BarCamp ឆ្នាំនេះកាន់តែប្លែក! ប្រធានបទ“សន្និបាតបច្ចេកវិទ្យា និងការចាប់ផ្ដើមអាជីវកម្ម" ថ្ងៃទី ២០-២១ ខែតុលា នៅតិចណូ
បារខែមអាស៊ាន២០១៨ គឺជាព្រឹត្តិការណ៍ដែលប្រារព្ធឡើងក្នុងគោលបំណងធ្វើការជួបជុំរវាងសិស្សនិស្សិតបុគ្គលិកក្រុមហ៊ុនម្ចាស់អាជីវកម្ម និងអ្នកជំនាញដើម្បីពិភាក្សា ចែករំលែកចំណេះដឹង និងបទពិសោធន៍ដល់សិស្សនិស្សិត អាជីវកម្មធុនតូច និងមធ្យម បុគ្គលិកសហគ្រាស ក្រុមហ៊ុននានា និងមហាជនទូទៅ អំពីបច្ចុប្បន្នភាពនៃបច្ចេកវិទ្យា សេដ្ឋកិច្ច ធនធានមនុស្ស ហិរញ្ញវត្ថុ ទីផ្សារ ការច្នៃប្រឌិត និងឌីជីថល ក្នុងប្រទេសកម្ពុជាក៏ដូចជាក្នុងតំបន់។ល។
ព្រឹត្តិការណ៍បារខែមអាស៊ាន២០១៨នេះ នឹងផ្ដោតលើការស្វែងយល់ពីបច្ចេកវិទ្យាឌីជីថល ក្នុងការបង្កើនល្បឿនកំណើន សេដ្ឋកិច្ចឌីជីថល ធ្វើឱ្យជីវិតកាន់តែប្រសើរ ជំរុញគំនិតច្នៃប្រឌិត និងជួយប្រព័ន្ធអេកូឡូហ្សី បច្ចេកវិទ្យា និងការចាប់ផ្ដើម អាជីវកម្ម។
នេះជាលើកទី៣ហើយដែលបារខែមអាស៊ានបានប្រារព្ធឡើង ដើម្បីចែករំលែកបទពិសោធន៍ ពីអ្នកមានជំនាញប្រកប ដោយបទពិសោធន៍ល្អៗមកពី រាជធានីភ្នំពេញ និងបណ្តាប្រទេសតំបន់អាស៊ាន ហើយសម្រាប់ឆ្នាំនេះផងដែរ ព្រឹត្តិការណ៍ បារខែមអាស៊ាននឹងប្រព្រឹត្តឡើងនៅថ្ងៃទី ២០-២១ ខែតុលា ឆ្នាំ២០១៨ ចាប់ពីម៉ោង៨ព្រឹក ដល់ម៉ោង៥ល្ងាច នៅវិទ្យាស្ថាន បច្ចេកវិទ្យាកម្ពុជា ហៅកាត់ សាលាតិចណូ កម្មវិធីនេះធ្វើឡើងក្រោមប្រធានបទ “Powering Your Future in Digital Era" ព្រមទាំងមានពិព័រណ៍បង្ហាញ ផលិតផលនិងសេវាកម្ម និងស្នាដៃសិស្សនិស្សិតកម្ពុជា ក្នុងវិស័យ បច្ចេកវិទ្យាគមនាគមន៍ និងព័ត៌មាន។
កម្មវិធីនេះនឹងចូលរួមដោយវាគ្មិន ៧៥ រូប ដោយពាំនាំមកនូវប្រធានបទ ចំនួន ៨០ ខុសៗគ្នា ទាក់ទងនឹង វិស័យបច្ចេកវិទ្យា សហគ្រិនភាព និងការច្នៃប្រឌិត ដើម្បីធ្វើការផ្លាស់ប្ដូរចំណេះដឹង ជំនាញ និងបទពិសោធន៍ជាមួយគ្នា និងចែករំលែកទៅ សហគ្រាសធនតូច និងមធ្យម សម្រាប់ការអភិវឌ្ឍអាជីវកម្មរបស់គាត់។ អ្វីដែលពិសេសឆ្នាំនេះក្រុមការងារនឹងរៀបចំ ប្រភេទប្រធានបទទៅតាមជំនាញ រួមមាន ផ្នែកគំនិតច្នៃប្រឌិត សហគ្រិនភាពនិងការចាប់ផ្ដើមអាជីវកម្ម បង្កើតមាតិកាឌីជីថល អភិវឌ្ឍន៍ហ្គេម និងអភិវឌ្ឍន៍កម្មវិធីកុំព្យូទ័រ។
អ្នកចូលរួមមិនត្រឹមតែអាចចូលស្តាប់បទបង្ហាញនានារបស់វាគ្មិននោះទេ តែក៏អាចទស្សនាស្តង់ពិព័រណ៍ បង្ហាញផលិតផល និងសេវាកម្ម និងស្នាដៃសិស្សនិស្សិតកម្ពុជា ចំនួន 60ស្តង់ ដែលនឹងមានវត្តមាននៅក្នុងព្រឹត្តិការណ៍នេះ ដើម្បីស្វែងយល់ បន្ថែម អំពីផលិផលនិងសេវាកម្មរបស់ពួកគាត់។ ម្យ៉ាងវិញទៀតអ្នកចូលរួមអាចនឹងភ្ជាប់ទំនាក់ទំនងជាមួយ វាគ្មិន និងអ្នកចូលរួមដទៃទៀត សម្រាប់អាជីវកម្ម និងការទំនាក់ទំនង របស់ អ្នកទៅថ្ងៃមុខពីវាគ្មិន ជាតិ និងអន្តរជាតិដែល អញ្ជើញមកពីបណ្ដាក្រុមហ៊ុន និងស្ថាប័នផ្សេងៗគ្នា ។
កម្មវិធីនេះ ទទួលបានការគាំទ្រពីក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍ និងចូលរួមឧបត្ថម្ភធំដោយក្រុមហ៊ុន Smart Axiata សហការឧបត្ថម្ភដោយក្រុមហ៊ុន EZECOM និងចូលរួមឧបត្ថម្ភដោយក្រុមហ៊ុន TOTAL និងPassApp រួមទាំងស្ថាប័នជាច្រើនទៀតមានដូចជា វិទ្យាស្ថានបច្ចេកវិទ្យាកម្ពុជា Koompi BookMeBus Kouprey Creative វិទ្យាស្ថានជាតិ NIPTICT Emerald HUB វិទ្យាស្ថានបើកទូលាយ សមាគមសហគ្រិន វ័យក្មេងកម្ពុជា សមាគមសហគ្រិនស្ត្រីកម្ពុជា បណ្តាញសារព័ត៌មាន Sabay GeeksinCambodia KhmerLoad និង BizKhmer ជាដើម៕
