ពេលក្លាយជាសហគ្រិន អ្នកត្រូវទទួលស្គាល់ថា អ្នកនឹងគ្មានពេលគ្រប់គ្រាន់ធ្វើរឿងទាំង ៤នេះ
សម្រាប់សហគ្រិន ពេលវេលា ២៤ម៉ោងក្នុងមួយថ្ងៃហាក់ដូចជាខ្លីណាស់។ ពិតមែនហើយដោយសារតែមុខជំនួញវាទាមទារឲ្យសហគ្រិនត្រូវចេះគ្រប់គ្រងពេលវេលាឲ្យមានប្រសិទ្ធភាពបំផុតសម្រាប់បែងចែកការងារនានានៅក្នុងមុខជំនួញ។ ហេតុដូច្នេះហើយនៅពេលក្លាយជាសហគ្រិន អ្នកត្រូវតែទទួលស្គាល់ថា អ្នកនឹងមិនមានពេលគ្រប់គ្រាន់សម្រាប់ធ្វើរឿង៤ ចំណុចខាងក្រោមនេះដូចមុនទៀតឡើយ៖
១. ពេលវេលាសម្រាប់គេង
ពាក្យថា “សហគ្រិន” គឺជារឿងសាមញ្ញទៅហើយដែលមិនមានពេលគ្រប់គ្រាន់សម្រាប់គេង។ ជាទូទៅអ្នកជំនាញណែនាំថា ដើម្បីរក្សាសុខភាពឲ្យល្អជាប្រចាំ អ្នកត្រូវតែទទួលទានដំណេកយ៉ាងហោចណាស់ក៏ប្រាំពីរម៉ោងដែរក្នុងមួយថ្ងៃ។ ប៉ុន្តែ កិច្ចការជំនួញ ឬអាជីវកម្មបានតម្រូវឲ្យអ្នកប្រើពេលច្រើនដើម្បីគិតគ្រប់ពេលសូម្បីតែពេលគេងក៏ត្រូវគិតដែរដើម្បីធ្វើយ៉ាងណាឲ្យជំនួញជោគជ័យ។ នេះមានដូចជា យកពេលវេលារៀបចំគម្រោងការងារសម្រាប់ថ្ងៃស្អែក ពិនិត្យមើលឯកសារផ្សេងៗ និងធ្វើកិច្ចការផ្សេងៗជាច្រើនទៀត។
២. ពេលវេលាថែទាំសុខភាព
តើអ្នកមានចាំទេថា ពេលណាជាថ្ងៃចុងក្រោយដែលអ្នកបានចេញក្រៅទៅហាត់ប្រាណ? អ្នកទំនងជាមិនបានចាំទេ ពីព្រោះតែអ្នកកំពុងមមាញឹកនឹងការងាររាប់មិន អស់នៅក្នុងដៃ។ អ្នកប្រហែលជាមានគម្រោងចេញទៅហាត់ប្រាណនៅថ្ងៃស្អែក ឬចុងសប្តាហ៍ក្រោយ ប៉ុន្តែពេលវេលាមកដល់មុខជំនួញរបស់អ្នកបង្ខំឲ្យអ្នកផ្លាស់ប្ដូរគម្រោងវិញ លើកពេលទៅក្រោយហើយនេះបានក្លាយជាទម្លាប់របស់អ្នកដោយសារតែអ្នកបានដាក់ផែនការរកស៊ីជារឿងអាទិភាពទៅហើយ។
៣. ពេលវេលាសម្រាប់ជួបជុំគ្រួសារ និងមិត្តភាព
នេះជាចំណុចសំខាន់មួយដែលសហគ្រិន ទាំងអស់ត្រូវយកចិត្តទុកដាក់។ កិច្ចប្រជុំមុខជំនួញរបស់អ្នកអាចនឹងធ្វើឡើងជាបន្ទាន់នៅចំថ្ងៃខួបកំណើនមនុស្សជាទីស្រឡាញ់របស់អ្នក។ ភ្ញៀវរបស់អ្នកអាចណាត់ជួបអ្នកនៅចំថ្ងៃអាពាហ៍ពិពាហ៍មិត្តរបស់អ្នក។ នៅក្នុងស្ថានភាពនេះចង់ឬមិនចង់ អ្នកត្រូវជ្រើសរើសការងារមុខជំនួញជាធំ ដោយសារតែវាជាកិច្ចការអាទិភាពរបស់អ្នកដែលនេះបានបញ្ជាក់ថា ភាពជាសហគ្រិនត្រូវលះបង់ពេលវេលាយ៉ាងច្រើនដល់ក្រុមការងារ ដៃគូជំនួញ ឬ អតិថិជនជាជាងចំណាយពេលជាមួយគ្រួសារ និងមិត្តភាព។
៤. ពេលវេលាសម្រាប់លំហែកម្សាន្ត
ខណៈដែលជីវិតអ្នកធ្វើការឲ្យគេ និងមនុស្សទូទៅមានពេលកម្សាន្តច្រើន ជីវិតជាសហគ្រិនមិនមានពេលសម្រាប់លំហែកម្សាន្តច្រើននោះឡើយ។ នេះក៏ដោយសារតែតែអ្នកបានវិនិយោគពេលវេលាច្រើនធ្វើយ៉ាងណាឲ្យជំនួញបានជោគជ័យ ហើយប្រសិនបើអ្នកមានដំណើរទៅណាមកណាឆ្ងាយ ឬ ជិតនោះ ភាគច្រើនគឺដើម្បីតែការងារមុខជំនួញអាជីវកម្មតែប៉ុណ្ណោះ៕
ប្រភព៖ Entrepreneur
