ក្រុមហ៊ុន​បញ្ជា​ទិញ​ផលិតផល​សម្លៀក​បំពាក់​និង​ស្បែកជើង​ដ៏​ធំ​ពី​កម្ពុជា​កំពុង​ស្វែង​រក​ឱកាស​ពង្រីក​ទីផ្សារ​បន្ថែម​​



លោក​ គ្រីស ហ៊ែលហ្សឺ (Chris Helzer) តំណាង​និង​ជា​អនុប្រធាន​ក្រុមហ៊ុន​​ NIKE​ទទួល​បន្ទុក​ពាណិជ្ជកម្ម​សាកល​ និង​កិច្ចការ​រដ្ឋាភិបាល​បាន​បង្ហាញ​ពី​មោទនភាព​ ដែល​ក្រុមហ៊ុន​អាច​បង្កើត​ការងារ​ជូន​ប្រជាជន​កម្ពុជា​បាន​ចំនួន​ ៤៥,០០០​នាក់ តាម​រយៈ​ការ​បញ្ជា​ទិញ​សម្លៀក​បំពាក់​និង​ស្បែកជើង​ពី​រោងចក្រ​ជា​ដៃ​គូ​ចំនួន​៧។ ហើយ​បច្ចុប្បន្ន​ក្រុមហ៊ុន​កំពង់​ស្វែង​រក​ឱកាស​ពង្រីក​នៅ​កម្ពុជា​បន្ថែម​ទៀត​ ដើម្បី​នាំ​ភាព​ជោគជ័យ​ជូន​ប្រជាជន​កម្ពុជា។  នៅ​ក្នុង​ជំនួប​ពិភាក្សា ឯកឧត្តមរដ្ឋមន្ត្រី ប៉ាន សូរស័ក្តិ បាន​ឆ្លើយ​តប​និង​សម្តែង​ការ​ស្វាគមន៍ និង​ថ្លែង​អំណរគុណ​ក្រុមហ៊ុន NIKE ដែល​បាន​ធ្វើ​ការវិនិយោគ​នៅ​ក្នុង​ប្រទេស​កម្ពុជា។ ឯកឧត្តម បាន​ជម្រាប​លោក គ្រីស ហ៊ែលហ្សឺ អំពី​កិច្ច​ប្រឹងប្រែង​របស់​ក្រសួងពាណិជ្ជកម្ម ក្នុង​ការ​ចូលរួម​អនុវត្តកម្មវិធី​កំណែ​ទម្រង់​របស់​រាជរដ្ឋាភិបាល, ការចរចា​ធ្វើ​ពិធីកម្មទីផ្សារ, ការ​ចូលរួម​បង្កើត​ប្លុក​ពាណិជ្ជកម្ម​សេរី និង​ការ​ចុះកិច្ចព្រមព្រៀង​ជា​មួយ​បណ្តា​ប្រទេស​ដៃ​គូអាស៊ាន។  ឯក​ឧត្តម​រដ្ឋមន្ត្រី ក៏​បាន​ជម្រាប​តំណាង​ក្រុមហ៊ុន NIKE អំពី​ចក្ខុវិស័យ​របស់​រាជរដ្ឋាភិបាល ​ក្នុង​ការ​បន្ត​លើកស្ទួយ​ឧត្តមភាព​ប្រកួត​ប្រជែង​របស់​កម្ពុជា ដូច​ជា​ការ​កសាង​ហេដ្ឋារចនាសម្ព័ន្ធរូបវន្ត, ការ​កាត់​បន្ថយ​ការិយាធិបតេយ្យ, ការ​ជំរុញ​តភ្ជាប់​ផ្នែក​ដឹក​ជញ្ជូន ថាមពល និង​ឌីជីថល, ការ​កាត់​បន្ថយ​តម្លៃ​អគ្គិសនី និង​ការ​បណ្តុះបណ្តាល​ធនធាន​មនុស្ស ដើម្បី​ឆ្លើយ​តប​គម្រោង​វិនិយោគ​ធំៗ ជាដើម៕ ប្រភព៖ ក្រសួង​ពាណិជ្ជកម្ម ដោយ៖ ជួប ស្រីរ័ត្ន

X
5s