តើបើកជំនួញច្រើនក្នុងពេលតែមួយគឺជារឿងល្អដែរឬទេ?
មានសំនួរជាច្រើនដែលគេចង់ចោទសួរទៅសហគ្រិនថា ហេតុអ្វីបានជាអ្នកធ្វើជំនួញច្រើនម៉្លេះ? អ្នករវល់ការងាររកស៊ីខ្លាំងណាស់ ចុះហេតុអ្វីមិនផ្ដោតលើជំនួញមួយមុខទៅ? តើអ្នកមានពេលសម្រាប់គ្រួសារខ្លះដែរឬអត់? ហេតុអ្វីបានជាអ្នកតែងតែស្វែងរកឱកាសថ្មីៗក្រៅពីជំនាញឯកទេសរបស់អ្នករហូតមក?
សូមទុកពេលបន្តិចដើម្បីឲ្យអ្នកទទួលបានចម្លើយមួយនៅពីក្រោយមូលហេតុដែលជំរុញឲ្យសហគ្រិន ឬអ្នកជំនួញមានមហិច្ឆតាធ្វើជំនួញច្រើនគ្មានដែនកំណត់។ ខាងក្រោមនេះនឹងបង្ហាញប្រាប់អ្នកឲ្យកាន់តែ ច្បាស់ថា ការធ្វើជំនួញច្រើនក្នុងពេលតែមួយគឺជារឿងល្អ ហើយគួរតែលើកទឹកចិត្ត។
១.កសាងបណ្ដាញទំនាក់ទំនង
ការមានក្រុមហ៊ុនច្រើនក្នុងដៃនៅក្នុងពេលតែមួយ ជួយឲ្យអ្នកអាចពង្រីកបណ្ដាញទំនាក់ទំនងបានកាន់តែច្រើនទៅកាន់មនុស្សជុំវិញខ្លួន ជាពិសេសដៃគូអាជីវកម្ម អតិថិជន និងបុគ្គលផ្សេងៗទៀតដែលប្រឡូកក្នុងវិស័យជំនួញជាមួយអ្នក។ ដំបូន្មាន និងអនុសាសន៍ល្អៗដែលអ្នកទទួលបានពីបណ្ដាញទំនាក់ទំនងរបស់អ្នក នឹងជួយឲ្យអ្នកហ៊ានសម្រេចចិត្តក្នុងបញ្ហាអាជីវកម្មសំខាន់ៗជាច្រើនដែលកើតមានឡើង។ បណ្ដាញទំនាក់ទំនងនេះហើយដែលធ្វើឲ្យអ្នកទទួលបានគំនិតថ្មីៗ បទពិសោធន៍ ការចែករំលែកគំនិត ដែលទាំងអស់នេះគឺជាមូលដ្ឋានគ្រឹះមួយដ៏សំខាន់សម្រាប់ភាពជោគជ័យក្នុងអាជីវកម្ម។
២.ផ្សារភ្ជាប់ខ្លួនឯងទៅនឹងពិភពលោកខាងក្រៅ
ស្របពេលដែលពិភពលោកកំពុងផ្លាស់ប្ដូរឥតឈប់ឈរ មនុស្សគ្រប់រូបត្រូវតែអភិវឌ្ឍខ្លួនជាលំដាប់ ដើរឲ្យទាន់ទៅនឹងការវិវដ្ដនៃបច្ចេកវិទ្យាថ្មីៗ ដែលត្រូវការជាចាំបាច់សម្រាប់យកមកអនុវត្តនៅក្នុងមុខជំនួញរបស់អ្នក។ បច្ចេកវិទ្យាឆ្លាតវៃសិប្បនិមិត្ត (AI) រថយន្តបើកបរដោយស្វ័យប្រវត្តិ បច្ចេកវិទ្យាទូទាត់សាច់ប្រាក់ ។ល។ ទាំងអស់នេះសុទ្ធតែជារឿងដែលអ្នកត្រូវដឹង។ បើទោះបីជាអ្នកមិនមានជំនាញនេះ តិចឬច្រើនអ្នកត្រូវតែដឹង និងរៀនសូត្រពីវា ទើបអ្នកអាចផ្សារភ្ជាប់ខ្លួនឯងទៅនឹងចរន្តសេរីភាវូបនីយកម្មនេះ។ សូមចាំថា អ្នកមិនអាចចេះត្រឹមតែមុខជំនួញរបស់អ្នកនោះទេ។ ដូច្នេះចំណេះដឹងពីការរកស៊ីច្រើនមុខនេះ នឹងធ្វើឲ្យអ្នកយល់ជ្រាបច្បាស់ពីវិស័យទាំងនោះ ហើយអាចមើលទុកបានជាមុននូវឱកាសដែលនឹងចូលមកដល់។
៣.ជួយរៀបចំផែនការត្រៀមទុកជាមុន
ការធ្វើជំនួញច្រើនមុខក្នុងពេលតែមួយ អាចផ្តល់សុវត្ថិភាពហិរញ្ញវត្ថុ និងទទួលបានជំនាញផ្សេងៗគ្នាទៅតាមមុខជំនួញនីមួយៗ។ គ្មានអ្នកណាម្នាក់ដែលនិយាយថា មានលុយប៉ុណ្ណេះគឺគ្រប់គ្រាន់សម្រាប់ខ្លួន។ មនុស្សម្នាក់ៗតែងនិយាយថា មានលុយច្រើនកាន់តែល្អ។ ជាការពិត ៩០% នៃអាជីវកម្មថ្មីថ្មោងបានដួលរលំទៅវិញ ហើយអាចចំណាយពេលច្រើនឆ្នាំស្តារអ្វីៗឡើងវិញទើបជោគជ័យបាន។ ក៏ប៉ុន្តែសូមចាំថា ការបរាជ័យនេះនឹងជួយឲ្យអ្នកចេះរៀបចំផែនការអាជីវកម្មសម្រាប់ត្រៀមខ្លួនដាក់យុទ្ធសាស្ត្រថ្មីឡើងវិញ ទន្ទឹមនឹងការទទួលបានបទពិសោធន៍យ៉ាងច្រើនសំបូរបែបពីវិស័យផ្សេងៗទាំងនោះ។
៤.រៀនពីកំហុសដែលកើតមានក្នុងអាជីវកម្ម
រាល់ពេលដែលអ្នកចាប់ផ្តើមធ្វើជំនួញថ្មី អ្នកមិនចង់មានកំហុសដដែលៗកើតមានឡើងនោះឡើយ។ ដូចនេះមានន័យថា កំហុសក្នុងមុខជំនួញ បានបង្រៀនអ្នកឲ្យរកឃើញពីវិធីថ្មីដែលអាចជៀសវាងកំហុសទាំងនោះបាន។ នៅពេលដែលអ្នកធ្លាប់ជួបកំហុសរួចហើយ អ្នកនឹងយល់បានពីតម្លៃរបស់វាដែលថា កំហុសគឺជាថ្នាំដ៏ ល្អមួយធ្វើឲ្យអ្នកទទួលបានភាពជោគជ័យនៅលើកក្រោយ។
៥.កសាងក្រុមការងារដ៏ល្អមួយ
វាគឺជាក្រុមការងារដែលកសាងមូលដ្ឋានគ្រឹះដ៏រឹងម៉ាំសម្រាប់មុខជំនួញទាំងអស់។ ពេលខ្លះអ្នកមិនអាចកសាងក្រុមការងារមួយដែលមានមហិច្ឆតា និងការប្ដេជ្ញាចិត្តខ្លាំងក្លាដូចអ្វីដែលអ្នកចង់បាន។ ប៉ុន្តែអ្នកអាចជ្រើសរើសក្រុមការងារដ៏រឹងមាំមួយមកពីមុខជំនួញផ្សេងទៀតរបស់អ្នក។ មុខជំនួញច្រើននេះនឹងធ្វើឲ្យអ្នកជួបមនុស្សថ្មីៗ មានសមត្ថភាព និងចំណេះដឹងផ្សេងៗគ្នាដែលពួកគេរួមចំណែកយ៉ាងសំខាន់ក្នុងការជួយកសាងទ្រព្យសម្បត្តិឲ្យអ្នក។
ប្រភព៖ Entrepreneur
