មេរៀនជីវិតទាំង ៩ របស់លោក ជេក ម៉ា ដែលលោកអ្នកគួររៀនសូត្រជាគំរូ
មិត្តអ្នកអានទាំងអស់គ្នាប្រាកដជាស្គាល់លោក ជេក ម៉ា ជាក់ជាមិនខាន។ លោក ជេក ម៉ា គឺជានាយកប្រតិបត្តិ Alibaba មហាសេដ្ឋី និងជាបុគ្គលដែលមានឥទ្ធិពលមួយរូបក្នុងប្រទេសចិន។ លោកជាបុគ្គលដែលពូកែនិយាយលើកទឹកចិត្ត ដែលមនុស្សជាច្រើនចាត់ទុកថាជាបុគ្គលគំរូ។ លោកបានចែករំលែកនូវមេរៀនជីវិតទាំង ៩ ដែលលោកអ្នកគួរដឹង៖
១) ក្លាហានសម្តែងចេញ÷ តាមរូបភាពមួយចំនួនដែលបានបង្កើតឡើងនៅលើ Alibaba Picture គេឃើញមានរូបរបស់ Jack Ma ជាមួយអ្នកសិល្បៈចិន និងអ្នកល្បីៗជនជាតិផ្សេងៗ ពេលខ្លះលោកបានសម្តែងជា Michael Jackson នៅលើឆាកតន្រ្តី និងធ្លាប់បញ្ចេញក្បាច់គុណ Kong FU ព្រោះលោកចូលចិត្តរក្សាវប្បធម៌បុរាណ។
២) ប្រើប្រាស់ភាសាអង់គ្លេសដើម្បីបើកផ្លូវឲ្យខ្លួនឯង÷ លោកធ្លាប់ជាក្មេងម្នាក់ដែលរៀនមិនពូកែ ត្រូវមិត្តភក្តិសើចចំអក តែទោះជាយ៉ាងណាដោយសារចិត្តស្រលាញ់ចង់ចេះភាសាអង់គ្លេសជាខ្លាំងក៏បានហាត់និយាយជាមួយជនបរទេសដែលជាភ្ញៀវទេសចរណ៍ រហូតដល់អាចប្រើប្រាស់ភាសាអង់គ្លេសបានល្អ។
៣) ធ្វើខ្លួនឲ្យរឹងម៉ាំទទួលយកចំពោះការបដិសេធ÷ ជីវិតរបស់លោកជួបឧបសគ្គជាច្រើនលើកច្រើនសារ ការបដិសេធក្នុងការចូលរៀនមហាវិទ្យាល័យ ២ដង ការបដិសេធការងារជាង ៣០ដង តែចុងក្រោយលោកបានក្លាយជាគ្រូបង្រៀនភាសាអង់គ្លេស ហើយត្រលប់ទៅធ្វើជំនួញនៅប្រទេសកំណើតនិងទទួលបានជោគជ័យយ៉ាងខ្លាំង។
៤) កុំតវ៉ាច្រើន តែត្រូវសំលឹងមើលឱកាស÷ ទោះទទួលរឿងដែលបដិសេធច្រើនដងក៏ដោយកុំគិតថាវាអយុត្តិធម៌ តែត្រូវសំលឹងទៅរកមើលឱកាសពីការបដិសេធទាំងអស់នោះ។ ពេល KFC ចូលទីផ្សារចិនដំបូង មានអ្នកដាក់ពាក្យបំរើការងារចំនួន ២៤នាក់ ហើយមនុស្ស ២៣នាក់ត្រូវបានគេជ្រើសរើស។ ម្នាក់ក្នុងចំនោម ២៤ ដែលធ្លាក់នោះគឺ Jack Ma។ តែបច្ចុប្បន្នលោកបានចំណាយប្រាក់ប្រមាណ ១,៥០០លានបាតក្នុងការវិនិយោគលើ KFC នេះ។
៥) ធ្វើឲ្យមានឈ្មោះល្អ÷ Jack Ma បានប្រាប់ឲ្យដឹងថាការដាក់អាជីវកម្មត្រូវប្រើឈ្មោះណាល្អ ងាយគេស្គាល់ហើយចាំ ដើម្បីទទួលប្រជាប្រិយភាពក្នុងការលក់ទំនិញឬសេវាកម្មរបស់យើង។
៦) ផ្តល់ភាពសំខាន់ដល់វប្បធម៌ក្នុងស្រុក÷ ជំនួសឲ្យ ebay.com Jack Ma បានប្រើ Taobao.com ជាគេហទំព័រសម្រាប់ Online Shopping។
៧) មនុស្សស្រីជាភេទមួយមិនគួរមើលរំលង÷ Alibaba បានកំណត់យក ថ្ងៃ ១១ ខែ ១១ (វិច្ឆិកា) ជាពេល Discount ដែលជាឱកាសល្អសម្រាប់មនុស្សស្រី ដោយសារប្រទេសចិនផ្តល់សិទ្ធិឲ្យបុរសច្រើនជាងស្រ្តីម្ល៉ោះហើយនៅក្នុងក្រុមហ៊ុន Alibaba លើកកំពស់ស្រ្តីដោយក្នុងក្រុមហ៊ុនមានបុគ្គលិកភេទស្រីច្រើនជាងប្រុស។
៨) កុំភ្លេចតបស្នងសងគុណសង្គម÷ ការគាំពារសង្គមលោកមិនដែលមើលរំលងឡើយ លោកតែងគិតគូរដល់មូលនិធិ Alibaba ដែលយកប្រាក់ទាំងអស់នោះផ្គត់ផ្គង់ការសិក្សារបស់កុមារខ្វះខាត និងអ្នកជួបការលំបាកនានាតាមជនបទ។
៩) លាឈប់ពីតំណែងពេលវេលាសមរម្យមកដល់÷ Jack Ma បានរៀបរាប់ថា ការងារឬកាតព្វកិច្ចនានាត្រូវធ្វើវាទៅតាមវ័យដូចជា÷ - វ័យ ២០ ទៅ ៣០ឆ្នាំ ជាវ័យស្វែងរកការងារសម្រាប់ខ្លួនឯង ស្វែងរកបទពិសោធន៍ជីវិត រៀនអ្វីថ្មីៗ ព្រោះទាំងរាងកាយ គំនិតបញ្ញានៅរឹងម៉ាំ ហើយវាជាឱកាសល្អបំផុតដើម្បីកសាងខ្លួន។ - វ័យ ៣០ ទៅ ៤០ឆ្នាំ ជាវ័យល្អដើម្បីចាប់ផ្តើមកិច្ចការងារ ឬធុរកិច្ចផ្ទាល់ខ្លួន - វ័យ ៤០ ទៅ ៥០ឆ្នាំ ចាប់ចូលដល់វ័យគ្រោះថ្នាក់ហើយ ព្រោះវ័យនេះជំងឺចាប់ផ្តើមវាយលុកសុខភាព - វ័យ ៥០ ទៅ ៦០ឆ្នាំ ជាវ័យមួយត្រូវសម្រាកខ្លះដោយសារយើងអាចនឹងមានចៅហើយ សម្រាកពីការងារហើយមើលថែទាំចៅខ្លះក៏ល្អ - ចាប់ពីវ័យ ៦០ឆ្នាំឡើងទៅ ជាពេលមួយត្រូវគិតគូរពីលោកខាងមុខ ធ្វើដំណើរកំសាន្តជាមួយកូនៗនិងចៅ ប្រើពេលក្នុងជីវិតឲ្យមានក្តៅសុខនិងកក់ក្តៅក្នុងគ្រួសារឲ្យបានច្រើន៕
ដោយ៖ ទីន ម៉ាទីយ៉ា
ប្រភព៖ Abdulthaitube - อับดุลย์เอ๊ย ถามไรตอบได้
