ហេតុអ្វីការអប់រំក្រៅសាលា មានតម្លៃជាងអ្វីដែលត្រឹមតែអង្គុយរៀនក្នុងថ្នាក់?
មនុស្សភាគច្រើននៅតែយល់ថា សាលារៀនគឺជាកន្លែងល្អបំផុត និងជាពេលវេលាដ៏មានតម្លៃសម្រាប់ផ្តល់ចំណេះដឹងឲ្យខ្លួន។ សិស្សនិស្សិតយល់ថា សាលារៀនគឺជាកន្លែងដែលអាចផ្តល់ចំណេះដឹងបានត្រឹមត្រូវ ហើយទីបំផុតពួកគេនឹងយកចំណេះដឹងទាំងនោះទៅអនុវត្តនៅលើទីផ្សារការងារស្របតាមបំណងរបស់ខ្លួន។ ប៉ុន្តែពួកគេបានភ្លេចគិតទៅហើយថា ការអប់រំនៅក្រៅសាលា គឺមានសារសំខាន់ជាងក្នុងសាលាឆ្ងាយណាស់។
នៅខាងក្រោមនេះអ្នកនឹងបានស្វែងយល់ពីមូលហេតុសំខាន់ដែលបញ្ជាក់ថា ហេតុអ្វីបានជាការអប់រំក្រៅសាលា គឺមានតម្លៃលើសពីសាលារៀន?
ការអប់រំគ្មានដែនកំណត់ទេ
ខណៈដែលសាលាត្រូវបានគេទទួលស្គាល់ថា ជាកន្លែងតែមួយគត់ដែលជាថ្នាក់បណ្តុះបណ្តាលធនធានមនុស្សចាប់តាំងពីវ័យកុមារភាពរហូតដល់មហាវិទ្យាល័យ ការអប់រំវិញគឺគ្មានដែនកំណត់នោះឡើយ។ ឆ្លងកាត់តាមបទពិសោធន៍របស់អ្នកកន្លងមក អ្នកអាចចាត់ទុកថា ការអប់រំគឺគ្រាន់តែជាដំណើរការនៃការរៀនសូត្រ ឬទទួលចំណេះដឹង ជំនាញ តម្លៃ ជំនឿ និងទម្លាប់របស់អ្នកប៉ុណ្ណោះ។
អ្នកប្រហែលជាយល់ថា ការអប់រំជាញឹកញាប់កើតឡើងនៅក្រោមការណែនាំរបស់អ្នកអប់រំដែលគេហៅថា គ្រូ សាស្ត្រាចារ្យ អ្នកគ្រួបណ្តុះបណ្តាលប៉ុណ្ណោះ។ ប៉ុន្តែវាមានរឿងវែងឆ្ងាយជាងនេះទៅទៀត ពីព្រោះថា ការអប់រំក៏រាប់បញ្ចូលទាំងរបៀបដែលអ្នកអប់រំខ្លួនឯងផងដែរ។ សាលារៀនគឺគ្រាន់តែជាកន្លែងជាក់លាក់មួយ ប៉ុន្តែការអប់រំអាចប្រព្រឹត្តទៅគ្រប់ទីកន្លែង គ្រប់ពេលវេលា និងជាមួយមនុស្សគ្រប់គ្នា ហើយរាប់បញ្ចូលទាំងខ្លួនអ្នកផង។
ការអប់រំអាចត្រូវបានកំណត់នៅក្នុងលក្ខខណ្ឌផ្សេងៗ។ បទពិសោធន៍ណាមួយ ដែលមានឥទ្ធិពលលើការគិត អារម្មណ៍ ឬសកម្មភាពរបស់អ្នកក៏ត្រូវបានចាត់ទុកថា ជាការអប់រំដែរ។
ការអប់រំគឺជាទម្រង់រៀនសូត្រមិនចេះចប់មិនចេះហើយ
តើអ្នកមិនធ្លាប់ឃើញទេថា មានបុគ្គលល្បីៗ និងជោគជ័យច្រើនណាស់នៅលើពិភពលោកនេះដែលបានបោះបង់សាលាចោល។ ប៉ុន្តែកុំយល់ច្រឡំលើចំណុចនេះ។ ថ្វីត្បិតតែពួកគេបោះបង់សាលាចោលមែន ប៉ុន្តែបុគ្គលទាំងនេះមិនបោះបង់ការរៀនសូត្រតាមរយៈការសិក្សាស្រាវជ្រាវ និងបទពិសោធន៍ជីវិតនៅសង្គមខាងក្រៅរបស់ពួកគេរៀងៗខ្លួននោះឡើយ។
ការពិត គេត្រូវនិយាយថា ការអប់រំមានលើសពីអ្វីដែលសាលារៀនមាន
នៅក្នុងថ្នាក់រៀន អ្នករៀនតែទ្រឹស្ដីតែប៉ុណ្ណោះ។ ក៏ប៉ុន្តែ អ្នកមិនមានឱកាសគ្រប់គ្រាន់ដើម្បីយកចំណេះដឹងរបស់អ្នកទៅអនុវត្តនោះឡើយ។ នៅទីបំផុតតើអ្នកបានសមិទ្ធផលអ្វី? កុំប្រាប់ថា សញ្ញាប័ត្រ ៤ ឆ្នាំ ៦ ឆ្នាំ ១០ នោះអី។
តាមការពិត ការអប់រំមិនមែនស្ថិតនៅលើក្រដាសសញ្ញាប័ត្រមួយសន្លឹកនោះឡើយ។ ការអប់រំគឺជារបៀបរៀនសូត្រមួយដែលអ្នកត្រូវធ្វើជាប្រចាំលើមេរៀនជីវិតដ៏ច្រើន និងសាំញ៉ាំដូចជា ការកសាងផែនការគ្រួសារ ការងារ ទំនាក់ទំនង មុខជំនួញ និងការអភិវឌ្ឍសមត្ថភាពខ្លួនឯងជាដើម។ ដូច្នេះបញ្ហានៅត្រង់ថា បើអ្នកជោគជ័យក្នុងសាលា មិនប្រាកដថា អ្នកជោគជ័យក្នុងជីវិតឡើយ។ ប៉ុន្តែការអប់រំបង្រៀនអ្នកពីរបៀបជោគជ័យនៅក្នុងជីវិត ពោលគឺមិនមែនត្រឹមតែសាលារៀននោះឡើយ។
ធ្វើម៉េចទើបបង្កើនការអប់រំនៅក្រៅសាលាបានកាន់តែច្រើន?
១.កុំកំណត់ការរៀនសូត្រត្រឹមតែនៅសាលារៀនមួយមុខ
ប្រសិនបើអ្នកចង់ឲ្យសមត្ថភាព ឬ ចំណេះដឹងរបស់អ្នកមានការអភិវឌ្ឍ សូមកុំពឹងអង្គុយរៀនក្នុងថ្នាក់រៀនតែមួយមុខ ឬជ្រើសរើសសាលាល្បីៗ ហើយគិតថា គ្រប់គ្រាន់នោះ។ ផ្ទុយទៅវិញ អ្នកត្រូវរកវិធីរៀនសូត្រ និងអនុវត្តចំណេះដឹងដែលមានគុណប្រយោជន៍នៅក្នុងជីវិតរបស់អ្នក។ នេះអាចរួមចំណែកយ៉ាងសកម្មនូវអ្វីដែលអ្នក ចង់បានហើយទទួលបានជោគជ័យបំផុត។ ការអានសៀវភៅ ទស្សនាវីដេអូអប់រំ វគ្គសិក្សាខ្លីៗ សិក្ខាសាលា ឬបទពិសោធន៍ជីវិត គឺសុទ្ធតែជាមេរៀនល្អៗដែលអ្នកគួររៀនបន្ថែម។
២.កុំអានតែអ្វីដែលអ្នកចាប់អារម្មណ៍
ប្រសិនបើអ្នកអានតែសៀវភៅ ឯកសារ ព័ត៌មាន ឬចំណេះដឹងផ្សេងៗដែលអ្នកចាប់អារម្មណ៍ អ្នកមិនអាចមើលឃើញពីឱកាស និងសក្ដានុពលនៅផ្នែកផ្សេងទៀតនោះឡើយ។ អ្នកគួរឆ្លៀតអានចំណេះដឹងដទៃទៀតបន្ថែមលើអ្វីដែលអ្នកមានស្រាប់។ ឧទាហរណ៍ថា អ្នកជាអ្នកនិពន្ធបទចម្រៀង ដូចនេះអ្នកអាចរៀនលេងឧបករណ៍ភ្លេង ដើម្បីគួបផ្សំលើចំណេះដឹងរបស់អ្នក ធ្វើឲ្យជីវិតរបស់អ្នកមើលទៅពោរពេញទៅដោយភាពរស់រវើក។
៣.ទំនាក់ទំនងជាមួយបុគ្គលដែលឆ្លាតជាងអ្នក
តើអ្នកមានចាប់អារម្មណ៍ទេថា មនុស្សជោគជ័យចូលចិត្តរាប់អានមនុស្សប្រភេទណា? សូមចាំ! នេះមិនមែនជារឿងចៃដន្យនោះទេ។ អ្នកជោគជ័យ នឹងរត់ទៅរកអ្នកជោគជ័យដូចគ្នា។ អ្នកមាននឹងចូលចិត្តរាប់អានអ្នកមានដូចគ្នា ហើយមនុស្សដែលធ្វើកិច្ចការធំៗ និងរត់រកអ្នកធ្វើកិច្ចការធំៗ ដូចគ្នា។ ហេតុអ្វី? ពីព្រោះមនុស្សដែលឆ្លាតវៃ ឬ ជោគជ័យនោះហើយដែលធ្វើឲ្យពួកគេកាន់តែជោគជ័យ។ អ្នកក៏អាចចាប់ផ្តើមបានដូចគ្នា ដោយចាប់ផ្តើមធ្វើការប្រាស្រ័យទំនាក់ទំនងជាមួយអ្នកណាម្នាក់ដែលឆ្លាតជាងអ្នក ហើយបង្កើនមិត្តភាពជាមួយបុគ្គលប្រភេទនេះឲ្យកាន់តែ ច្រើនឡើងៗ។
៤.ការអប់រំមិនមែនត្រឹមតែការរៀនសូត្រ និងប្រើប្រាស់ប៉ុណ្ណោះទេ
ទ្រឹស្ដី ចំណេះដឹង និងខ្លឹមសារមេរៀនដែលអ្នកបានរៀននៅក្នុងថ្នាក់រៀន ហើយយកទៅប្រើប្រាស់នោះ វាមិនទាន់គ្រប់គ្រាន់នៅឡើយទេថា ជាការអប់រំពិតប្រាកដ។ តាមពិតទៅ និយមន័យពេញលេញមួយមាត់នៃការអប់រំ វាកឺជាទម្រង់មួយដែលអ្នករៀនសូត្រក្រេបជញ្ជក់ចំណេះដឹង ហើយយកវាទៅប្រើប្រាស់ និងចេះចែករលែកដល់អ្នកដទៃឲ្យបានកាន់តែច្រើន។ បើទោះបីជាអ្នកគិតថា ជំនាញរបស់អ្នកនៅមានកម្រិត ក៏នៅមានមនុស្សផ្សេងទៀតដែលមានកម្រិតជំនាញទាបជាងអ្នក នៅចាំរៀនសូត្រពីអ្នកផងដែរ។ មធ្យោបាយដ៏ល្អនៅទីនេះ គឺអ្នកត្រូវស្វែងរកឱកាសចែករំលែកជំនាញ និងចំណេះដឹងរបស់អ្នកឲ្យបានកាន់តែច្រើនតាមដែលអាចធ្វើបានទៅឲ្យអ្នកដទៃ៕
ប្រភព៖ Lifehack
