តើសហគ្រិនក្នុងសតវត្សទី ២១ បានផ្លាស់ប្ដូរដោយរបៀបណា?
អាជីវកម្មខ្នាតតូចកំពុងរីកចម្រើនយ៉ាងខ្លាំងនាសតវត្សរ៍ទី ២១នេះ ដោយសារមនុស្សជាច្រើនកំពុងជ្រើសរើសយកឱកាសអាជីវកម្មប្រភេទនេះជាជាងធ្វើការតាមបែបក្រុមហ៊ុនធំៗ ។ ក្រុមមនុស្សដែលបានកើតនៅទសវត្សទី ៩០ និងក្រោយៗបន្ទាប់មកទៀត មិនមានឆន្ទៈក្នុងការធ្វើការងារតាមទំនៀមទម្លាប់ចាស់ៗ ពោលគឺការងារពី ៩ទៅ ៥ម៉ោងជាមួយនឹងការទទួលបានផលប្រយោជន៍ដ៏អស្ចារ្យនោះទៀតឡើយ។
យុវជនដែលមានអាយុចាប់ពី ២០ទៅ ៣០ឆ្នាំ កំពុងបង្កើតឲ្យមាននិន្នាការថ្មីលើភាពជាកម្មសិទ្ធិគ្រប់គ្រងអាជីវកម្មខ្នាតតូច និងភាពជាសហគ្រិន។ មនុស្សវ័យក្មេងទាំងនេះកំពុងតែចាប់ផ្តើមបង្កើតអាជីវកម្មផ្ទាល់ខ្លួនដោយសារមូលហេតុជាច្រើនដូចជា៖
-ធ្វើឲ្យពួកគេមានសេរីភាពក្នុងការបង្កើតភាពច្នៃប្រឌិត
-ភាពបត់បែននៃម៉ោងធ្វើការ
-ការងារនៅលើទីផ្សារ គឺលែងក្លែងជារឿងអស្ចារ្យទៀតហើយនៅពេលនេះ
-ពួកគេចង់ឲ្យសង្គមមានការផ្លាស់ប្ដូរ
-ពួកគេស្រឡាញ់សេរីភាពក្នុងនាមជាអ្នកធ្វើការឲ្យខ្លួនឯង។
អ្វីដែលគួរឲ្យតក់សម្គាល់នោះគឺថា ក៏មានការកើនឡើងនៃចំនួនស្ត្រីក្នុងការចូលរួមចាប់ផ្តើមធ្វើអាជីវកម្មផងដែរ។ ស្ត្រីជាច្រើនដែលកំពុងធ្វើការផ្លាស់ប្ដូរដ៏សំខាន់នៅក្នុងជីវិតផ្ទាល់ខ្លួនរបស់ពួកគេ បានសម្រេចចិត្តចាប់ផ្តើមធ្វើអាជីវកម្មផ្ទាល់ខ្លួន។ នៅក្នុងប្រទេសកំពុងអភិវឌ្ឍន៍ជាច្រើនទៀតក៏មានការចាប់ផ្តើមយល់ដឹងអំពីសារៈសំខាន់នៃការផ្តល់ឱកាសឲ្យស្ត្រីនូវមធ្យោបាយចាំបាច់ដើម្បីអនុញ្ញាតឲ្យពួកគេចាប់ផ្តើមធ្វើអាជីវកម្មផ្ទាល់ខ្លួនសម្រាប់ជួយកែលំអស្ថានភាពហិរញ្ញវត្ថុ និងជីវភាពគ្រួសាររបស់ខ្លួនដែរ។
ភាពជឿនលឿនរបស់សង្គមជាច្រើនកំពុងធ្វើឲ្យមានភាពងាយស្រួលសម្រាប់សហគ្រិន "សតវត្សរ៍ទី ២១" នេះ ដើម្បីអាចជួយសម្រួលដល់ពួកគេចាប់ផ្តើម និងទ្រទ្រង់អាជីវកម្មផ្ទាល់ខ្លួនរបស់ពួកគេ។ នៅក្នុងបណ្តាប្រទេសមួយចំនួនរដ្ឋាភិបាលកំពុងចាប់ផ្តើមមើលឃើញសារៈសំខាន់នៃការជួយប្រជាពលរដ្ឋរបស់ខ្លួនក្នុងការចាប់ផ្តើមអាជីវកម្មដោយសារតែអាជីវកម្មខ្នាតតូច គឺជាគន្លឹះនៃការអភិវឌ្ឍសេដ្ឋកិច្ច និងនិរន្តរភាពសេដ្ឋកិច្ច។
បណ្តាប្រទេសជាច្រើនដូចជាប្រេស៊ីល និងកូឡុំប៊ី រដ្ឋាភិបាលកំពុងចាប់ផ្តើមផ្តល់ការលើកទឹកចិត្តផ្នែកហិរញ្ញវត្ថុដល់ប្រជាពលរដ្ឋរបស់ខ្លួនដែលរស់នៅជិតតំបន់ព្រៃអាម៉ាហ្សូនដើម្បីចាប់ផ្តើមអាជីវកម្មថ្មីៗក្នុងការសង្គ្រោះបរិស្ថាន ឬបញ្ឈប់សកម្មភាពកាប់ព្រៃឈើខុសច្បាប់។ នៅកម្ពុជា ឥណ្ឌា នីហ្សេរីយ៉ា រដ្ឋាភិបាលបានព្យាយាមធ្វើឲ្យប្រសើរឡើងនូវជីវភាពរស់នៅរបស់ប្រជាពលរដ្ឋតាមរយៈការអភិវឌ្ឍវិស័យការអប់រំ និងផ្តល់ឱកាសឲ្យស្ត្រីកាន់តែទូលំទូលាយក្នុងការចូលរួមប្រកួតប្រជែងទីផ្សារ ការងារ និងអាជីវកម្ម ជាពិសេសអាជីវកម្មខ្នាតតូច។
នៅបណ្តាប្រទេសមួយចំនួនទៀត រដ្ឋាភិបាលកំពុងចាប់ផ្តើមលើកទឹកចិត្តប្រជាពលរដ្ឋរបស់ខ្លួនឲ្យចាប់ផ្តើមអាជីវកម្មផ្ទាល់ខ្លួនដោយសារតែអាជីវកម្មខ្នាតតូចអាចទ្រទ្រង់ និងរក្សាកំណើនសេដ្ឋកិច្ចពិភពលោក។ ក្រុមហ៊ុនសាជីវកម្មធំៗ ជាច្រើននៅជុំវិញពិភពលោកនឹងអាចបិទទ្វាររបស់ខ្លួន ហើយបង្វែរទិសដៅទីតាំងអាជីវកម្មទៅកាន់បណ្តាប្រទេសផ្សេងៗ ឬក៏អាចកាត់បន្ថយទំហំបុគ្គលិករបស់ខ្លួន។ ប៉ុន្តែអាជីវកម្មខ្នាតតូចកម្រនឹងបង្ហាញខ្លួនទៅជាអាជីវកម្មធំៗណាស់ អាជីវកម្មខ្នាតតូចទាំងនោះធ្វើឡើងសម្រាប់ទិសដៅក្នុងស្រុក ហើយទទួលបានកាំគាំទ្រដោយអតិថិជននៅក្នុងសហគមន៍ផ្ទាល់របស់ពួកគេតែម្តង។
ក្រុមហ៊ុនសាជីវកម្មធំៗនៅជុំវិញពិភពលោក កំពុងចាប់ផ្តើមសម្លឹងឃើញពីសារៈសំខាន់នៃការធ្វើជំនួញជាមួយ អាជីវកម្មខ្នាតតូច។ ពួកគេចាប់ផ្ដើមបង្កើត "ក្រុមហ៊ុនផ្គត់ផ្គង់ចម្រុះ" ឬ នាយកដ្ឋានផ្សេងៗដែលជួយឲ្យពួកគេជ្រើសរើសអាជីវកម្មខ្នាតតូចសម្រាប់ចាប់ដៃជំនួញរកស៊ីជាមួយក្រុមហ៊ុនរបស់ខ្លួន។ ទន្ទឹមនឹងនេះ អាជីវកម្មខ្នាតតូចជាច្រើនដែលមានជំនួយពីភ្នាក់ងាររដ្ឋាភិបាល ឥឡូវអាចចូលរួមប្រកួតប្រជែងជាមួយក្រុមហ៊ុនធំៗ ដើម្បីធ្វើការជាមួយរដ្ឋាភិបាល និងវិស័យឯកជនផងដែរ។
ហេតុផលមួយទៀតដែលធ្វើឲ្យមនុស្សម្នាក់ៗងាយទទួលបានជោគជ័យក្នុងការក្លាយជាសហគ្រិន គឺដោយសារតែភាពជឿនលឿននៃបច្ចេកវិទ្យា។ នៅក្នុងមុខជំនួញរបស់អ្នក អ្នកមិនចាំបាច់ត្រូវមានទំនាក់ទំនងជាមួយអតិថិជនរបស់អ្នកដោយផ្ទាល់ដូចមុនទៀតនោះទេ។នៅពេលបច្ចុប្បន្ននេះ អ្នកអាចធ្វើជំនួញជាមួយនរណាក៏បានមកពីបណ្តាប្រទេសផ្សេងៗនៅជុំវិញពិភពលោកចេញពីបន្ទប់ស្នាក់នៅរបស់អ្នក។ នេះមានន័យថា វាមិនបានធ្វើឲ្យអ្នកចំណាយប្រាក់ច្រើនដូចមុនទៀតទេដើម្បីចាប់ផ្ដើមអាជីវកម្មនៅសតវត្សរ៍ទី២១នេះ។
ខាងក្រោមនេះនឹងបង្ហាញហេតុផលមួយចំនួនថា ភាពជឿនលឿននៃបច្ចេកវិទ្យាបានបង្កឲ្យមានភាពងាយស្រួលអ្វីខ្លះសម្រាប់អាជីវកម្មក្នុងសតវត្សទី ២១នេះ?
-ប្រព័ន្ធផ្សព្វផ្សាយបណ្ដាញសង្គម (Social Media) ធ្វើឲ្យមានភាពងាយស្រួលសម្រាប់សហគ្រិនក្នុងការជំរុញទីផ្សារ និងផ្សព្វផ្សាយផលិតផល និងសេវាកម្មរបស់ខ្លួន។
-ម្ចាស់អាជីវកម្មខ្នាតតូចអាចផ្តល់ផលិតផលរបស់ខ្លួនដល់អតិថិជនបានយ៉ាងឆាប់រហ័ស និងមានប្រសិទ្ធភាព។
នៅពេលបច្ចុប្បន្ន អ្នកអាចទទួលបានផលិតផលក្នុងរយៈពេលត្រឹមមួយថ្ងៃជំនួសឲ្យរយៈពេល១សប្តាហ៍កាលពីមុនៗ។
-អាជីវកម្មខ្លះអាចផ្តល់សេវាកម្មរបស់ខ្លួនដល់អតិថិជនរបស់ពួកគេដោយមិនចាំបាច់ណាត់ជួបអតិថិជនដោយផ្ទាល់ដូចមុនទៀតទេ។ នេះជារឿងពិតនៅក្នុងវិស័យបច្ចេកទេសដូចជា ការអភិវឌ្ឍគេហទំព័រ (Web Development) និង ព័ត៌មានវិទ្យា (IT)។
-អ្នកអាចជួបប្រជុំ ពិភាក្សាជាមួយដៃគូជំនួញសំខាន់ៗនៅក្នុងពេលតែមួយនៅទីតាំងផ្សេងៗគ្នា ដោយសារតែការភ្ជាប់តាមបណ្ដាញទូរគមនាគមន៍ និងសន្និសីទវីដេអូ (Video Conference)។
-អ្នកមិនចាំបាច់ត្រូវការការិយាល័យដើម្បីធ្វើជំនួញដូចមុនទៀតទេ ពីព្រោះអ្នកអាចធ្វើការងារពីផ្ទះរបស់អ្នកបាន។ អ្វីដែលអ្នកត្រូវការ គឺកុំព្យូទ័រយួរដៃ ទូរស័ព្ទដៃ និងម៉ាស៊ីនបោះពុម្ពចល័តតែប៉ុណ្ណោះ។
ពិភពលោកនៃ "ភាពជាសហគ្រិន" បានផ្លាស់ប្ដូរយ៉ាងខ្លាំងក្នុងរយៈពេលប៉ុន្មានទសវត្សរ៍ចុងក្រោយនេះ ហើយវាកំពុងផ្លាស់ប្ដូរក្នុងស្ថានភាពមួយដែលមានលក្ខណៈកាន់តែប្រសើរឡើងជាងមុន។ ដូច្នេះប្រសិនបើអ្នកមានបំណងចង់ចាប់ផ្តើមអាជីវកម្មផ្ទាល់ខ្លួនរបស់អ្នក ឬក្លាយជាសហគ្រិន អ្នកអាចធ្វើវាបានដោយមិនមានភាពភ័យខ្លាចច្រើនដូចមុនទៀតឡើយ៕
ប្រភព៖ linkedin
