ពីរសំណួររបស់លោក Jerry Thai ជួយឲ្យអ្នកស្គាល់ជំនាញឬអាជីវកម្មដែលអ្នកស្រលាញ់ពិតប្រាកដ
លោក ថៃ វ៉ាន់ថា ឬលោក Jerry Thai ស្ថាបនិកក្រុមហ៊ុន@homephotography ដែលមនុស្សភាគច្រើនជាពិសេសយុវជនបានស្គាល់រូបលោកតាមរយៈការចែករំលែកក្នុងកម្មវិធីសិក្ខាសាលា និងស្នាដៃសិល្បះយ៉ាងប៉ិនប្រសព្វនៃការថតរូបរបស់លោក។ នៅក្នុងកិច្ចសម្ភាសន៍ជាមួយ Bizkhmer លោកJerryបានចែករំលែកនូវសំណួរសំខាន់ពីរដែលយើងគួរសួរខ្លួនឯង ដើម្បីឲ្យយើងអាចស្វែងរកអ្វីដែលជាចំណង់ចំណូលចិត្តពិតប្រាកដរបស់យើង នៅក្នុងការជ្រើសរើសមុខជំនាញឬអាជីវកម្ម។
ស្ថាបនិករបស់@homephotography រូបនេះបានលើកឡើងថា មនុស្សម្នាក់ៗពិសេសយុវជននៅពេលដែលគាត់មិនទាន់មានគោលដៅច្បាស់លាស់គឺគាត់មិនដឹងថាត្រូវជ្រើសរើសអ្វីឲ្យពិតប្រាកដនោះឡើយ ដូច្នេះហើយពួកគាត់បានបណ្ដោយឲ្យសង្គមទាំងមូលនិងអ្នកដែលនៅជុំវិញខ្លួនគាត់ជាអ្នកប្រាប់គាត់ ដោយប្រាប់តាមរយៈវិធី "រកលុយបាន" ដូច្នេះគាត់គិតថាឲ្យតែអ្វីដែលគាត់អាចរកលុយបានគឺគាត់នឹងធ្វើវា កន្លែងនេះហើយដែលពួកគាត់មិនអាចស្វែងរកអ្វីដែលខ្លួនគាត់ចូលចិត្តពិតប្រាកដបាន។
លោក Jerry បានបន្តដោយសង្កត់ធ្ងន់ថា "អ្វីដែលខ្លួនយើងស្រលាញ់ពិតប្រាកដគឺនៅពេលដែលមុខរបរ ឬជំនាញទាំងនោះរកលុយមិនទាន់បាន ហើយក៏មិនដឹងពេលណារកលុយបានដែរ ប៉ុន្តែយើងសប្បាយចិត្តនឹងធ្វើវា ហើយធ្វើដោយគ្មានអ្នកណាបង្ខំ ធ្វើរហូតដល់ភ្លេចពេលភ្លេចវេលា និងធ្វើរហូតទាល់តែវាបានចេញជាលទ្ធផល នោះទើបជាអ្វីដែលយើងស្រលាញ់ពិតប្រាកដ។ ដូចដែលខ្ញុំបានចំណាយពេលជាច្រើនក្នុងការស្រាវជ្រាវពាក់ព័ន្ធនឹងTechnology និងសិល្បះនៃការថតដូច្នោះដែរ គឺពេលនោះខ្ញុំមិនអាចរកចំណូលអ្វីបាននោះទេ ប៉ុន្តែខ្ញុំនៅតែសប្បាយចិត្តនឹងធ្វើវា។ នេះគឺគ្រាន់តែជាចំណុចដំបូងដែលយើងគួរសួរខ្លួនឯង"។ បន្ទាប់ពីយើងរកឃើញនូវអ្វីដែលយើងបានចំណាយពេលវេលាធ្វើវាទោះបីជាមិនបានចំណូលក៏នៅតែធ្វើ ទាំងនេះគ្រាន់តែជាចំណុចចាប់ផ្ដើមឬជាតម្រុយសម្រាប់យើងប៉ុណ្ណោះ ចំណុចបន្ទាប់ដែលយើងគួរសួរខ្លួនឯងនោះគឺ "តើថ្ងៃក្រោយយើងអាចរស់ជាមួយនឹងមុខរបរឬក៏ជំនាញនោះបានឬអត់?” នេះទើបជាចំណុចសំខាន់ ដូច្នេះទាល់តែយើង "ព្រមជឿ" លើជម្រើសរបស់យើង ទាល់តែយើងអាចឆ្លើយថា "ខ្ញុំអាចរស់ជាមួយជំនាញឬមុខរបរទាំងនោះបាន" នោះទើបមានន័យថាអ្វីដែលយើងជ្រើសរើសនោះគឺជាការស្រលាញ់ពិតប្រាកដហើយ។ ទាំងនេះគឺជាការលើកឡើងបន្ថែមរបស់លោក Jerry។
លោក Jerry Thai “នៅពេលដែលយើងផ្ដល់លទ្ធផលទៅឲ្យអតិថិជន ហើយគេឆ្លើយតបដោយការអរគុណនិងស្នាមញញឹមបន្ថែមពីលើការទូទាត់ថវិការ ហើយយើងសប្បាយចិត្តនឹងការអរគុណនិងស្នាមញញឹមពីពួកគាត់ នោះទើបបញ្ជាក់ថាអ្វីដែលយើងធ្វើនោះគឺជាអ្វីដែលយើងស្រលាញ់ពិតប្រាកដ មិនមែនឲ្យតែបានលុយទើបយើងសប្បាយចិត្តនោះទេ"៕
អត្ថបទ៖ ជួប ស្រីរ័ត្ន
