អស្ចារ្យណាស់! យុវជនខ្មែរមួយរូបបានបង្ហាញខ្លួនលើគម្របទស្សនាវដ្ដីដ៏ល្បីហ្វប អាស៊ី
លោក រីឆាត យឹម គឺជាកូនខ្មែរមួយរូបដែលបានបង្ហាញវត្តមាននៅលើគម្របទស្សនាវដ្ដីដ៏ល្បី ហ្វប អាស៊ី (Forbes Asia) បន្ទាប់ពីការប្រកួតប្រជែងក្នុងកម្មវិធី ៣០ក្រោម៣០ (30 under 30 Asia) ក្នុងចំណោមសហគ្រិនដែលនៅជុំចុងក្រោយប្រមាណ ៣០០នាក់មកពី២៣ប្រទេសជុំវិញតំបន់អាស៊ីប៉ាស៊ីហ្វិក នេះបើតាមសេក្ដីប្រកាសប្រចាំឆ្នាំលើកទី៤របស់ទស្សនាវដ្ដីហ្វប(Forbes) កាលពីថ្ងៃទី០២ ខែមេសា ឆ្នាំ២០១៩ កន្លងទៅ។
លោក រីឆាត យឹម សហស្ថាបនិកនិងជានាយកប្រតិបត្តិក្រុមហ៊ុន Demine Robotics ជាក្រុមហ៊ុនផលិតមនុស្សយន្តឈ្មោះថា ជីវិត(Jevit) ដែលជាមនុស្សយន្តដំបូងគេបំផុតរបស់ពិភពលោក ដែលអាចជីកយកមីនបានដោយសុវត្ថិភាព។ បន្ទាប់ពីបានជាប់ឈ្មោះជា សហគ្រិនកិត្តិយសផ្នែកសង្គម នាយកប្រតិបត្តិឆ្នើមរូបនេះបានបង្ហាញខ្លួននៅលើគម្របទស្សនាវដ្ដី ហ្វប អាស៊ី (Forbes Asia) ប្រចាំខែមេសា ក្នុងឆ្នាំ២០១៩នេះ។
មិនត្រឹមតែបានបង្ហាញវត្តមាននៅលើគ្របទស្សនាវដ្ដី ហ្វប អាស៊ី (Forbes Asia) សហគ្រិនឆ្នើមវ័យ២៥ឆ្នាំរូបនេះក៏បានជាប់ឈ្មោះក្នុងបញ្ជី ៣០ក្រោម៣០ របស់ហ្វប(Forbes) ប្រចាំឆ្នាំ២០១៩នេះផងដែរ។
ក្នុងកិច្ចសម្ភាសន៍ជាមួយទស្សនាវដ្ដី ហ្វប អាស៊ី (Forbes Asia) លោក រីឆាត យឹម បានលើកឡើងថាខណៈពេលដែលក្រុមហ៊ុនកំពុងផ្ដោតទៅលើគ្រាប់មីនដែលនៅក្រោមដីរបស់ប្រទេសកម្ពុជា ដែលមានច្រើនជាង៦៤០០០គ្រាប់ដែលបានកត់ត្រាទុកតាំងពីឆ្នាំ១៩៧៩ លោកសង្ឃឹមថានឹងអាចដាក់ មនុស្សយន្តជីវិត ទៅកាន់តំបន់កំពុងមានជម្លោះ ដូចជា អាហ្គានីស្ថាន កូឡុំប៊ី និងអារ៉ាក់ជាដើម៕
