យុទ្ធសាស្ត្រ ២ចំណុចដែលអាចឲ្យអ្នកសាងក្រុមហ៊ុនដោយមិនចាំបាច់ត្រូវការអ្នក
អ្នកដឹកនាំដ៏ល្អមិនមែនជាអ្នកដែលចេះតែបង្គាប់បញ្ជាកូនចៅនោះទេ តែពួកគេគឺជាអ្នកដែលអាចបណ្ដុះបណ្ដាលអ្នកដទៃឲ្យចេះពឹងផ្អែកលើខ្លួនឯង និងក្លាយជាអ្នកដឹកនាំដូចខ្លួនដែរ។ បើកូនចៅរបស់ពួកគេត្រូវពឹងផ្អែកទៅលើអ្នកដឹកនាំរបស់ខ្លួនតាំងពីដើមរហូតដល់ចប់ នោះវាបានបង្ហាញពីអសមត្ថភាពរបស់អ្នកដឹកនាំក្នុងការធ្វើជាអ្នកដឹកនាំដ៏មានសមត្ថភាពមួយរូបសម្រាប់កូនចៅនិងអង្គភាពទាំងមូល។
ខាងក្រោមនេះគឺជាយុទ្ធសាស្ត្រ២ចំណុចដែលអាចឲ្យអ្នកសាងក្រុមហ៊ុនដោយមិនចាំបាច់ត្រូវការអ្នក៖
១) បង្កើតប្រព័ន្ធគ្រប់គ្រងការងារ៖ ការបង្កើតប្រព័ន្ធការងារគឺជាចំណុចដ៏សំខាន់មួយនៃភាពជោគជ័យរបស់ក្រុមហ៊ុន។ ម្នាក់ៗនៅក្នុងក្រុមហ៊ុនត្រូវដឹងពីការទទួលខុសត្រូវរបស់ខ្លួននៅក្នុងមុខនាទីនិងនៅក្នុងក្រុមហ៊ុន។ អ្នកដឹកនាំត្រូវនិយាយឲ្យច្បាស់លាស់ទៅលើអ្វីខ្លះទៅដែលអ្នករំពឹងចង់បានពីកូនចៅរបស់អ្នក។ ប៉ុន្តែអ្នកក៏ត្រូវដឹងថាប្រព័ន្ធគ្រប់គ្រងការងារនេះមិនមែននៅឋិតថេររហូតនោះទេ ការប្រែប្រួលតម្រូវឲ្យមានទៅតាមការប្រែប្រួលនៃស្ថានភាពការងារ។ ហេតុនេះអ្នកក៏ត្រូវត្រួតពិនិត្យវាម្ដងម្កាលនៅពេលចាំបាច់ដែរ។
២) ប្រលែងចោល៖ មានអ្នកដឹកនាំមិនច្រើននោះទេដែលអាចសម្រេចចំណុចនេះបាន។ អ្នកដឹកនាំភាគច្រើនចូលចិត្តគ្រប់គ្រងកូនចៅដោយការតឹងតែង និងចូលលូកដៃស្ទើរតែគ្រប់ដំណើរការការងាររបស់កូនចៅពួកគេ។ នេះក៏មកពីពួកគេមិនទុកចិត្តកូនចៅ ខ្លាចកូនចៅធ្វើមិនល្អដូចអ្វីដែលខ្លួនចង់បាន ចូលចិត្តប្រើអំណាចមកប្រើមនុស្ស ដែលវាបានបង្ហាញពីអសមត្ថភាពរបស់ពួកគេក្នុងការក្លាយជាអ្នកដឹកនាំដ៏ល្អម្នាក់សម្រាប់កូនចៅ។
ការប្រលែងចោលនឹងផ្ដល់ឱកាសឲ្យអ្នកសម្រាប់ធ្វើអ្វីដែលសំខាន់ និងឱកាសសម្រាប់ឈរមើលពីលើមកដើម្បីមើលឃើញរូបភាពធំអំពីដំណើរការការងារនៅក្នុងក្រុមហ៊ុន និងផ្ដល់ឱកាសសម្រាប់កូនចៅចេះពឹងផ្អែកលើខ្លួនឯង និងបានបញ្ចេញឲ្យអស់ពីសមត្ថភាពរបស់ខ្លួន៕
ដោយ៖ ស្រីពៅ
