គោលការណ៍ទាំង ៦យ៉ាងរបស់ Dave Meltzer នាយកប្រតិបត្តិ Sports 1 Marketing ធ្វើឲ្យភាពជោគជ័យស្ថិតស្ថេរជាអមត
លោក Dave Meltzer បច្ចុប្បន្នជានាយកប្រតិបត្តិទីភ្នាក់ងារផ្នែកទីផ្សារ ក្នុងវិស័យកីឡា និងកម្សាន្ត Sports 1 Marketing និងជាវាគ្មិននិយាយសាធារណៈ និងជាអ្នកនិពន្ធសៀវភៅដែលលក់ដាច់ទាំងពីរក្បាល Connected To Goodness និង Compassionate Capitalism។ លោក ធ្លាប់មានបទពិសោធន៍ក្លាយជាមហាសេដ្ឋីក្នុងវ័យខ្ទង់ ២០ឆ្នាំ ហើយបន្ទាប់មកក្លាយជាមហាសេដ្ឋីប្រាក់រាប់លានក្នុងវ័យខ្ទង់ ៣០ឆ្នាំ រហូតដល់ក្លាយជាមនុស្សដាច់យ៉ៃ។ ខាងក្រោមនេះ គឺជាការចែករំលែករបស់លោក Dave Meltzer ពីគោលការណ៍ទាំង ៦យ៉ាង ដើម្បីធ្វើឲ្យភាពជោគជ័យរបស់អ្នកស្ថិតស្ថេរជាអមត៖
១) ការដឹងគុណ លោក Dave Meltzer បានមានប្រសាសន៍ថា៖ «ចូរនិយាយពាក្យថា «អគុណ» ជារៀងរាល់ព្រឹក មុនពេលចូលគេងក្នុងរយៈពេល ៣០ថ្ងៃ។ លោកហ៊ានភ្នាល់ថា មានមនុស្សជាច្រើនមិនអាចអនុវត្តវាបាន។ ប៉ុន្តែ ការដឹងគុណគឺពិតជាអាចធ្វើឲ្យអតីតកាលរបស់អ្នកមានភាពត្រចះត្រចង់ បច្ចុប្បន្នភាពមានភាពរីករាយ និងធ្វើឲ្យអនាគតរបស់អ្នកភ្លឺថ្លា។ ការដឹងគុណគឺជាធាតុផ្សំដ៏សំខាន់មួយក្នុងការជួយកាត់បន្ថយស្ត្រេស និងភាពតប់ប្រមល់ក្នុងជីវិតរបស់អ្នក។ ការដឹងគុណក៏នឹងជួយធ្វើឲ្យខួរក្បាលរបស់អ្នកពោរពេញដោយការផ្ដោតអារម្មណ៍ និងមើលឃើញឪកាសល្អៗច្រើនជាងមុន។
២) ការលើកលែងទោស លោក Dave Meltzer បានមានប្រសាន៍ថា៖ មានកំហុសជាច្រើនណាស់ដែលអ្នកបានបង្កើតឡើង។ រឿងខ្លះមិនអាចជៀសវាងបានឡើយ។ អ្នកត្រូវតែចេះលើកលែងទោសឲ្យខ្លួនឯងពីព្រោះថាការលើកលែងទោសធ្វើឲ្យអ្នកមានភាពធូរស្បើយ និងមានភាពសប្បាយរីករាយក្នុងចិត្ត។ ប្រសិនបើអ្នកមិនចេះលើកលែងទោសឲ្យខ្លួនអ្នកទេ នោះអ្នកក៏មិនអាចលើកលែងទោសឲ្យអ្នកដ៏ទៃបានដែរ។ ការអនុគ្រោះទោសទៅលើកំហុសរបស់អ្នក គឺជាគន្លឹះក្នុងការឈានឆ្ពោះទៅមុខ និងផ្ដោតទៅលើឧបសគ្គក្នុងពេលបច្ចុប្បន្ននិងភាពដែលអាចទៅរួច។ ប្រសិនបើអ្នកផ្ទុកទៅដោយវិប្បដិសារី និងអារម្មណ៍មិនពេញចិត្ត វត្ថុទាំងអស់នេះនឹងយកទីតាំងសេចក្ដីសុខផ្លូវចិត្តរបស់អ្នកជាមិនខាន។ ដូចនេះ ការចេះអធ្យាស្រ័យឲ្យអ្នកដ៏ទៃ និងខ្លួនអ្នកគឺវាមានជាប់ទាក់ទងជាមួយនឹងបញ្ញាផ្លូវអារម្មណ៍របស់អ្នក។
៣) ទំនួលខុសត្រូវ លោក Dave Meltzer បានមានប្រសាន៍ថា៖ អ្នកត្រូវតែមានទំនួលខុសត្រូវក្នុងជីវិតរបស់អ្នក បើទោះបីជាមានរឿងអ្វីកើតឡើងក៏ដោយ។ ប្រសិនបើអ្នកជាមនុស្សដែលមានទំនួសខុសត្រូវ នោះអ្នកអាចគ្រប់គ្រងដំណើរជីវិតរបស់អ្នកបានហើយ។ ភាពអាត្មានិយម គឺកើតចេញពីការបន្ទោសអ្នកដទៃ ឬបន្ទោសស្ថានការណ៍ខាងក្រៅនៅពេលមានបញ្ហាកើតឡើង។ ភាពអាត្មានិយម គឺជាការយកមុខយកមាត់នៅពេលដែលលទ្ធផលវិជ្ជមានកើតឡើង។ ការរក្សាតុល្យភាពជីវិតរបស់អ្នក និងអាជីវកម្មរបស់អ្នកចាប់ផ្ដើមនៅពេលដែលអ្នកមានទំនួលខុសត្រូវ ១០០ភាគរយ ទៅលើលទ្ធផលដែលអ្នកបង្កើតឡើង។
៤) ការបន្តខិតខំប្រឹងប្រែងរបស់អ្នកស្មើនឹងការបង្កើតភាពរីករាយឲ្យខ្លួនឯង លោក Dave Meltzer បានមានប្រសាសន៍ថា៖« វាមិនមែនជាលទ្ធផលដែលអ្នកបង្កើតឡើងនោះទេ តែវាជាការខិតខំតស៊ូប្រឹងប្រែងដោយប្រើប្រាស់សក្ដានុពលរបស់អ្នកដែលអ្នកមានទៅវិញនោះទេដែលនឹងនាំអ្នកឆ្ពោះទៅកាន់ភាពជោគជ័យនៃជីវិត និងអាជីវកម្មរបស់អ្នក។ គ្មានលទ្ធផលណាដែលអាចបំពេញសេចក្ដីពេញចិត្តរបស់អ្នកបាននោះទេ ប្រសិនបើកិច្ចការដែលអ្នកធ្វើនោះវាស្រួលពេក។ ភាពលំបាកនឹងធ្វើឲ្យអ្នកកាន់តែរីកចម្រើន ធ្វើឲ្យអ្នកបន្តរៀនសូត្រ និងធ្វើឲ្យអ្នកចាកចេញពីស្ថានភាពសាមញ្ញដ៏ដែលៗ ហើយភាពលំបាកនឹងជួយអភិវឌ្ឍអ្នកឲ្យមានការផ្លាស់ប្តូររបត់ជីវិតថ្មីរបស់អ្នក។ ភាពសប្បាយរីករាយគឺកើតចេញការតស៊ូប្រឹងប្រែង ព្យាយាម និងការអត់ធ្មត់របស់អ្នក។
៥) ភាពរីករាយមិនមែនកើតចេញពីលទ្ធផល១០០%នោះទេ លោក Dave Meltzer បានមានប្រសាន៍ថា៖ «ភាពជោគជ័យ មិនមែនជាផ្ទាំងក្រណាត់ស និងខ្មៅនោះទេ។ រៀនផ្លាស់ប្តូរខ្លួនអ្នកពីលទ្ធផល ហើយបន្តភាពរីករាយជាមួយនឹងអ្វីដែលអ្នកកំពុងធ្វើ»។ អ្នកដែលសម្រេចបានសមិទ្ធិផលខ្ពស់ៗ ចូលចិត្តវាស់ស្ទង់លទ្ធផលរបស់គេ និងមានទំនោរម្យ៉ាង គឺគេដាក់លទ្ធផលនិងការខិតខំប្រឹងប្រែងរបស់គេរួមជាមួយគ្នា។ ពួកគេផ្តោតទៅលើការខិតខំប្រឹងប្រែង នឹងអបអរសាទរខ្លួនគេ នៅពេលដែលគេបានសម្រេចសមិទ្ធិផលទាំងនោះ។
៦) ភាពអត្មានិយម ភាពអាត្មានិយមរបស់មនុស្សម្នាក់ៗ គឺជាការចង់បានភាពត្រឹមត្រូវរៀងៗខ្លួន។ ចិត្តរបស់អ្នកចង់បានភាពខ្ពស់មុខខ្ពស់មាត់។ វាគឺជាអារម្មណ៍ចង់លេចធ្លោរតែឯង និងចង់ឲ្យគេទទួលស្គាល់។ ការបំបាត់ភាពអាត្មានិយម ធ្វើឲ្យអ្នកមានទំនាក់ទំនងកាន់តែល្អ ជាមួយមនុស្សជុំវិញខ្លួន។ ដើម្បីរកឲ្យឃើញ ភាពពេញចិត្ត ភាពសប្បាយរីករាយ និងភាពសុខដុមរមនា អ្នកត្រូវផ្លាស់ប្ដូរវិធីសាស្ត្រ ហើយខិតខំធ្វើវារហួតដល់សម្រេចភាពជោគជ័យរបស់អ្នក។ ប្រសិនបើអ្នកចង់បានភាពធូរស្បើយផ្លូវអារម្មណ៍ និងភាពជោគជ័យ អ្នកត្រូវបោះបង់គំនិតដែលថា ទាល់តែលទ្ធផលល្អឥតខ្ចោះទើបធ្វើឲ្យអ្នកសប្បាយរីករាយនោះចោលទៅ។ មិនត្រូវបណ្ដោយខ្លួនអ្នកឲ្យពឹងផ្អែកទាំងស្រុងទៅលើលទ្ធផលនោះទេ ប៉ុន្តែអ្នកត្រូវធ្វើចិត្តឲ្យសប្បាយរីករាយពីការខិតខំប្រឹងប្រែងដែលកើតចេញពីសក្ដានុពលក្នុងខ្លួនរបស់អ្នក។ ជីវិត គឺជាបទពិសោធន៍។ ឈប់បណ្ដែតបណ្ដោយឲ្យភាពអត្មានិយមលងបន្លាចអ្នក និងឈរបាំងផ្លូវនៃភាពសប្បាយរីករាយតទៅទៀតទៅ។ ផ្ដោតទៅលើការដឹងគុណនៃអ្វីដែលបានកើតឡើងក្នុងអតីតកាល បច្ចុប្បន្នភាព និងអនាគត។ ការដឹងគុណគឺជាអារម្មណ៍ដែលអ្នកចង់បាន ដែលវានឹងធ្វើឲ្យអ្នកមានអារម្មណ៍ស្រស់ស្រាយក្នុងជីវិត៕
ដោយ៖ លង់ វណ្ណៈ ប្រភព៖ addicted2success.com
