គន្លឹះ ៥យ៉ាងដើម្បីក្លាយជាអ្នកលក់ឆ្លាតវៃ
ដើម្បីក្លាយជាអ្នកលក់ដ៏ពូកែម្នាក់ ត្រូវការធាតុរួមផ្សំជាច្រើន ហើយគន្លឹះទាំង ៥យ៉ាងខាងក្រោមនេះអាចជាទុនគំនិតមួយជួយអ្នកឱ្យក្លាយលក់ដ៏ឆ្លាតវៃម្នាក់បាន។
១) ឈ្វេងយល់តម្រូវការស្នូលរបស់អតិថិជន៖
នេះជាចំណុចសំខាន់បំផុតដែលអ្នកលក់គួរធ្វើ។ លោកអ្នកត្រូវឈ្វេងយល់ពីតម្រូវការស្នូលអតិថិជនរបស់អ្នកឱ្យបានច្បាស់ថាតើពួកគេចង់បានអ្វីឱ្យពិតប្រាកដ។ ត្រូវឆ្លាតក្នុងការស្វែងរកផលិតផល និងរបៀបបង្ហាញវាឱ្យទាក់ចិត្តអតិថិជន។ លោកអ្នកដឹងកាន់តែច្រើនអំពីការចង់បានរបស់អតិថិជន លោកអ្នកនឹងមានឱកាសខ្ពស់ក្នុងការលក់ទំនិញនោះ។
២) បន្ធូរបន្ថយការបារម្ភរបស់អតិថិជនតាមរយៈការលើកឧទាហរណ៍ជាក់ស្ដែង៖
អតិថិជនតែងមានការបារម្ភជានិច្ចនៅពេលដែលពួកគេចង់ទិញផលិតផលអ្វីមួយ ជាពិសេសផលិតផល ឬសេវាកម្មដែលមានលក្ខណៈស្មុគស្មាញ។ ពួកគេអាចនឹងបារម្ភថា វានឹងអាចមានអ្វីកើតឡើងក្រោយពីប្រើប្រាស់មួយរយៈពេល។ អតិថិជនខ្លះទៀតអាចនឹងស្ទាក់ស្ទើរ មិនហ៊ានសម្រេចចិត្តទិញព្រោះបារម្ភថា មិនចេះប្រើ។ ដូច្នេះលោកអ្នកគួរលើកយកឧទាហរណ៍ដែលមានសាច់រឿងប្រហាក់ប្រហែលគ្នាមកពន្យល់ដល់អតិថិជន។
៣) ដំបូងលក់តិចសិន៖
នៅពេលដែលតម្លៃក្លាយជាបញ្ហាដែលគួរឱ្យបារម្ភចំពោះអតិថិជនរបស់អ្នក លោកអ្នកគួរស្វែងយល់ពីកម្រិតនៃថវិការបស់អតិថិជនដែលអាចមានលទ្ធភាពទិញបាន។ បើទំនិញរបស់អ្នកមានតម្លៃថ្លៃ ការលក់ដំបូងកុំរំពឹងខ្ពស់ពេក ហើយបើផលិតផលរបស់អ្នកមានច្រើនប្រភេទ ច្រើនសន្ធាន អ្នកគួរពិចារណាលក់បរិមាណតិចសិនទៅកាន់អតិថិជន ហើយនាពេលក្រោយបន្ទាប់ពីមានទំនុកចិត្តមកលើផលិតផលរបស់អ្នកហើយ គឺអាចលក់ក្នុងបរិមាណច្រើន។
៤) ពន្យល់ពីគុណវិបត្តិបើសិនអតិថិជនមិនទិញផលិតផលរបស់អ្នក៖
ក្រៅពីលក្ខណៈពិសេសនៃផលិតផល ឬសេវាកម្មរបស់អ្នក លោកអ្នកអាចនឹងពន្យល់ពីគុណវិបត្តិ ឬការសោកស្ដាយបើសិនជាអតិថិជនមិនសម្រេចចិត្តទិញទំនិញ ឬផលិតផលរបស់អ្នកនោះទេ។ ឧទាហរណ៍ពួកគេអាចនឹងចំណាយពេលច្រើនដើម្បីស្វែងរកផលិតផលប្រភេទនេះ ផលិតប្រហែលគ្នានេះអាចនឹងថ្លៃ គុណភាពអន់ជាងនេះ មិនត្រូវនឹងតម្រូវការក្រុមហ៊ុនជាដើម -។ល។
៥) អប់រំ ឬណែនាំអតិថិជនរបស់អ្នក៖
បើអតិថិជននៅតែស្ទាក់ស្ទើរក្នុងការទិញផលិតផល ឬសេវាកម្មរបស់អ្នក លោកអ្នកគួរតែព្យាយាមណែនាំបន្ថែមទៀតពីគុណតម្លៃ ឬចំណុចពិសេសនៃផលិតផលរបស់អ្នក។ ព្យាយាមប្រៀបធៀបផលិតផលរបស់អ្នកទៅនឹងដៃគូប្រកួត បើសិនជាអតិថិជនប្រៀបធៀបមុន។ ការណែនាំឬបង្ហាញបានល្អ ឬនិយាយដោយខ្លីគឺពន្យល់ចាក់ចំបេះដូងរបស់អតិថិជន នោះអតិថិជនអាចនឹងសម្រេចចិត្តទិញ៕
ដោយ៖ រតនៈវិភូ
