ចង់​ធ្វើ​ជា​អ្នកដឹកនាំ​​ដ៏​ជោគជ័យ​ម្នាក់​នៅ​ក្នុង​ស្ថាប័ន​ណា​ក៏ដោយ អ្នក​ត្រូវ​មាន​ជំនាញ​ទន់​ ១៦ នេះ!​



ពាក្យ​ថា "​អ្នកដឹកនាំ​​ឆ្នើម" មិនមែន​សុទ្ធតែ​​​​មនុស្ស​គ្រប់គ្នា​​អាច​ធ្វើ​បាន​នោះ​ឡើយ។ វា​ជា​​ការងារ​ដ៏​លំបាក​មួយ ត្បិតអី​ក្រៅ​ពី​ការ​​មាន​ចំណេះ​​ដឹង​ជំនាញ​ជ្រៅជ្រះ វា​ក៏​ទាមទារ​ឲ្យ​​បុគ្គល​នោះ​មាន​កិរិយាមារយាទ​ក្រមសីលធម៌​ខ្ពស់​ដើម្បី​ដឹកនាំ​ស្ថាប័ន​ឲ្យ​រីកចម្រើន និង​ផ្តល់​​ភាព​ជា​គំរូ​សម្រាប់​មនុស្ស​ក្រោម​បង្គាប់​គ្រប់​ជាន់​ថ្នាក់​។ 

តើ​អ្នក​បាន​ត្រៀម​ខ្លួន​ហើយ​ឬ​នៅ​ដើម្បី​ធ្វើ​ជា​អ្នកដឹកនាំ​ម្នាក់? មុន​នឹង​ឆ្លើយ​សំនួរ​នេះ​បាន អត្ថបទ​នេះ​ចង់​ឲ្យ​អ្នក​សិក្សា​ស្វែងយល់​ពី​ជំនាញ​ទន់ (Soft Skill) ចំនួន ១៦ ជាមុន​សិន​ដែល​វា​សំខាន់ និង​ចាំបាច់​ដើម្បី​ធ្វើ​ជា​អ្នកដឹកនាំ​គេ​មួយ​រូប។ 

១.ជា​អ្នក​ស្តាប់​ដ៏​ពូកែ​
សូម​ចាំ​ថា នៅ​ក្នុង​ការ​ទំនាក់ទំនង​ការងារ​​ប្រចាំ​ថ្ងៃ ការ​ទំនាក់ទំនង​ដ៏​ល្អ​បំផុត​មិន​ត្រឹមតែ​ជា​អ្នក​ដែល​មាន​ជំនាញ​ក្នុង​ការ​បញ្ចេញ​គំនិត​​មតិយោបល់​ផ្ទាល់ខ្លួន​​តែមួយ​ប៉ុណ្ណោះ​ទេ ក៏ប៉ុន្តែ​អ្នក​ក៏​ត្រូវ​​រៀបចំ​ខ្លួន​ជា​អ្នក​​ស្តាប់​​ម្នាក់​ដ៏​ពូកែ​ផង​ដែរ និង​បើក​ចិត្ត​ឲ្យ​ទូលាយ​ទទួលយក​គំនិត​យោបល់​ល្អៗ​របស់​មនុស្ស​ជុំវិញ​ខ្លួន​។

២.បង្កើត​បរិយាកាស​ទំនាក់ទំនង​ល្អ​ជាមួយ​មនុស្ស​គ្រប់គ្នា​​​​​
សមត្ថភាព​ក្នុង​​ការ​ធ្វើ​ឲ្យ​មាន​ទំនាក់ទំនង​ល្អ​ គឺ​ពិត​ជា​ចាំបាច់​ដើម្បី​បង្កើត និង​រក្សា​ទំនាក់ទំនង​ឲ្យ​បាន​យូរ​អង្វែង។ នេះ​វា​ទាមទារ​ឲ្យ​អ្នក​ដឹកនាំ​មាន​ភាព​ស្ទាត់​ជំនាញ​ក្នុង​ការ​ផ្លាស់ប្ដូរ​​មតិ​យោបល់ អាច​គ្រប់គ្រង​បុគ្គលិក​កាន់តែ​ច្រើន​ អត្តចរិត​សុភាពរាបសារ បង្ហាញ​ទំនុកចិត្ត គាំទ្រ​លើ​អំណះអំណាង​ដោយ​ផ្អែក​លើ​ការពិត ​​មាន​ភាព​ហ្មត់ចត់​ច្បាស់លាស់ និង​បង្កើត​បរិយាកាស​​ទំនាក់ទំនង​គ្រប់​រូបភាព​ប្រកបដោយ​ផលិតភាព។

៣.ប្រើប្រាស់​ភាសា​កាយវិការ​ឲ្យ​បាន​ត្រឹមត្រូវ​
អ្នក​ត្រូវ​ប្រើ​​កាយវិការ​​​ភាព​ជា​អ្នក​ដឹកនាំ​ព្រោះ​វា​សំខាន់​លើស​ពី​​ពាក្យសម្ដី​របស់​អ្នក​ទៅ​ទៀត​។ មិន​ច្រងេងច្រងាង ប្រើ​ក្រសែភ្នែក​ត្រង់ៗ​​ដោយ​ការ​គោរព​ទៅ​កាន់​មនុស្ស​ដែល​អ្នក​កំពុង​និយាយ  មិន​ត្រង់​ឈរ​ជ្រែងដៃ​ដាក់​ចូល​ក្នុង​​ហោប៉ៅ​ អង្គុយ​អន្ទាក់ខ្លា​​ក្នុង​ចំណោម​​អ្នក​មុខ​អ្នកការ​ ឈរ​ឬ​អង្គុយ​​ខ្វែង​ដៃ​ ពោល​គឺ​ត្រូវ​ប្រាកដ​ថា ភាសា​កាយវិការ​ត្រូវ​មាន​ភាព​ស៊ីចង្វាក់គ្នា​ទៅ​នឹង​ភាសា​​ដែល​អ្នក​ចង់​និយាយ។

៤.ហ៊ាន​និយាយ​ព័ត៌មាន​មិន​ល្អ​ឲ្យ​មនុស្ស​គ្រប់គ្នា​​បាន​ដឹង
អ្នកដឹកនាំ​ក៏​ជា​អ្នក​ហ៊ាន​​​ផ្តល់​​ដំណឹង​​មិន​ល្អ​ដល់​មនុស្ស​ក្រោម​បង្គាប់​ដែរ។ ទោះជា​​អ្នក​គ្រប់គ្នា​មិន​ចង់​ស្តាប់​វា ប៉ុន្តែ​ក្នុង​នាម​ជា​អ្នកដឹកនាំ​នេះ​ជា​ទង្វើ​មួយ​បង្ហាញ​ថា អ្នក​ជា​មនុស្ស​ស្មោះត្រង់ មាន​ការ​ទទួលខុសត្រូវ ហើយ​បន្ទាប់​មក​ផ្តល់​ឱកាស​ឲ្យ​មនុស្ស​ក្រោម​បង្គាប់​របស់​អ្នក​លើក​យោបល់​ពិភាក្សា បញ្ចេញ​យោបល់​ម្នាក់​បន្តិចៗ។ 

៥.រៀន​និយាយ​ពាក្យ​បដិសេធន៍​ដោយ​ឈ្លាសវៃ 
អ្នកដឹកនាំ​ម្នាក់​ត្រូវ​ហ៊ាន​និយាយ​បដិសេធន៍​នូវ​គំនិត យោបល់ ឬ​​សំណើ​ណាមួយ​​ដោយ​ភាព​​ឈ្លាសវៃ។ ការ​បដិសេធន៍​របស់​អ្នក​មិន​ត្រូវ​សម្លាប់​ចិត្ត​ពួកគេ​នោះ​ទេ ពោល​​គឺ​ត្រូវ​និយាយ​​បដិសេធន៍​ក្នុង​បរិយាកាស​ស្និទ្ធស្នាល បង្ហាញ​ពួកគេ​ថា អ្នក​យល់​ពី​អារម្មណ៍ និង​ស្ថានភាព​របស់​ពួកគេ ព្រម​ទាំង​ពន្យល់​ពួកគេ​​ឲ្យ​បាន​ច្បាស់​​នូវ​ហេតុផល​ដែល​អ្នក​បដិសេធន៍​ផង​ដែរ។ ​

៦.ជំនាញ​ចរចា
អ្នកដឹកនាំ​ត្រូវ​មាន​សមត្ថភាព​ក្នុង​ការ​ចរចា​បាន​គ្រប់​ស្ថានភាព និង​ជាមួយ​មនុស្ស​គ្រប់​ប្រភេទ រាប់​តាំង​ពី​បុគ្គលិក​ក្នុង​ស្ថាប័ន អតិថិជន និង​បុគ្គល​ផ្សេងៗ​ទៀត​ដែល​ពាក់ព័ន្ធ​ទៅ​នឹង​ទំនាក់ទំនង​ការងារ​ប្រចាំ ថ្ងៃ។ ប្រសិន​បើ​អ្នក​ជា​អ្នកដឹកនាំ អ្នក​ត្រូវ​មាន​ភាព​ប៉ិនប្រសព្វ​ក្នុង​ការ​ស្វែងរក​យុទ្ធសាស្ត្រ​សម្រាប់​ដោះស្រាយ​នៅ​ពេល​ចរចា​ដូច​ជា​ការ​ផ្តល់​ជម្រើស យល់​ច្បាស់​ពី​ស្ថានភាព និង​អារម្មណ៍​របស់​ភាគី​ម្ខាងទៀត ព្រម​ទាំង​ធានា​ថា រាល់​ការ​ចរចា​បាន​បញ្ចប់​ទៅ​ដោយ​ភាព​ផ្លែផ្កា​សម្រាប់​ភាគី​​ទាំងសងខាង។ 

៧.ទំនាក់ទំនង​ល្អ​​​ក្នុង​ស្ថាប័ន​​
ក្រៅ​ពី​ការ​ទំនាក់ទំនង​ក្រៅ​ស្ថាប័ន ការ​ផ្សារភ្ជាប់​ទំនាក់ទំនង​ជាមួយ​ថ្នាក់​ដឹកនាំ ​បុគ្គលិក និង​មិត្ត​រួម​ការងារ​ក្នុង​ស្ថាប័ន​​ គឺ​ជា​ការ​ចាំបាច់​បំផុត​មួយ​​។ វា​ជំរុញ​ឲ្យ​ក្រុម​ការងារ​ទាំង​មូល​មាន​ភាព​ស្និទ្ធស្នាល និង​ផលិតភាព​ការងារ។ ​ដើម្បី​ទទួល​បាន​លទ្ធផល​ល្អ​ក្នុង​ចំណុច​នេះ ​អ្នក​គួរ​ឧស្សាហ៍​ហៅ​ឈ្មោះ​អ្នកណា​ម្នាក់​ដែល​អ្នក​​បាន​និយាយ​ជាមួយ បង្ហាញ​ចំណាប់អារម្មណ៍​លើ​ជីវិត​ផ្ទាល់​ខ្លួន​របស់​បុគ្គលិក ឲ្យ​តម្លៃ ឬ​កោតសរសើរ​ពួកគេ  និង​រៀបចំ​ឲ្យ​មាន​ការ​ចូលរួម​ចែករំលែក​របស់​បុគ្គលិក​ម្នាក់ៗ ​ដើម្បី​បង្ហាញ​ថា ពួកគេ​ពិត​ជា​សំខាន់​សម្រាប់​ស្ថាប័ន​ទាំងមូល។ 

៨.ហ៊ាន​រិះគន់​ក្នុង​ន័យ​ស្ថាបនា និង​ការ​គោរព
នៅ​ពេល​បុគ្គលិក​ក្រោម​បង្គាប់​មាន​កំហុស​ឆ្គង​ អ្នកដឹកនាំ​ល្អ​ម្នាក់​ត្រូវ​ហ៊ាន​រិះគន់​ពី​​ចំណុច​ខ្វះខាត​របស់​ពួកគេ​ម្នាក់ៗ​​ មិន​លាក់លៀម ឬ​មើល​រំលង​កំហុស​របស់​ពួកគេ​ដោយសារតែ​ក្តី​ស្រលាញ់​នោះ​ឡើយ​ដើម្បី​ធានា​ថា ការងារ​របស់​ពួកគេ​អាច​សម្រេច​បាន​តាម​ការ​​គ្រោងទុក។ ក៏ប៉ុន្តែ​នៅ​ក្នុង​​ការ​រិះគន់​ទាំង​នោះ​ អ្នក​ត្រូវ​ប្រើ​ភាសា​មួយ​ដោយ​មាន​លក្ខណៈ​ជា​ការ​រិះគន់​ក្នុង​ន័យ​ស្ថាបនា មិន​មើលងាយ មិន​បន្ទោស​បង្អាប់​ និង​អនុញ្ញាត​ឲ្យ​ពួកគេ​ទទួលស្គាល់​កំហុស ព្រម​ទាំង​បង្ហាញ​ស្ថានភាព​ដែល​ធ្វើ​ឲ្យ​ពួកគេ​មាន​កំហុស​​កើត​ឡើង។

៩.មាន​​ដំណោះស្រាយ​លើ​អត្តចរិត​បុគ្គលិក
ក្រៅ​ពី​ការងារ​ក្នុង​ស្ថាប័ន អ្នកដឹកនាំ​ក៏​ត្រូវតែ​ដឹង​ផង​ដែរ​ពី​របៀប​ដោះស្រាយ​ជាមួយ​បុគ្គលិក​ដែល​​អាកប្បកិរិយា​​មិន​ល្អ ​ដែល​​​អាច​បង្ក​គ្រោះថ្នាក់​ដល់​ភាព​សុខដុម​នៅ​កន្លែង​ធ្វើការ។ អ្នក​មិន​ត្រូវ​រង់ចាំ​អូស​បន្លាយ​ពេលវេលា​ឲ្យ​​​​ទង្វើ​អវិជ្ជមាន​របស់​ពួកគេ​បន្ត​វត្តមាន​ទៅ​មុខ​ទៀត​ទេ។ អ្នក​ត្រូវ​បង្ហាញ​ត្រង់ៗ​​ពី​ការ​មិន​ពេញចិត្ត​របស់​អ្នក​នូវ​ទង្វើ​របស់​ពួកគេ​ ហើយ​ផ្តល់​ឱកាស​ឲ្យ​ពួកគេ​កែប្រែ​ជាមួយ​នឹង​ការ​បញ្ជាក់​​ការ​ប្ដេជ្ញាចិត្ត​ដ៏​ច្បាស់លាស់​សម្រាប់​ការ​ផ្លាស់ប្ដូរ​មួយ​​ដែល​ល្អ​ប្រសើរ​ជាង​នេះ។

​​​១០.រោះរាយ​រាក់ទាក់ ​ប៉ុន្តែ​​មិន​បង្ហាញ​រឿង​ផ្ទាល់​ខ្លួន​ច្រើន​ពេក
ភាព​រោះរាយ​រាក់ទាក់​​ស្និទ្ធស្នាល​ដល់​​មនុស្ស​គ្នា​ ជា​ពិសេស​ចំពោះ​បុគ្គលិក​ក្រោម​បង្គាប់​​ គឺ​ជា​ធាតុ​ផ្សំ​ដ៏​សំខាន់​មួយ​របស់​អ្នកដឹកនាំ​ដើម្បី​បង្ហាញ​ការ​ស្រលាញ់ ភាព​សុទិដ្ឋិនិយម និង​ក្តី​សង្ឃឹម​​ឲ្យ​ស្ថាប័ន​ទាំងមូល។ ក៏ប៉ុន្តែ ភាព​ស្និទ្ធស្នាល​រីករាយ​រាក់ទាក់​របស់​អ្នក​ក៏​ត្រូវ​ធ្វើ​ឡើង​ក្នុង​កម្រិត​មួយ​ដែល​មាន​​វិជ្ជាជីវៈ​ក្នុង​នាម​ជា​អ្នកដឹកនាំ។ អ្នក​ត្រូវ​បែងចែក​ឲ្យ​ដាច់​ពី​ភាព​ស្និទ្ធស្នាល​របស់​អ្នក​នៅ​កន្លែង​ការងារ និង​ជីវិត​ផ្ទាល់​ខ្លួន ជា​ពិសេស​មិន​ត្រូវ​បង្ហាញ​រឿង​ផ្ទាល់​ខ្លួន​របស់​អ្នក​ទៅ​កាន់​ពួកគេ​ច្រើន​ពេក​នោះ​ទេ។

១១.អ្នកដឹកនាំ​ជា​មនុស្ស​ដែល​ចេះ​ផ្លាស់ប្ដូរ
មនុស្ស​​ម្នាក់ៗ​បាន​ឆ្លើយតប​ទៅ​នឹង​ការ​ផ្លាស់ប្ដូរ​​តាម​វិធី​ផ្សេងៗ​គ្នា។ នៅ​ក្នុង​បរិបទ​ការងារ​ដែល​មាន​លក្ខណៈ​វិជ្ជាជីវៈ  ជា​ទូទៅ​​បុគ្គលិក​​​​​តែងតែ​សម្លឹង​មើល​​​របៀប​ផ្លាស់ប្ដូរ​របស់​មេដឹកនាំ​របស់​តាម​រយៈ​​​ការធានា ការណែនាំ និង​អារម្មណ៍​​ប្រកបដោយ​ភាព​កក់ក្តៅ​មួយ​។ ការ​ផ្លាស់ប្ដូរ​របស់​អ្នក​ក្នុង​នាម​ជា​អ្នកដឹកនាំ​​អាច​ជា​ការ ​ផ្តល់​ឱកាស​ដល់​បុគ្គលិក​ដើម្បី​ចែករំលែក​គំនិត​របស់​ពួកគេ ផ្ដោត​លើ​ចំណុច​វិជ្ជមាន និង​របៀប​ដែល​​ពួកគេ​ម្នាក់ៗ​អាច​ទទួល​បាន​ចម្លើយ​នូវ​ចម្ងល់​របស់​ពួកគេ។ 

១២.ហ៊ាន​ទទួលខុសត្រូវ និង​ឆ្លើយតប​ទៅ​នឹង​ការ​តវ៉ា​របស់​បុគ្គលិក​
អ្នកដឹកនាំ​​ដ៏​ពូកែ​គឺ​ជា​អ្នកដឹកនាំ​ដែល​​អាច​​រក​បាន​នូវ​​ដំណោះស្រាយ​ល្អៗ​ប្រកបដោយ​ភាព​ឈ្លាសវៃ និង​យុត្តិធម៌ ពេល​មាន​ការ​តវ៉ា​​ចេញ​ពី​បុគ្គលិក។ គំរូ​ល្អ​​គួរតែ​ត្រូវ​បាន​ធ្វើ​ឡើង​នៅ​ពេល​​មាន​ភាព​ខ្វែងគំនិត​គ្នា​ជាមួយ​បុគ្គលិក ដូច​ជា​ការ សាកសួរ​ត្រង់ៗ​ទៅ​កាន់​​អ្នក​ដែល​ចង់​តវ៉ា ដោយ​ប្រែក្លាយ​បរិយាកាស​នោះ​ទៅ​ជា​ដំណោះស្រាយ ឬ​អាច​រៀបចំ​បទបញ្ជា​ផ្ទៃក្នុង​នៅ​ក្នុង​ស្ថាប័ន​មួយ​ថា អ្នក​អាច​តវ៉ា​លើកឡើង​ពី​បញ្ហា​នេះ​បញ្ហា​នោះ​បាន​ដោយ​ភ្ជាប់​ជាមួយ​ដំណោះស្រាយ​​ដែល​​ដល់​ផ្តល់​​ផ្លែផ្កា​ដល់​ភាគី​ទាំងអស់​អម​មក​​ជាមួយ​ផង។

១៣.បង្ហាញ​កាយវិការ​ដោយ​​គោរព​ទោះ​មាន​ជម្លោះ​ក៏ដោយ
នេះ​ជា​គុណសម្បត្តិ​ពិសេស​មួយ​ទៀត​ក្នុង​នាម​ជា​អ្នកដឹកនាំ។ អ្នក​ត្រូវ​ធ្វើ​ចិត្ត​ឲ្យ​ត្រជាក់ មាន​ភាព​អត់ធ្មត់ មិន​បង្ហាញ​កាយវិការ​ខឹងសំបារ មិន​​ឆេវឆាវ ឬ​មិន​និយាយ​ពាក្យ​អសុរោះ ប៉ុន្តែ​ប្រើ​ភាសា​មួយ​ដែល​មាន​វិជ្ជាជីវៈ​ប្រកបដោយ​ក្រមសីលធម៌​ សុភាពរាបសារ បើ​ទោះ​ប្រធានបទ ជម្លោះ​នោះ​មាន​ការ​តឹង​សរសៃ​ក​​ក៏ដោយ។ អ្នក​ត្រូវ​បង្ហាញ​កាយវិការ​គោរព និង​យោគយល់​ពី​ស្ថានភាព​របស់​ភាគី​ម្ខាង​ទៀត ហើយ​ជា​ពិសេស​នោះ​មិន​ត្រូវ​រុញ​ភាគី​ម្ខាងទៀត​ដល់​ចំណុច​ទល់​នោះ​ឡើយ។

១៤.ចូលរួម​ធ្វើការ​ជា​ក្រុម​ជាមួយ​បុគ្គលិក​ក្រោមបង្គាប់​​
នៅ​ពេល​ដែល​​ការ​ផ្ទេរ​ភារកិច្ច​ការងារ​​ទៅ​ឲ្យ​បុគ្គលិក​ក្រោម​បង្គាប់​ធ្វើ​ការ​គឺ​ជា​រឿង​ធម្មតា​របស់​អ្នកដឹកនាំ វា​ក៏​ទាមទារ​ផង​ដែរ​ឲ្យ​អ្នកដឹកនាំ​ចេះ​លើកទឹកចិត្ត​បុគ្គលិក​ធ្វើ​កិច្ចការ​ប្រកបដោយ​ប្រសិទ្ធភាព។ អ្នក​ដឹកនាំ​ត្រូវ​​កំណត់​ពី​គោលដៅ​នៃ​ការងារ​​នីមួយៗ ​លទ្ធផល​ដែល​រំពឹង​ទុក និង​បញ្ហា​ប្រឈម​​ដែល​ពួកគេ​នឹង​​ជួប​ឲ្យ​បាន​ច្បាស់លាស់ ព្រមទាំង​ផ្តល់​នូវ​ការ​គាំទ្រ​ធនធាន​ផ្សេងៗ​ទៀត​សម្រាប់​ជួយ​សម្រួល​ដល់​ការងារ​ទាំង​នោះ។

១៥.យល់​ច្បាស់​​ពី​ទឹកចិត្ត​របស់​បុគ្គលិក​
នេះ​គឺ​ជា​​គុណសម្បត្តិ​ដ៏​ពិសេស​មួយ​របស់​អ្នកដឹកនាំ ត្រូវ​មាន។ ពេល​ខ្លះ​បុគ្គលិក​បាក់​ទឹកចិត្ត ​អស់​សង្ឃឹម ឬ​ស្ត្រេស​ច្រើន ទាំង​នេះ​គឺ​ត្រូវការ​អ្នកដឹកនាំ​ម្នាក់​​ដែល​​យល់​ពី​អារម្មណ៍​​របស់​ពួកគេ។ អ្នកដឹកនាំ​ដ៏​ពូកែ​ម្នាក់ ត្រូវ​យល់​ពី​តម្រូវការ​របស់​បុគ្គលិក ស្ថានភាព​ប្រឈម​របស់​ពួកគេ ពូកែ​លើកទឹកចិត្ត បង្កើត​ទំនាក់ទំនង​ជា​ប្រចាំ បើក​ចំហ​ឲ្យ​មាន​ការ​ផ្លាស់ប្ដូរ​ជា​ពិសេស​ចេះ​ផ្តល់​ឱកាស​ឲ្យ​មាន​ការ​អភិវឌ្ឍ​សមត្ថភាព និង​ជំនាញ​របស់​បុគ្គលិក​ម្នាក់ៗ។

១៦.ទទួលស្គាល់ និង​ឲ្យ​តម្លៃ​លើ​ស្នាដៃ​របស់​បុគ្គលិក
ការ​ឲ្យ​តម្លៃ ការ​កោត​សរសើរ និង​រង្វាន់​​លើកទឹកចិត្ត គឺ ជា​អ្វី​ដែល​បុគ្គលិក​ម្នាក់ៗ​ចង់​បាន​បំផុត។ ហេតុដូច្នេះ​ហើយ​ក្នុង​នាម​ជា​អ្នកដឹកនាំ​ល្អ​ម្នាក់ អ្នក​ត្រូវ​ទទួលស្គាល់ និង​ឲ្យ​តម្លៃ​លើ​ការ​ចូលរួម​ចំណែក​របស់​ពួកគេ​ចំពោះ​ស្ថាប័ន​របស់​អ្នក។ ពេល​ខ្លះ​ពាក្យ​សរសើរ​​មួយ​មាត់​​ចេញ​ពី​មាត់​របស់​អ្នក​គឺ​គ្រប់គ្រាន់​សម្រាប់​ពួកគេ​ទៅ​ហើយ។ ក៏ប៉ុន្តែ​ចំពោះ​បុគ្គលិក​ល្អ អ្នក​ត្រូវ​ផ្តល់​រង្វាន់​សម្រាប់​ការ​ខិតខំ ប្រឹងប្រែង​របស់​ពួកគេ និង​ជំរុញ​ឲ្យ​ពួកគេ​បង្កើត​ស្នាដៃ​ល្អៗ​បន្ថែម​ទៀត។ ហើយ​អ្វី​ដែល​អ្នក​មិន​ត្រូវ​ភ្លេច​គឺ​​ត្រូវ​​និយាយ​ពាក្យ​ថា " ​អរគុណ​”ចំពោះ​ពួកគេ៕

ប្រភព៖ Businessinsider ​​​

 

 

​​​