មហាសេដ្ឋី Richard Branson៖ កុំឲ្យតម្លៃភាពជោគជ័យតាមរយៈទឹកលុយ
ជារឿយៗការយល់ថា ការរកលុយបានកាន់តែច្រើន គឺជារឿងជោគជ័យ បានក្លាយជាផ្នត់គំនិតទូទៅមួយរបស់មនុស្សភាគច្រើន។ នៅពេលអ្នកណាម្នាក់ រកលុយបានកាន់តែច្រើនជាងមុន អ្នកនឹងសង្កេតឃើញថា បុគ្គលនោះចាប់ផ្តើមមានអ្នករាប់អានកាន់តែច្រើន ហើយសកម្មភាព ឬទង្វើរបស់បុគ្គលនោះហាក់មានឥទ្ធិពលទៅលើមនុស្សនៅជុំវិញខ្លួនកាន់តែខ្លាំងទៅតាមទឹកលុយផងដែរ។ រូបភាពនេះបានធ្វើឲ្យអ្នកកំណត់បានថា គឺជារឿងជោគជ័យនៅក្នុងជីវិត។
យ៉ាងណាវិញសម្រាប់មហាសេដ្ឋីអង់គ្លេសលោក Richard Branson វិញ លោកមិនបានយល់ថា មានលុយកាន់តែច្រើនគឺជារឿងជោគជ័យនោះឡើយ។ ប៉ុន្តែលោកបែរជាយល់ឃើញបែបនេះថា ភាពជោគជ័យគឺជាអ្វីដែលមនុស្សគ្រប់រូបធ្វើឲ្យជីវិតខ្លួនឯងមានសុភមង្គល រីករាយ និងផ្តោតទៅលើអ្វីដែលអ្នកអាចរួមចំណែកធ្វើឲ្យពិភពលោកទាំងមូលកាន់តែល្អប្រសើរឡើង នោះលុយនឹងរត់មករកអ្នកហើយ។
នៅក្នុងអត្ថបទមួយដែលលោកបានសរសេរនៅលើបណ្ដាញសង្គម LinkedIn ផ្ទាល់ខ្លួនរបស់លោក បានសរសេរដូច្នេះថា៖«ការយល់ច្រឡំថា មានលុយមានភាពជោគជ័យ បានក្លាយជារឿងទូទៅហើយ។ ប៉ុន្តែ វាមិនអ៊ីចឹងទេ។ ខ្ញុំមិនដែលធ្វើជំនួញដើម្បីតែលុយនោះទេ»។
លោកបានបន្តទៀតដូច្នេះថា៖«មិនចំពោះថា អ្នកចង់សម្រេចអ្វីនៅក្នុងជីវិតនោះទេ អ្នកគួរតែយល់ថា មានរឿងជាច្រើនដែលអ្នកត្រូវធ្វើ។ រកលុយបានច្រើន មិនមែនមានន័យថាជោគជ័យទេ។ ការធ្វើឲ្យខ្លួនឯងកាន់តែប្រសើរពីមួយថ្ងៃទៅមួយថ្ងៃ ធ្វើឲ្យជីវិតរីករាយមានសុភមង្គល ហើយពេញចិត្តអ្វីដែលអ្នកកំពុងធ្វើ អ្វីដែលអ្នកមាននៅពេលនេះគឺវាជាភាពជោគជ័យហើយ»៕
ប្រភព៖ Businessinsider
