ហេតុអ្វីដើម្បីជោគជ័យ អ្នកគួរលក់ទេពកោសល្យ មិនមែនលក់ពេលវេលា?
សុភាសិតខ្មែរពីបុរាណតែងពោលថា "នៅពេលអ្នកចេះពិតប្រាកដ ប្រាក់នឹងរត់តាមហោប៉ៅមិនខាន"។ ចូរលក់ទេពកោសល្យរបស់អ្នក មិនមែនពេលវេលារបស់អ្នកនោះទេ។ អ្នកធ្វើការដ៏វៃឆ្លាតបំផុត និងមានប្រសិទ្ធភាពខ្ពស់បំផុត គឺជាបុគ្គលដែលប្រើប្រាស់ចំណេះដឹង និងជំនាញរបស់ពួកគេដើម្បីរកលុយឲ្យពួកគេ និងប្រើប្រាស់ពេលវេលារបស់ពួកគេតិចតួចបំផុត។
អ្នកក៏គួរតែយល់ឲ្យច្បាស់ផងដែរពីអត្ថន័យនៃពាក្យថា "ប្រសិទ្ធភាព" គឺជាលទ្ធផលនៃការងារដែលមានគុណភាពខ្ពស់ ដោយប្រើប្រាស់ពេលវេលាតិចបំផុតតាមដែលអាចធ្វើទៅបាន។ ការបំពេញការងារប្រកបដោយការខិតខំប្រឹងប្រែងខ្លាំង និងការបំពេញការងារប្រកបដោយភាពឆ្លាតវៃ គឺជារឿងពីរខុសប្លែកពីគ្នាជាខ្លាំង។ រវាងបរិមាណនិងគុណភាព រាល់បុគ្គលដែលបំពេញការងារប្រកបដោយការខិតខំប្រឹងប្រែងខ្លាំង នឹងផលិតបាននូវបរិមាណការងារច្រើន ក៏ព្រោះតែពួកគេបានបូជាពេលវេលាជាច្រើនដើម្បីសម្រេចការងារទាំងនោះ ប៉ុន្តែជាមួយនឹងបរិមាណការងារច្រើន គុណភាពការងាររបស់ពួកគេទទួលបានក្នុងកម្រិតទាបទៅវិញ រីឯប្រសិទ្ធភាពការងារវិញក៏នឹងថយចុះបន្តិចម្ដងៗ ទៅតាមចំនួនការងារដែលកើនឡើងនោះដែរ។
ងាកមកគិតត្រិះរិះពីផ្នែកម្ខាងទៀតនៃបុគ្គលដែលបំពេញការងារប្រកបដោយភាពឆ្លាតវៃវិញ ពួកគេចំណាយពេលតែបន្តិចបន្តួចក្នុងការសម្រេចកិច្ចការណាមួយប៉ុណ្ណោះ ប៉ុន្តែការងាររបស់ពួកគេអាចធានាបាននូវគុណភាពខ្ពស់ និងប្រសិទ្ធភាពខ្ពស់ បើទោះជាបរិមាណការងារមានតិចតួចក្ដី។ តើអ្វីជាភាពខុសគ្នាយ៉ាងពិតប្រាកដរវាងអ្នកបំពេញការងារទាំងពីរប្រភេទនេះ? អ្នកទី១ ទទួលបានប្រាក់តបស្នងចំពោះពេលវេលាដែលពួកគេបានបូជាទៅលើលទ្ធផលកិច្ចការរបស់ពួកគេ ហើយពួកគេនឹងត្រូវបានហៅទៅបំពេញកិច្ចការវិញជានិច្ចរៀងរាល់ពេលដែលថ្នាក់លើត្រូវការ ប្រៀបដូចជាអ្នកធ្វើការក្នុងរោងចក្រយ៉ាងដូច្នោះ។ រីឯអ្នកទី២ វិញ ពឹងផ្អែកទៅលើចំណេះ និងជំនាញ និងទេពកោសល្យរបស់ខ្លួន ដើម្បីឲ្យប្រាក់តបស្នងចំពោះលទ្ធផលការងារដែលពួកគេបានធ្វើនោះវិញ។ ថ្នាក់លើមិនហៅគេឲ្យមកធ្វើការគ្រប់ពេលនោះទេ ផ្ទុយទៅវិញ អ្នកដឹកនាំនឹងនិយាយទៅកាន់បុគ្គលប្រភេទនេះថា "ត្រឡប់មករកពួកយើងវិញ នៅពេលអ្នកមានអ្វីដែលត្រូវបង្ហាញមកកាន់ពួកយើង"។
នៅពេលអ្នកមានចំណេះ ជំនាញ និងទេពកោសល្យពិតប្រាកដ ទោះជាត្រូវអស់ប្រាក់ច្រើនប៉ុណ្ណាក៏គេហ៊ានបង់ឲ្យអ្នកដើម្បីទទួលបាននូវការងារដ៏មានគុណភាពរបស់អ្នកដែរ ហើយថ្នាក់លើក៏មិនខ្វល់ឬចាប់អារម្មណ៍ដែរថាតើអ្នកបានបូជាពេលវេលាខ្លួនឯងប៉ុន្មានដើម្បីផលិតការងារសម្រាប់ពួកគេនោះ៕
ប្រែសម្រួល៖ ស្រីពៅ
ប្រភព៖ www.cnbc.com
