លក្ខណៈ៣យ៉ាងដែលអ្នកមានបំណងចង់កសាងក្រុមដ៏ល្អទាំងឡាយ មិនគួរមើលរំលង
ការកសាងក្រុមដ៏ល្អមួយមិនមែនជារឿងងាយស្រួលនោះឡើយ។ វាត្រូវការពេលវេលា ហើយអ្វីដែលសំខាន់បន្ថែមពីលើទេពកោសល្យ នោះគឺជាការប្ដេជ្ញាចិត្តរបស់អ្នកដឹកនាំ និងសមាជិកក្រុមទាំងអស់គ្នា។ ខាងក្រោមនេះគឺជាលក្ខណៈ៣យ៉ាងដែលអ្នកមានបំណងកសាងក្រុមដ៏ល្អទាំងឡាយមិនគួរមើលរំលង៖
១) ការខិតខំតស៊ូ៖ បើទោះជាអ្នកមានសមាជិកក្រុមដែលពោរពេញដោយទេពកោសល្យក៏ដោយ ប៉ុន្តែបើសិនជាពួកគេគ្មានការខិតខំតស៊ូទេនោះ នោះសមាជិកក្រុមរបស់អ្នកនឹងមិនអាចដើរបានផ្លូវវែងឆ្ងាយជាមួយគ្នានោះឡើយ។ អ្វីៗមិនមែនចេះតែប្រព្រឹត្តទៅបានរលូនសមតាមបំណងរបស់អ្នករហូតនោះទេ។ ហេតុនេះនៅពេលមានឧបសគ្គលេចឡើងមុខ អ្នកត្រូវមានសមាជិកក្រុមដែលមានការខិតខំតស៊ូប្រឹងប្រែងបំពេញកិច្ចការឲ្យដល់គោលដៅ បូករួមជាមួយនឹងទេពកោសល្យដែលពួកគេមាន នោះទើបជោគជ័យអាចធានាសម្រាប់ក្រុមរបស់អ្នកបាន។
២) តុល្យភាព៖ មនុស្សយើងច្រើនតែចូលចិត្តធ្វើអ្វីៗដោយមានការលំអៀង។ បើអ្នកចេះធ្វើឲ្យជីវិតនិងការងាររបស់សមាជិកក្រុមរបស់អ្នកមានតុល្យភាព នោះពួកគេនឹងអាចសម្រេចកិច្ចការរបស់ពួកគេបានល្អជាក់ជាពុំខាន។ អ្នកមិនត្រូវសម្លឹងឃើញតែប្រយោជន៍ចំពោះមុខនោះឡើយ។អ្នកត្រូវចេះធ្វើយ៉ាងណាដើម្បីឲ្យតុល្យភាពនេះមានប្រយោជន៍ដល់រូបភាពធំរបស់អ្នក និងប្រយោជន៍ក្នុងរយៈពេលវែងរបស់អ្នក។
៣) គោលបំណង៖ នៅពេលដែលមនុស្សយើងធ្វើអ្វីមួយដោយភ្ជាប់ជាមួយនឹងគោលបំណងជាក់លាក់ក្នុងចិត្ត នោះពួកគេនឹងមានការប្ដេជ្ញាចិត្តដើម្បីសម្រេចវាឲ្យបាន ហើយវានឹងជំរុញពួកគេឲ្យខិតខំធ្វើការ ព្រោះពួកគេដឹងថាអ្វីដែលខ្លួនកំពុងធ្វើនឹងរួមចំណែកដល់ភាពជោគជ័យរបស់គោលដៅធំនៅថ្ងៃណាមួយមិនខាន៕
ដោយ៖ ស្រីពៅ
