ខ្សែប្រយុទ្ធ Fernando Torres បាននិយាយថា ការឈ្នះពាន Champions League នៅ Atletico Madrid នឹងលើសពីអ្វីដែលធ្លាប់ឈ្នះនៅ Chelsea កាលឆ្នាំ ២០១២។ TORRES បានបន្តទៀតថា ការលើកពាន Champions League ពេលប៉ះ Real Madrid យប់ថ្ងៃសៅរ៍នេះ (ប្រកួតម៉ោង ១:៤៥ រំលងអាធ្រាត្រ) នៅទឹកដី San Siro របស់ AC Milan នឹងមានអារម្មណ៍ល្អជាងកាលធ្លាប់ធ្វើបាននៅតោខៀវ Chelsea ទៅទៀត។ ការថ្លែងបែបនេះព្រោះថា ខ្សែប្រយុទ្ធ វ័យ ៣២ ឆ្នាំរូបនេះមានបញ្ហាខ្លះៗ នៅ Stamford Bridge ដោយស៊ុតបានត្រឹម ៤៦ គ្រាប់ប៉ុណ្ណោះ។ TORRES ចូលលេងត្រឹមរយៈសល់ ៦នាទីចុងក្រោយប៉ុណ្ណោះ ហើយ មុន Didier Drogba រកគ្រាប់តាមស្មើ Bayern Munich ១-១ និង ឈ្នះពានខាងលើឆ្នាំ ២០១២ ដោយគ្រាប់បាល់ប៉េណាល់ទីកាត់សេចក្ដី។ តែពេលនេះ Torres ត្រូវលេងទល់នឹងគូបដិបក្ខចាស់ Real Madrid ដែលធ្លាប់ឈ្នះ AT ៤-១ នាវគ្គផ្ដាច់ព្រ័ត្រ ឆ្នាំ ២០១៤។ អតីតខ្សែប្រយុទ្ធ Liverpool រូបនេះបញ្ជាក់ថា «គ្មានការសង្ស័យនោះឡើយ ហើយ នេះជាជំនួបដ៏សំខាន់ដែលខ្ញុំលេងក្នុងអាជីពរបស់ខ្ញុំ គឺពាននេះហើយ។ ខ្ញុំកើតមកជា អ្នកគាំទ្រ Atletico Madrid និងចាប់ផ្ដើមលេងនៅទីនេះអាយុ ៥ ឆ្នាំ។» «ការពិតបានឈ្នះWorld Cup និង ឈ្នះពាន EURO ពីរដងជាមួយ អេស្ប៉ាញ និងសំណាង ឈ្នះ Champions League នៅ Chelsea តែ ឈ្នះ Real Madrid យប់នេះនឹងមានអារម្មណ៍ផ្សេងគ្នា»។