​ក្នុង​នាម​ជា​មហាសេដ្ឋី​ដ៏​ជោគជ័យក្នុង​អាជីវកម្ម​ម្នាក់ លោក​​ Warren Buffet ​ត្រូវ​បាន​គេ​​ទទួលស្គាល់​ថា​ ជា​បុគ្គល​​​ដែ​ល​បាន​ចែក​រំលែក​នូវ​ចំណេះដឹង​ ក៏​ដូច​ជា​បទ​ពិសោធន៍​រក​ស៊ី​ជា​ច្រើន​ដល់​សហគ្រិន​​ដ៏​ទៃ​ទៀត។ លោក​ជា​មនុស្ស​ដែល​ចូលចិត្ត​អាន​សៀវភៅ​បំផុត​ព្រោះ​ថា​ កាល​ពី​ពេល​លោក​ចាប់​ផ្ដើម​វិនិយោគ​ដំបូងៗ លោក​ចំណាយពេលអានសៀវភៅក្នុងមួយថ្ងៃៗ​ ៦០០ទំព័រ ឬពេលខ្លះ​​ ៧៥០ទំព័រ ឬជួនកាលរហូតដល់ ១០០០ទំព័រក៏មានដែរ។ 

​មហាសេដ្ឋីរូបនេះក៏បានណែនាំអ្នកដែលចង់ធ្វើជាវិនិយោគិនក្នុងពេលអនាគតឲ្យអានសៀវភៅ ៩ក្បាលដូចខាងក្រោម៖

១ សៀវភៅ "The Intelligent Investor" និពន្ធដោយលោក Benjamin Graham សៀវភៅនេះបានណែនាំដល់អ្នកវិនិយោគិន​អំពី​ ការបណ្ដាក់ទុនដោយជោគជ័យ​ដោយ​មិនចាំតម្រូវឲ្យមានស្ដង់ដារខ្ពស់ ពាណិជ្ជកម្មអស្ចារ្យ ​ នោះទេ ប៉ុន្តែអ្វីដែលចាំបាច់​ គឺ​គំនិតក្នុងការសម្រេចចិត្ត និងចេះគ្រប់គ្រងអារម្មណ៍​ពេល​មាន​ឧបសគ្គ​កើត​ឡើង។    

២ សៀវភៅ "Security Analysis" និពន្ធដោយលោក Benjamin Graham មហាសេដ្ឋី​ដដែល​រូប​នេះ​ធ្លាប់​លើក​ឡើង​ថា​ ​សៀវភៅ​នេះ​បរិយាយ​អំពី​ការ​​សង្កេត​មើល​ពី​ស្ថានភាព​របស់​ក្រុមហ៊ុន។ ពេល​ដែល​អ្នក​វិនិយោគ​ពិនិត្យ​បាន​​គ្រប់​ជ្រុងជ្រោយហើយ គឺ​អាចរកឃើញ​តម្លៃក្រុមហ៊ុនមួយ ហើយបើទីផ្សារមានហើយ តម្លៃក្រុមហ៊ុនក៏មានដែរ។

៣ សៀវភៅ "Common Stocks and Uncommon Profits" និពន្ធដោយលោក Philip Fisher ខ្លឹមសារនៅក្នុងសៀវភៅនេះត្រូវបានលោក Philip Fisher បញ្ជាក់ថា ការកំណត់នៅលើរបាយការណ៍ហិរញ្ញវត្ថុគឺមិនទាន់គ្រប់គ្រាន់ទេ ​តែ​ការ​ផ្ដោតលើការវាយតម្លៃពីការគ្រប់គ្រងរបស់ក្រុមហ៊ុន​គឺ​ជា​រឿង​សំខាន់​ថែម​មួយ​កម្រិត​ទៀត។  

៤ សៀវភៅ "Stress Test: Reflections on Financial Crises" និពន្ធដោយលោក Tim Geithner មហាសេដ្ឋី Buffett បានបញ្ជាក់ថា សៀវភៅរបស់អតីតរដ្ឋមន្ត្រីក្រសួងរតនាគារស្ដីពីវិបត្តិហិរញ្ញវត្ថុរូបនេះគឺអ្នកគ្រប់គ្រងគ្នាត្រូវតែអានជាចាំបាច់។ សៀវភៅជាច្រើនឃើញច្រើនតែសរសេរពីរបៀបគ្រប់គ្រងអង្គការ ឬស្ថាប័នតាមរយៈពេលពេលវេលាតឹងតែង ប៉ុន្តែសៀវភៅរបស់លោក Geithner បានសរសេរពីការដឹកនាំរបស់រដ្ឋាភិបាលតាមរយៈវិបត្តិសេដ្ឋកិច្ច។  

៥ សៀវភៅ "The Essays of Warren Buffett" ជាស្នាដៃរបស់លោក Warren Buffett ខ្លឹមសារក្នុងសៀវភៅរបស់មហាសេដ្ឋី Warren Buffett បានលើកជាសំណួរត្រិះរិះថា នៅក្នុងការប្រកួតគ្នាផ្នែកបញ្ញាស្មារតីមិនថាលេងអុក លេងបៀ ឬក៏លេងភាគហ៊ុនអ្វីនោះទេ តើគេអាចយកឈ្នះលើគូប្រជែងខ្លួនបានយ៉ាងម៉េចកើត បើសិនជាយើងមានគំនិតថា ការគិតច្រើនគឺនាំឲ្យតែខ្ជះខ្ជាយពេលវេលានោះ?  

៦ សៀវភៅ "Jack: Straight From The Gut" សរសេរដោយលោក Jack Welch អ្នកនិពន្ធសៀវភៅនេះត្រូវបានមហាសេដ្ឋី Buffett ចាត់ទុកថាជាអ្នកមានបញ្ញាវៃឆ្លាត និងមានកម្លាំងខ្លាំង។ រីឯខ្លឹមសារក្នុងសៀវភៅនេះវិញគឺ លោក Jack Welch បានផ្ដោតទៅលើការធ្វើពាណិជ្ជកម្មសម័យទំនើបជាហេតុធ្វើឲ្យប្រវត្តិផ្ទាល់ខ្លួនលោកបានក្លាយជាមេរៀនដ៏មានតម្លៃសម្រាប់អ្នកគ្រប់គ្រងស្ទើរតែទាំងអស់។  

៧ សៀវភៅ "The Outsiders" តាក់តែងដោយលោក William Thorndike, Jr. សៀវភៅ Outsiders នេះត្រូវបានលោក Buffett សរសើរថាជាសៀវភៅដ៏ល្អមួយក្បាលនិយាយពីសកម្មភាពធ្វើជំនួញរបស់ក្រុម CEO ដែលបានចាត់ចែងមូលធនបានត្រឹមត្រូវ។  នៅត្រង់ជំពូក១គឺនិយាយពីនាយកម្នាក់ឈ្មោះ Tom Murphy ដែលលោក Buffett និយាយថាគឺជាគ្រប់គ្រងខាងពាណិជ្ជកម្មដ៏ល្អបំផុតដែលលោកមិនធ្លាប់ឃើញពីមុនមក។ មិនតែប៉ុណ្ណោះសៀវភៅនេះក៏បាននិយាយពីការធ្វើពាណិជ្ជកម្មដ៏សំខាន់បំផុតមួយនៅអាមេរិករបស់ទស្សនាវដ្ដី Forbes ផងដែរ៕ ​