នៅកន្លែងការងារ អ្នកមិនគួរលើកឃ្លាទាំងនេះទៅនិយាយជាមួយអ្នកគ្រប់គ្រងអ្នកឡើយ!
នៅកន្លែងការងារ ការប្រើភាសាទំនាក់ទំនង ដ៏ត្រឹមត្រូវមួយរវាងថ្នាក់លើមកថ្នាក់ក្រោម ពីថ្នាក់ក្រោមទៅថ្នាក់លើគឺជារឿងមួយដ៏សំខាន់ដើម្បីបញ្ជាក់ថា ស្ថាប័ននោះមានបរិយាកាសការងារល្អ។ ក៏ប៉ុន្តែគេមិនអាចឲ្យភាពឆ្គាំឆ្គងមួយចំនួននៃភាសាទំនាក់ទំនងទាំងនោះ ត្រូវបានលុបបំបាត់ទាំងស្រុកនោះទេ ដោយសារតែមានការពាក់ព័ន្ធទៅនឹងការយល់ដឹង ឬអត្តចរិតរបស់បុគ្គលិកម្នាក់ៗនៅក្នុងស្ថាប័ននីមួយៗនៅមានកម្រិត។
យ៉ាងណាមិញ អត្ថបទខាងក្រោមនេះ នឹងបង្ហាញពីឃ្លាទំនាក់ទំនងមួយចំនួនដែលបុគ្គលិកក្រោមបង្គាប់គួរជៀសវាងនិយាយទៅកាន់អ្នកគ្រប់គ្រង ឬចៅហ្វាយរបស់ខ្លួន៖
១.អ្នកឯងគឺជាអ្នកខុស! ទោះបីចៅហ្វាយអ្នកខុសក៏ដោយ អ្នកមិនត្រូវភាសាបែបហ្នឹងទៅគាត់ទេ។ អ្នកអាចនិយាយថា ខ្ញុំប្រហែលជាបានទទួលព័ត៌មានមិនត្រឹមត្រូវអំពីរឿងនេះ ប៉ុន្តែខ្ញុំមានអារម្មណ៍ថា ...។
២.ការងារហ្នឹងខ្ញុំធ្វើមិនបានទេ! ហេតុអ្វីអ្នកមិនគួរឆ្លើយបែបនេះ? ពីព្រោះវាបង្ហាញថា អ្នកជាបុគ្គលិកគ្មានទំនុកចិត្ត និងមិនពេញចិត្តធ្វើដើម្បីចាប់យកឱកាសថ្មីៗពីការងារដែលចៅហ្វាយអ្នកដាក់ឲ្យ។
៣.ការងារហ្នឹងមិនមែនជាការងារខ្ញុំទេ! នៅកន្លែងធ្វើការ អ្នកត្រូវចាំថា អ្នកត្រូវបង្កលក្ខណៈងាយស្រួលដល់ការងារចៅហ្វាយនាយរបស់អ្នក។ ទោះការងារនោះមិនមែនជារបស់អ្នក អ្នកត្រូវជួយចេះឈឺឆ្អាល។ នេះជាការរួមចំណែករបស់អ្នកដើម្បីឲ្យក្រុមហ៊ុនជោគជ័យ។
៤.អត់ទេ! ឃ្លានេះ គឺបង្ហាញថា អ្នកជាបុគ្គលិកគ្មានសុជីវធម៌។ ឧទាហរណ៍ថា ការងារហ្នឹងអ្នកធ្វើមិនបានទេ ប៉ុន្តែចៅហ្វាយរបស់អ្នកពឹងពាក់ហើយ អ្នកគួរនិយាយថា ខ្ញុំអាចធ្វើបានតែវានឹងមានឧបសគ្គបើខ្ញុំធ្វើវា។ ខ្ញុំខ្លាចធ្វើវាមិនបានល្អ។ សូមអានអត្ថបទ៖ Jack Ma៖ មិនថាចាស់ឬក្មេង ត្រូវសួរខ្លួនឯង ៣ សំណួរនេះ ពេលបើកក្រុមហ៊ុន
៥.ខ្ញុំមិនដឹងទេ! ពេលខ្លះអ្នកពិតជាមិនដឹងមែន។ ប៉ុន្តែចម្លើយដ៏ល្អ គឺត្រូវព្យាយាមធ្វើសិន ឬរកមើលសិនទៅ ជាជាងឆ្លើយថាមិនដឹង។
៦.ខ្ញុំនឹងព្យាយាម អ្នកគ្រាន់តែព្យាយាម ប៉ុន្តែលទ្ធផលអាចមិនដូចការគ្រោងទុក។ ចម្លើយដ៏ស័ក្តិសមគឺ ខ្ញុំនឹងធ្វើវាលោកប្រធាន/ចៅហ្វាយ។
៧.តើខ្ញុំបានប្រយោជន៍អ្វីខ្លះពីការងារហ្នឹង? ពេលខ្លះអ្នកត្រូវជួយការងារអ្នករួមការងារ ឬស្ថាប័នផ្សេងទៀតក្នុងក្រុមហ៊ុន។ ការឆ្លើយបែបនេះនាំឲ្យចៅហ្វាយរបស់អ្នកយល់ថា អ្នកជាបុគ្គលិកចិត្តចង្អៀតចង្អល់ ខ្វះការចែករំលែកជាមួយក្រុម និងគ្មានភាពគំរូក្នុងការងារ។
៨.ខ្ញុំសុំទោស ប៉ុន្តែ... បើសុំទោស សុំត្រូវសុំទោសឲ្យអស់ពីចិត្ត! បើអ្នកសុំទោស ហើយប្រើឃ្លា "ប៉ុន្តែ" មានន័យថា អ្នកគ្មានការទទួលខុសត្រូវ។ ឃ្លាដែលគួរនិយាយគឺ ខ្ញុំសុំទោស! ខ្ញុំនឹងធ្វើឲ្យវាល្អជាងនេះនៅលើកក្រោយ។
៩.ខ្ញុំមានបញ្ហាផ្ទាល់ខ្លួន ដូច្នេះថ្ងៃនេះខ្ញុំគ្មានអារម្មណ៍ធ្វើការទេ! អ្នកណាក៏មានបញ្ហាផ្ទាល់ខ្លួន។ ប៉ុន្តែនៅកន្លែងការងារ អ្នកត្រូវយកការងារជាអាទិភាព និងបែកចែកឲ្យដាច់ពីការងារផ្ទាល់ខ្លួន។
១០.ខ្ញុំនឹងដើរចេញពីក្រុមហ៊ុននេះ! កុំនិយាយពាក្យនេះទៅកាន់ក្រុមហ៊ុន។ វាជាភាសាគំរាមមួយដែលគ្មានវិជ្ជាជីវៈ និងគ្មានសីលធម៌នោះទេដែលនាំឲ្យចៅហ្វាយរបស់អ្នកយល់ថា អ្នកគឺជាឧបសគ្គថ្មីដល់ក្រុមហ៊ុន។ បើអ្នកមិនពេញចិត្តនឹងការងារ អ្នកគួរដាក់ពាក្យលាលែងដោយសន្តិវិធី។
១១.ខ្ញុំបានព្យាយាមច្រើនហើយកន្លងមក! ភាសាដ៏ល្អនៅពេលនេះ អ្នកគួររីករាយនឹងធ្វើវាបន្តទៀតឲ្យកាន់តែប្រសើរជាងមុន ប្រសិនបើចៅហ្វាយអ្នកស្នើសុំឲ្យធ្វើបន្ថែមទៀត។
១២.ខ្ញុំគ្រាន់តែចង់សន្និដ្ឋានថា... ឃ្លានេះនាំឲ្យចៅហ្វាយរបស់អ្នកគិតថា អ្នកមានភាពច្បាស់លាស់នៅក្នុងការធ្វើសេចក្តីសម្រេច។ បើអ្នកមិនច្បាស់ អ្នកគួរនិយាយដោយត្រង់ ព្រោះភាសានេះបង្ហាញថា អ្នកគ្មានការទទួលខុសត្រូវ គ្មានភាពហ្មត់ចត់ និងមិនបានរៀនអង្កេតឲ្យបានគ្រប់ជ្រុងជ្រោយ។
១៣.នោះមិនមែនជាកំហុសរបស់ខ្ញុំទេ! វាជាកំហុស...! បើអ្នកមិនមែនជាអ្នកខុស អ្នកមិនគួរនិយាយដោយត្រង់ៗដូច្នេះពេកនោះទេ។ អ្នកត្រូវពន្យល់ចៅហ្វាយរបស់អ្នកឲ្យច្បាស់លាស់ជាមុនសិនថា អ្នកពិតជាមិនបានពាក់ព័ន្ធនៅក្នុងកំហុសនេះ ជាជាងចោទទៅលើអ្នកផ្សេងទៀត។
១៤.ខ្ញុំមិនអាចធ្វើការជាមួយគាត់/នាងបានទេ! ការប្រើឃ្លានេះ បង្ហាញថា អ្នកជាមនុស្សមិនចុះសម្រុង ឬគ្មានទំនាក់ទំនងល្អជាមួយអ្នកដទៃ។ នេះជាលទ្ធផលមួយបង្ហាញថា អ្នកមិនអាចធ្វើការងារជាក្រុមបានដែលជាការប៉ះពាល់ដល់ធ្ងន់ធ្ងរដល់បរិស្ថានការងារ។
១៥.ខ្ញុំគ្មានដំណោះស្រាយទេ! ហាមនិយាយដាច់ខាតចំពោះឃ្លាមួយនេះ។ អ្នកត្រូវរកដំណោះស្រាយ ព្រោះគ្រប់បញ្ហាមានដំណោះស្រាយ។ អ្នកត្រូវចាំថា អ្នកដឹកនាំ គឺជាអ្នករកឃើញដំណោះស្រាយ រីឯអ្នកដើរតាម ត្រឹមជាអ្នកដែលនិយាយតែបញ្ហា។ សូមអានអត្ថបទ៖ មហាសេដ្ឋី Ray Dalio៖«មានភាពឈឺចាប់ និងកំហុសឆ្គង គឺជារឿងល្អបំផុតធ្វើឲ្យអ្នកជោគជ័យ»
១៦.ម៉េចបានជាគាត់មាន? ខ្ញុំអត់? ពេលធ្វើការ អ្នកគួរផ្ដោតលើការងាររបស់អ្នក មិនគួរច្រណែនលើមុខតំណែង រង្វាន់ ឬការដំឡើងប្រាក់ខែរបស់អ្នកផ្សេងឡើយ។ ប្រសិនបើអ្នកធ្វើបានល្អបំផុតច្រើនជាងបុគ្គលិកផ្សេងហើយ ប៉ុន្តែនៅតែទទួលបានការស្តីបន្ទោសទៀត នោះហើយជាអ្វីដែលអ្នកត្រូវពិចារណាចាកចេញ ឬត្រូវចរចាដោយសន្តិវិធីជាមួយចៅហ្វាយរបស់អ្នក។
១៧.ការងារហ្នឹងទៅមិនរួចទេ! ចម្លើយដ៏គួរឲ្យស្អប់ខ្ពើមបំផុតមួយរបស់ថ្នាក់ដឹកនាំចំពោះកូនចៅ គឺឃ្លាមួយនេះហើយ។ នេះបង្ហាញថា អ្នកគ្មានសមត្ថភាព និងគ្មានការប្ដេជ្ញាចិត្ត។ អ្នកត្រូវសាកល្បងធ្វើវាមិនសិន ហើយរង់ចាំលទ្ធផលទើបជាការប្រសើរជាង។
១៨.តើខ្ញុំអាចសុំចេញទៅមុនបានអត់? ថ្ងៃនេះអត់មានអីត្រូវធ្វើទេ! ការចេញទៅមុនវាមិនមែនជាបញ្ហានោះទេ។ ប៉ុន្តែហាមដាច់ខាតកុំចេញទៅមុនដោយសារតែគ្មានអ្វីធ្វើ ឬការងារអស់ហើយ។ ជាទូទៅ ចៅហ្វាយរបស់អ្នកចង់ឃើញអ្នកជាបុគ្គលិកមានគំនិតផ្ដួចផ្ដើម សំបូរគំនិត ឬបង្កើតគម្រោងផ្សេងៗ។ បើអ្នកមិនពូកែរឿងនេះ អ្នកគួរអង្គុយលេង ជាជាងយកភាសានេះមកប្រើ៕
ដោយ៖ សូរ៉ាន់ដារ
