ក្រសួងពាណិជ្ជកម្មនឹងរៀបចំពិព័រណ៍ "យុទ្ធនាការទិញផលិតផលខ្មែរ" នៅខេត្តព្រៃវែង
ដើម្បីជាយុទ្ធសាស្រ្តជួយជម្រុញ និងលើកកម្ពស់ផលិតផលក្នុងស្រុកឲ្យកាន់តែមានការទទួលស្គាល់ និងប្រើប្រាស់កាន់តែច្រើនឡើងពីសំណាក់ប្រជាជនខ្មែរទូទាំងប្រទេស ក្រសួងពាណិជ្ជកម្មនឹងរៀបចំពិព័រណ៍ពាណិជ្ជកម្មផលិតផលខ្មែរ "យុទ្ធនាការទិញផលិតផលខ្មែរ" ដែលនឹងប្រព្រឹត្តទៅចាប់ពីថ្ងៃទី២៨ មិថុនា ដល់ថ្ងៃទី០១ កក្កដា ឆ្នាំ២០១៨ ត្រូវនឹងថ្ងៃព្រហស្បតិ៍ ១រោច ដល់ថ្ងៃអាទិត្យ៤រោច ខែបឋមាសាឍ ឆ្នាំច សំរិទ្ធិស័ក ព.ស២៥៦២ នៅក្រុងព្រៃវែង ខេត្តព្រៃវែង។ គោលបំណងក្នុងការរៀបចំពិព័រណ៍នេះឡើងគឺដើម្បីពញ្ញាក់ស្មារតីមហាជនទូទៅ ឲ្យងាកមកគាំទ្រនិងប្រើប្រាស់ផលិតផលក្នុងស្រុក និងដើម្បីប្រមូលផលិតផលខ្មែរដែលមានគុណភាពខ្ពស់ មានការវេចខ្ចប់ត្រឹមត្រូវ អនុវលោមតាមស្ដង់ដារផលិតកម្មទូទាំងប្រទេសមកដាក់តាំងបង្ហាញ និងស្វែងរកដៃគូលក់បន្ត។ តាមរយៈសេចក្ដីប្រកាសព័ត៌មាន ក្រសួងពាណិជ្ជកម្មកំពុងអញ្ជើញសាធារណៈជនទូទៅ ពិសេសលោក-លោកស្រី ដែលមានបំណងចូលរួមតាំងបង្ហាញផលិតផលខ្មែរក្នុងព្រឹត្តិការណ៍នេះ សូមប្រញ៉ាប់រួសរាន់មកដាក់ពាក្យចូលរួមព្រោះចំនួនមានកំណត់៕ ដោយ៖ ស្រីរ័ត្ន
