ទម្លាប់ ៤យ៉ាងដែលធ្វើឲ្យអ្នកក្លាយជាអ្នកដឹកនាំម្នាក់ដែលកូនចៅមិនអាចបំភ្លេចបាន
ភាពជាអ្នកដឹកនាំល្អមិនមែនរៀនសូត្រមកពីសាលានោះឡើយ។ វាទទួលបានមកពីបទពិសោធន៍ដែលអ្នកធ្លាប់ឆ្លងកាត់។ ខាងក្រោមនេះគឺជាទម្លាប់៤យ៉ាងដែលធ្វើឲ្យអ្នកក្លាយជាអ្នកដឹកនាំម្នាក់ដែលកូនចៅមិនអាចបំភ្លេចបាន៖
១) អ្នកដឹកនាំដែលមិនភ័យខ្លាចការបង្កើតកំហុស៖ កំហុសគឺជាផ្នែកមួយនៃជីវិត។ វាបំពេញជីវិតរបស់អ្នកឲ្យពេញលេញ។ បើអ្នកធ្វើត្រូវរហូតនោះជីវិតរបស់អ្នកនឹងពោរពេញដោយភាពសោះកក្រោះនិងឥតមានខ្លឹមសារអ្វីនោះឡើយ។ កំហុសជួយឲ្យអ្នករៀនពីបទពិសោធន៍ជីវិត និងជាអ្វីដែលអ្នកត្រូវការដើម្បីភាពរុងរឿងរីកចម្រើន។ អ្នកដឹកនាំល្អយល់ពីចំណុចនេះច្បាស់ ហើយពួកគេមិនខំជជែកយកតែត្រូវខ្លួនឯងនោះឡើយ។
២) អ្នកដឹកនាំដែលស្ដាប់ច្រើនជាងនិយាយ៖ មិនថាអ្នកដឹងច្រើនប៉ុណ្ណាឬមានទេពកោសល្យខ្លាំងប៉ុណ្ណាក៏ដោយ អ្នកតែម្នាក់ឯងមិនអាចសម្លឹងឃើញបញ្ហាបានគ្រប់ជ្រុងជ្រោយនោះឡើយ។ ភាពចចេសរឹងរូសមិនស្ដាប់អ្នកដទៃមានតែនាំមកនូវលទ្ធផលអវិជ្ជមានសម្រាប់អ្នកនៅចុងបញ្ចប់ប៉ុណ្ណោះ។ ហេតុនេះអ្នកដឹកនាំល្អយករូបភាពធំជាសំខាន់ ដោយចេះឲ្យតម្លៃទៅលើអ្នកដទៃ ចេះស្ដាប់គំនិតយោបល់របស់អ្នកដទៃ ហើយចេះថ្លឹងថ្លែងយកគំនិតទាំងនោះមកគិតពិចារណាឲ្យបានល្អ។
៣) អ្នកដឹកនាំដែលមិនកេងប្រវ័ញ្ចយកមុខមាត់ពីកូនចៅ៖ សមិទ្ធផលកិច្ចការដែលល្អត្រូវផលិតចេញមកពីភាពសាមគ្គីរួមចិត្តគំនិតគ្នាតែមួយរបស់កូនចៅ សមត្ថភាពរបស់ពួកគេ និងការខិតខំប្រឹងប្រែងរបស់ពួកគេ។ ថ្វីបើស្ថិតនៅក្រោមការដឹកនាំរបស់អ្នក តែបើអ្នកគ្មានពួកគេ នោះអ្នកក៏មិនអាចសម្រេចសមិទ្ធផលអស្ចារ្យបានតែម្នាក់ឯងនោះដែរ។ អ្នកដឹកនាំល្អមិនកេងប្រវ័ញ្ចយកមុខមាត់ពីការខិតខំរបស់កូនចៅ ហើយផ្ទុយទៅវិញពួកគេមើលឃើញពីការរួមចំណែករបស់បុគ្គលិក ចេះលើកសរសើរបុគ្គលិកនិងជំរុញពួកគេឲ្យខិតខំធ្វើការជាងមុន។
៤) អ្នកដឹកនាំដែលផ្ដល់ឯករាជ្យភាពដល់បុគ្គលិក៖ ការផ្ដល់ឯករាជ្យភាពដល់បុគ្គលិកនឹងធ្វើការឲ្យពួកគេមានសេរីភាពគ្រប់គ្រាន់សម្រាប់បញ្ចេញសមត្ថភាពរបស់ខ្លួនឲ្យអស់ពីលទ្ធភាព និងរិះរកការដោះស្រាយបញ្ហាប្រកបដោយការច្នៃប្រឌិត៕
ដោយ៖ ស្រីពៅ
