ប្រធាននាយកប្រតិបត្តិនៃធនាគារអេស៊ីលីដា លោកបណ្ឌិត អ៊ិន ចាន់នី៖ «ការកសាងទំនុកចិត្តគឺជាមូលដ្ឋានគ្រឹះនៃភាពរីកចម្រើនយូរអង្វែង»
នៅក្នុងកិច្ចការទំនាក់ទំនង ទំនុកចិត្តគឺកិច្ចការដ៏ចាំបាច់បំផុតដែលបុគ្គលគ្រប់រូប រាប់ទាំងនីតិបុគ្គល ផងដែរ ចាំបាច់ត្រូវធ្វើឱ្យបាន។ ការទុកចិត្តគ្នាគឺជាគន្លឹះដ៏សំខាន់ដែលនាំមកនូវការអភិវឌ្ឍន៍ជានិរន្ត។ ពាក់ព័ន្ធនឹង បញ្ហានេះផងដែរ លោកបណ្ឌិត អ៊ិន ចាន់នី ប្រធាននាយកប្រតិបត្តិនៃធនាគារអេស៊ីលីដា បានលើកឡើងក្នុងកម្មវិធីចែករំលែកនៅផាកកាហ្វេកាលពីដើមចុងខែសីហា កន្លងទៅថា ៖ “ការកសាងទំនុកចិត្តគឺជាមូលដ្ឋានគ្រឹះនៃភាពរីកចម្រើនយូរអង្វែង”។
ចាប់តាំងពីបង្កើតស្ថានប័នហិរញ្ញវត្ថុដំបូង ដែលកាលនោះធនាគារអេស៊ីលីដា គ្រាន់តែ ជាអង្គការក្រៅរដ្ឋាភិបាលមួយប៉ុណ្ណោះ ប៉ុន្តែនាពេលបច្ចុប្បន្ននេះ ធនាគារអេស៊ីលីដា បានក្លាយជាធនាគារពាណិជ្ជ ឈានមុខគេមួយនៅកម្ពុជា។ លោកបណ្ឌិត អ៊ិន ចាន់នី បានសង្កត់ធ្ងន់ថា ការរីកចម្រើនរបស់ស្ថាប័ន គឺពឹងផ្អែកទៅលើការទុកចិត្តក្នុង ចំណោមផ្ទៃក្នុងរបស់ស្ថាប័នរាប់ចាប់តាំងពីម្ចាស់ភាគហ៊ុន ថ្នាក់ដឹកនាំ និង បុគ្គលិកគ្រប់លំដាប់ថ្នាក់។ បន្ថែមលើនេះ ទៅទៀត ស្ថានប័នក៏ទទួលបាននូវទំនុកចិត្តពីសំណាក់អតិថិជនទាំងប្រជាពលរដ្ឋទូទៅ ម្ចាស់សហគ្រាស និង ស្ថាប័នសាធារណៈ ជាអាទិ៍។ ដោយសារការទុកចិត្តនេះហើយ ទើបធនាគារអេស៊ីលីដា បានពង្រឹង និង ពង្រីកខ្លួនកាន់ធំទៅៗ ប្រកប ដោយប្រសិទ្ធិភាព និង តម្លាភាព។ លើសពីនេះទៅទៀត ដោយសារតែទំនុកចិត្ត ធនាគារអេស៊ីលីដាបានក្លាយជា ស្ថាប័នរឹងមាំមួយចាប់តាំងពីពេលដែលបានបង្កើត រហូតមកដល់ពេលបច្ចុប្បន្ន និង បន្តទៅពេលអនាគតទៀតផង។ ដោយសារតែទស្សនវិស័យរបស់ធនាគារអេស៊ីលីដា គឺសំដៅយកទំនុកចិត្តជាចម្បង ទើបពាក្យស្លោករបស់ ស្ថាប័នមួយនេះបានដាក់ថា “ប្រជាធនាគារដែលលោកអ្នកជឿទុកចិត្ត”។ ជាការពិតណាស់ អត្ថន័យនៃពាក្យស្លោក នេះគឺសំដៅដល់ការកសាងនូវទំនុកចិត្តជូនដល់អតិថិជនទាំងឡាយរាប់បញ្ចូលទាំងសហគ្រាសឯកជន និង ស្ថាប័ន សាធារណៈផងដែរ៕
ដោយ៖ ប៉ុម ទូច
