«កុំបណ្ដោយឲ្យឥរិយាបថ អ្នកដទៃបំផ្លាញសន្តិភាពផ្លូវចិត្តអ្នកឲ្យសោះ»
«កុំបណ្ដោយឲ្យឥរិយាបថ អ្នកដទៃបំផ្លាញសន្តិភាពផ្លូវចិត្តរបស់អ្នកឲ្យសោះ»។ នេះជាគតិរបស់សម្ដេចសង្ឃដាឡៃឡាម៉ា ដែលក្នុងពំនោលនេះចង់បញ្ជាក់ថា សន្តិភាពផ្លូវចិត្តរបស់អ្នកវាមិនអាស្រ័យលើឥរិយាបថរបស់អ្នកដទៃនោះទេ តែ វាអាស្រ័យលើអ្នក ជាពិសេសថាតើអ្នក ព្រមឲ្យគេចូលមកបំផ្លាញអ្នកដែរឬអត់?
បើសេចក្ដីសុខផ្លូវចិត្តរបស់អ្នក ត្រូវពឹងលើឥរិយាបថរបស់អ្នកដទៃទាំងស្រុងនោះ សូមកុំសង្ឃឹមថា អាចបានសុខឲ្យសោះ ព្រោះអ្នកដទៃតែងមានគំនិតរបស់គេ ហើយសកម្មភាពក៏វាមិនអាចធ្វើឲ្យយើងពេញចិត្តមួយរយភាគរយបានដែរ។ ដូច្នេះ ហើយបើអ្នកពឹងលើសកម្មភាពរបស់អ្នកដទៃ ដើម្បីកំណត់អំពីភាពសុខសាន្តក្នុងចិត្តរបស់អ្នក គឺប្រាកដជាគ្មានផ្លូវឡើយ។ អ៊ីចឹងហើយបានជា សម្ដេចសង្ឃដាឡៃឡាម៉ាបានដាស់តឿនថា ខ្លួនអ្នកគឺជាកត្តាសំខាន់បំផុត ក្នុងការធ្វើឲ្យសេចក្ដីសុខផ្លូវចិត្តរបស់ខ្លួនកើតមាន និង រក្សាបានយូរអង្វែង។ បើដឹងច្បាស់ថា ខ្លួនឯងគឺជាចំណុចសំខាន់នោះ បើទោះបីជាមានរឿងអ្វីក៏ដោយ ក៏មិនអាចធ្វើឲ្យចិត្តរបស់អ្នករងរបួសដោយងាយៗនោះឡើយ៕
