំនាញ បទពិសោធន៍ល្អ និងការខិតខំប្រឹងប្រែងរបស់សមាជិកម្នាក់ៗនៅ ក្នុងក្រុមហ៊ុន។ ជួនកាលជ័យជំនះដ៏ធំមួយនៅក្នុងក្រុមហ៊ុនអាចនឹងបានមកពីសមាជិកក្រុមណាម្នាក់ ហើយពេលផ្សេងទៀតវាអាចនឹងបានមកពីអ្នកផ្សេងទៀត។ កុំដាក់កម្រិតសមត្ថភាពរបស់សមាជិកក្រុមដើម្បីសម្រេចបានផលជាវិជ្ជមានដល់ក្រុមហ៊ុនដោយគ្រាន់តែសម្អាងលើអាយុ ឬការចំណាយពេលនៅ បានយូរជាមួយក្រុមហ៊ុន។
៣.ផ្តល់សិទ្ធិអំណាចដល់អ្នកបន្តវេន
គ្មានអ្នកណាម្នាក់អាចនៅអមតៈបានទេ។ អាជីវកម្មរបស់អ្នកក៏ដូចគ្នា ថ្ងៃណាមួយបើទោះបីជាអ្នកដឹកនាំល្អប៉ុណ្ណាក៏ដោយ អ្នកក៏គង់តែត្រូវការអ្នកណាម្នាក់មកដឹកនាំ បន្តវេន។ អ្នកទាំងនោះអាចជាប្រពន្ធ ឬប្តី កូន ចៅ និងអ្នកផ្សេងទៀតដែលជាសាច់ញាតិរបស់អ្នក។ ដូចនេះហើយវាជារឿងសំខាន់ដែលអ្នកត្រូវទទួលយកការផ្លាស់ប្ដូរនេះ ហើយត្រៀមខ្លួនជាមុនឲ្យបានល្អដើម្បីបង្ហាត់បង្រៀនពួកគេជាមុនសម្រាប់បន្តវេនពីអ្នក។
៤.ភាពច្នៃប្រឌិត
វាមិនមែនជារឿងមួយហួសហេតុនោះទេដែលអ្នកចាំបាច់ត្រូវប្រែក្លាយក្រុមហ៊ុនរបស់អ្នកឲ្យក្លាយទៅជាក្រុមហ៊ុនជំនួញមួយដែលដើរបានវែងឆ្ងាយ និងស្មុគស្មាញជាងនេះ។ អ្នកត្រូវបដិសេធន៍នោះទេ និងត្រូវផ្តល់ឱកាសដល់អ្នកជំនាន់ថ្មី ប្រសិនបើពួកគេមានសក្ដានុពល មានគំនិតច្នៃប្រឌិតថ្មី ឬគំនិតថ្មីដើម្បីដឹកនាំក្រុមហ៊ុនរបស់អ្នកពីអាជីវកម្មជាលក្ខណៈគ្រួសារឲ្យឲ្យទៅជាប្រភេទក្រុមហ៊ុនផ្សេងទៀតដែលកាន់តែរីកចម្រើនជាងនេះ។ ថ្វីត្បិតតែក្រុមហ៊ុនរបស់អ្នកជាលក្ខណៈគ្រួសារ ប៉ុន្តែអ្នកត្រូវទទួលស្គាល់ និងឲ្យតម្លៃលើការច្នៃប្រឌិត និងគំនិតថ្មីៗដើម្បីដើរឲ្យទាន់បរិបទសាកលលោក។
៥.បែងចែកឲ្យដាច់រវាងបញ្ហាអាជីវកម្ម និងគ្រួសារ
នៅក្នុងអាជីវកម្មណាក៏ដោយ ជម្លោះនឹងកើតមានឡើងតិចឬច្រើន។ យ៉ាងណាមិញ អ្នកមិនត្រូវបណ្តាលឲ្យរឿងគ្រួសារ មកគ្របដណ្ដប់លើបញ្ហាជំនួញបានទេ។ ប្រសិនបើអ្នកមានទំនាស់ក្នុងអាជីវកម្ម អ្នកត្រូវដោះស្រាយតាមមធ្យោបាយបែបអាជីវកម្ម។ ប្រសិនបើ អ្នកមានទំនាស់នៅក្នុងគ្រួសារ អ្នកត្រូវដោះស្រាយតាមលក្ខណៈគ្រួសារ ពោលគឺអ្នកមិនត្រូវធ្វើឲ្យរឿងគ្រួសារមកលាយឡំរឿងជំនួញឡើយ។ អ្នកត្រូវដឹងថា ទំនាស់គ្រួសារអាចកើតឡើង និងបញ្ចប់ ទៅវិញនៅក្នុងរយៈពេលខ្លី ប៉ុន្តែរឿងជំនួញវិញ អ្នកត្រូវប្រើពេល ចំណាយកម្លាំង ការតស៊ូ និងអត់ធ្មត់ច្រើនណាស់ទម្រាំបានដូចសព្វថ្ងៃ។ ដូច្នេះ អ្នកត្រូវចេះបែងចែកឲ្យដាច់រវាងចំណុចទាំងពីរនេះ៕
ប្រភព៖ Entrepreneur
