សញ្ញាណ ៦ចំណុច បញ្ជាក់ថា មិត្តរួមការងាររបស់អ្នកមិនមានទំនុកចិត្តមកលើអ្នក
តើអ្នកធ្លាប់មានអារម្មណ៍ថា តម្លៃរបស់អ្នកត្រូវបានមើលរំលងនៅកន្លែងការងារដែរឬទេ? ការពិតទៅអារម្មណ៍បែបនេះវាសុទ្ធតែឆ្លុះបញ្ចាំងឲ្យឃើញថា ភាពកក់ក្ដៅរបស់អ្នកនៅកន្លែងការងារកំពុងស្ថិតនៅលើកន្លងផ្លូវគ្មានសុវត្ថិភាព។ នេះជាបញ្ហាដែលត្រូវដោះស្រាយជាបន្ទាន់ ជាពិសេសនៅពេលដែលអ្នកក្លាយជាអ្នកដឹកនាំក្រុមការងារទាំងមូល។
នៅខាងក្រោមនេះ ប្រិយមិត្តនឹងបានរៀនសូត្របន្ថែមទៀតពីសញ្ញាណចំនួន ៧ ដែលបញ្ជាក់ថា ក្រុមការងាររបស់អ្នកមិនបានផ្តល់ទំនុកចិត្តមកលើអ្នក។ សញ្ញាណទាំងនេះវាក៏ជាផ្នែកមួយផងដែរដែលបង្ហាញថា កន្លែងការងាររបស់អ្នកកំពុងមើលរំលងតម្លៃរបស់អ្នក។
១.មាននរណាម្នាក់ត្រួតពិនិត្យមើលការងាររបស់អ្នកឡើងវិញយ៉ាងហោចណាស់ពីរដងឡើងទៅ
សញ្ញាណនៃការមិនផ្ដល់ទំនុកចិត្តអាចកើតមាននៅកន្លែងការងារ ប្រសិនបើមាននរណាម្នាក់នៅក្នុងចំណោមក្រុមការងាររបស់អ្នក ឬចៅហ្វាយរបស់អ្នកយកការងាររបស់អ្នកត្រួតពិនិត្យផ្ទៀងផ្ទាត់ឡើងវិញចាប់ពីពីរដងឡើងទៅ។ នេះជារឿងល្អប្រសិនបើពួកគេព្យាយាមរកកំហុសរបស់អ្នក ហើយកែប្រែកំហុសឆ្គងទាំងនោះ។ ប៉ុន្តែការព្យាយាមស្វែងរកកំហុសរបស់អ្នកពីក្រុមការងារ ហើយពួកគេយកកំហុសនោះធ្វើជាលេសដើម្បីទម្លាក់ការទទួលខុសត្រូវ ឬចង់កាច់កុងអ្នក នេះជាសញ្ញាណមិនល្អឡើយ។
២.អ្នកមិនត្រូវបានផ្ដល់អំណាចគ្រប់គ្រាន់ក្នុងការធ្វើការសម្រេចចិត្តអ្វីមួយ
ប្រសិនបើអ្នកជាអ្នកទទួលខុសត្រូវចំពោះការងារអ្វីមួយ ប៉ុន្តែជារឿយៗ អ្នកត្រូវស្នើសុំការយល់ព្រមជាមុនពីមិត្តរួមការងារដូចគ្នា ដើម្បីធ្វើការងាររបស់អ្នក នោះមានន័យថា ទំនុកចិត្តរបស់អ្នកពីពួកគេកំពុងស្ថិតនៅលើបន្ទាត់ក្រហម។ ទោះជាយ៉ាងណាក៏ដោយប្រសិនបើរឿងនេះកំពុងកើតឡើង សូមប្រញាប់ដោះស្រាយវាដោយបើកចំហជាមួយនរណាម្នាក់ដែលមានអំណាចសមស្របក្នុងការទទួលខុសត្រូវរួមលើការងាររបស់អ្នកដូចជា ប្រធាន ឬចៅហ្វាយរបស់អ្នក។
៣.អ្នកជាបុគ្គលិកចុងក្រោយដែលត្រូវបានគេយកចិត្តទុកដាក់
អ្នកមានអារម្មណ៍ថា ខ្លួនអ្នកជាបុគ្គលិកម្នាក់មានតម្លៃនៅក្នុងចំណោមក្រុមការងារ លុះត្រាតែពួកគេទុកកន្លែងមួយសម្រាប់ឲ្យអ្នកដើរដែរ។ ប៉ុន្តែបើរឿងនេះ វាមិនដែលកើតឡើងទាល់តែសោះគឺមានន័យថា តម្លៃរបស់អ្នកត្រូវបានមើលរំលង ហើយវត្តមានរបស់អ្នកមិនសូវសំខាន់សម្រាប់ពួកគេដែលត្រូវការជួសជុលវាឡើងវិញ។ នេះជាបញ្ហាដែលត្រូវយកចិត្តទុកដាក់ពីព្រោះ អ្នកមិនអាចបំពេញការងារបានល្អប្រសើរបានឡើយប្រសិនបើ អ្នកមិនទទួលបានការផ្តល់តម្លៃ ឬព័ត៌មានគ្រប់គ្រាន់ក្ដាប់នៅក្នុងដៃ។
៤.ពួកគេមិនត្រូវការជំនួយរបស់អ្នក
ការត្រូវបានគេស្នើសុំអ្នកឲ្យជួយផ្ដល់ដំបូន្មាន គឺជាសញ្ញាណល្អមួយ។ វាបង្ហាញថាគំនិតរបស់អ្នកមានតម្លៃសម្រាប់ពួកគេ ហើយអ្នកអាចមានអ្វីប្លែកចេញមកដើម្បីយកមកដាក់លើតុ។ ប៉ុន្តែតើនឹងមានអ្វីកើតឡើងប្រសិនបើគ្មាននរណាម្នាក់ស្នើសុំជំនួយរបស់អ្នក? នេះអាចធ្វើឲ្យអ្នកឆ្ងល់ថាខ្លួនឯងថា តើការវិនិច្ឆ័យរបស់អ្នកល្អដូចអ្វីដែលអ្នកបានគិតដែរឬទេ? ការពិតទៅ ការវិនិច្ឆ័យរបស់អ្នកអាចនឹងល្អ ប៉ុន្តែវាមានចំណុចខ្វះខាតចំណុចណាមួយដែលរារាំងមិនឲ្យក្រុមការងារផ្ដល់ទំនុកចិត្តទាំងស្រុងមកលើអ្នក ឬស្នើសុំជំនួញពីអ្នក។
៥.អ្នកទទួលបានជំនួយតិចតួចប៉ុណ្ណោះពីក្រុមការងារ
អារម្មណ៍ទទួលបានការជួយគាំទ្រនៅកន្លែងការងារ គឺជារឿងអស្ចារ្យណាស់សម្រាប់ធ្វើឲ្យមានភាពពេញចិត្តពេញថ្លើមនៅកន្លែងការងារ។ ផ្ទុយទៅវិញ ប្រសិនបើអ្នកមានអារម្មណ៍ថា នរណាម្នាក់ ឬក្រុមការងារទាំងមូលហាក់ព្រងើយកន្តើយ មិនយកចិត្តទុកដាក់លើការស្នើសុំជំនួយពីអ្នក នោះមានន័យថា ទំនាក់ទំនងរបស់អ្នកនៅកន្លែងការងារកំពុងធ្លាក់ចុះ។ នេះជាបញ្ហាស្នូលមួយដែលមិនគួរកើតមាននៅកន្លែងការងារឡើយ ខណៈដែលការធ្វើការងារជាក្រុមគឺជាមូលដ្ឋានគ្រឹះនៃភាពជោគជ័យរបស់ក្រុមហ៊ុន។
៦.ក្រុមការងារមើលមកអ្នកក្នុងផ្លូវមិនល្អ
នៅចំពោះមុខការងាររបស់អ្នក ប្រសិនបើអ្នកសង្កេតឃើញថា ក្រុមការងាររបស់អ្នកឧស្សាហ៍បង្ហាញអារម្មណ៍អវិជ្ជមាន ការអាក់អន់ចិត្ត និងនិយាយបែបបំពានជះកំហឹងដោយមិនពិចារណាមកលើអ្នកនៅពេលពួកគេមិនយល់ស្រប ឬមិនពេញចិត្តនឹងការងាររបស់អ្នក នោះវាជាសញ្ញាណមួយដែលបញ្ជាក់ថា អ្នកមិនទទួលបានភាពជឿជាក់ពីពួកគេទេ។ ខណៈដែលការរិះគន់ក្នុងន័យកែលំអស្ថាបនា និងការលើកទឹកចិត្តជាគ្រឹះមួយក្នុងចំណោមគ្រឹះផ្សេងទៀតដើម្បីភាពរីកចម្រើនរបស់ក្រុមហ៊ុន រូបភាពនេះមិនឆ្លុះបញ្ចាំងពីភាពធ្វើការងារជាក្រុមនៅកន្លែងការងារឡើយ៕
ដោយ៖ ណារិន
ប្រភព៖ Inc
