ហេតុផល ៣យ៉ាងដែលអ្នកមិនគួរបំភ្លេចកំណើតរបស់ខ្លួន ពេលដែលជោគជ័យហើយ
មានទស្សនៈមួយបង្ហាញថា «អតីតកាលគឺវាពិតជាឈឺចាប់ណាស់ តែអ្នកក៏អាចរៀនពីវាបានដែរ»។ កាលណាបើអ្នកបានជោគជ័យហើយនោះ តែអ្នកបែរជាចង់ធ្វើដូចជាមិនចងចាំឬក៏បំភ្លេចពីទីកន្លែងកំណើតរបស់ខ្លួន ឬអ្នកនៅជាមួយអ្នកពីមុនមក វាគឺជារឿងមួយដ៏អាម៉ាស់ខ្លាំងណាស់សម្រាប់មនុស្សជាតិគ្រប់គ្នា។ ម៉្លោះហើយ អ្នកត្រូវតែដឹងពីហេតុផល ៣យ៉ាងខាងក្រោមនេះ ដើម្បីកុំឲ្យភ្លេចកំណើត នៅពេលដែលខ្លួនឯងជោគជ័យនោះ៖
១) វាគឺជាផ្នែកមួយរបស់អ្នក
អ្នកគឺជាមនុស្សបង្កើតសកម្មភាពគ្រប់យ៉ាងរបស់ជីវិតតាំងពីកើតរហូតមកដល់សព្វថ្ងៃ។ រឿងអតីតកាលប្រហែលជាមិនអាចវិនិច្ឆ័យថាអ្នកជានរណានោះទេ តែវាជាផ្នែកមួយនាំឲ្យអ្នកមកមានថ្ងៃនេះ។ ដើមកំណើតរបស់អ្នកគឺជាកញ្ចក់មួយដែលឆ្លុះបញ្ចាំងថា តើមកដល់ពេលនេះអ្នកខ្លាំងកម្រិតណាហើយបើធៀបទៅនឹងអតីតកាលនោះ។
២) វាបង្រៀនអ្នកថាកន្លែងណាដែលអ្នកមិនគួរទៅទៀត
តើអ្នកមានចាំឬអត់ ថាតើអ្នកជាមនុស្សបែបណា នៅ២ឆ្នាំមុននោះ? តើអ្នកជាមនុស្សខ្ជិលប៉ុណ្ណា, ជាមនុស្សកំសាកយ៉ាងណា, ជាមនុស្សខ្លាចគេប៉ុណ្ណា, ជាមនុស្សឆាប់ខឹងកម្រិតណា? ដូចនេះអ្នក នឹងអាចវាស់ស្ទង់ដឹងជាមិនខាន ថាពេលនេះអ្នកកែច្រើនម្ដេចខ្លះហើយ។ មកដល់ពេលនេះ អ្នកនឹងលែងជាមនុស្សដូចកាលពីពេល ២ឆ្នាំមុនទៀតហើយ ដោយសារអ្នកបានយកអតីតកាលមកដុសខាត់ខ្លួនឯងឲ្យល្អវិញបាត់ទៅហើយ។
៣) វាបង្រៀនអ្នកឲ្យក្លាយជាមនុស្សដាក់ខ្លួនរហូត
ហេតុអ្វីកាលដែលមិនភ្លេចពីប្រភពកំណើតរបស់ខ្លួន អាចឲ្យអ្នកក្លាយជាមនុស្សដាក់ខ្លួនចំពោះគេឯងបាន? តាមពិតទៅ អាចថាកាលពីអតីតកាលអ្នកជាមនុស្សដែលគ្មានអីសោះនឹងខ្លួន ពោលគឺគ្មានប្រាក់ចាយវាយបានគ្រប់គ្រាន់ដូចបច្ចុប្បន្ននេះទេ។ បើពេលនេះអ្នកស្រមៃទៅអតីតកាល អ្នកនឹងយល់ថាតើអារម្មណ៍ជាមនុស្សក្រីក្រគឺពិបាកប៉ុណ្ណាយ៉ាងណាហើយ។ ទោះបីពេលនេះអ្នកជាអ្នកមានស្ដុកស្ដម្ភយ៉ាងណាក្ដី។ តែអតីតកាលនឹងបង្រៀនអ្នកឲ្យចងចាំថា ពេលនោះអ្នកលំបាកប៉ុណ្ណា។ ហើយអ្នកនឹងតែងតែក្រើនរំលឹកខ្លួនឯង កុំឲ្យធ្វើបាបមនុស្សក្រីក្រ ដោយសារតែអ្នកក៏ធ្លាប់ឆ្លងកាត់ភាពក្រីក្រនេះដែរ៕
ប្រែសម្រួល ៖ ព្រំ សុវណ្ណកណ្ណិកា
ប្រភព៖ linkedin
