ស្ថាបនិកFeeling Media បង្ហើប ៣ ចំណុចក្នុងការត្រៀមខ្លួនបង្កើតអាជីវកម្មថតរូប
លោក សយ ដារ៉ារ័ត្ន បច្ចុប្ប្នជាស្ថាបនិកនៃក្រុមថតរូប Feeling Media ជាមួយនឹងបទពិសោធន៍នឹងគំនិតឆ្នៃប្រឌិតក្នុងការថតរូបយ៉ាងប៉ិនប្រសព្វ ក្រុមរបស់លោកតែងទទួលបានការគាំទ្រជាហូរហែមិនថាជាការថតតាមកម្មវិធី និងបែបPre-weeding ជាដើម។ ជាការចែករំលែកសំរាប់អ្នកចង់បង្កើតជាក្រុមថតរូបឬអាជីវកម្មថតរូប លោក ដារ៉ារ័ត្ន បានលើកឡើងនូវ៣ចំណុចសំរាប់ការត្រៀមខ្លួន៖
ស្ថាបនិកវ័យក្មេងរូបនេះប្រាប់ថាចំណុចត្រៀមខ្លួនទី១គឺ យើងត្រូវទៅឲ្យគេប្រើសិន៖ យើងអាចទៅធ្វើជាជំនួយការគេ ឬទៅជួយធ្វើការឲ្យគេសិនដើម្បីរៀនពីគេ និងយកបទពិសោធន៍ពីគេ ព្រោះយើងមិនអាចរៀនចប់ភ្លាមឬចេញមកភ្លាមទៅទិញកាមេរ៉ាហើយដើរថតឲ្យគេ ឬបើកអាជីវកម្មតែម្ដងនោះទេ។
ចំណុចសំខាន់ទី២គឺ ដើរម្នាក់ឯងមិនជោគជ័យទេ៖ លោកដារ៉ារ័ត្នប្រាប់ថា បើទោះបីជាយើងធ្វើការងារក្នុងអាជីពនេះដូចគ្នាពោលគឺយើងទទួលថតរូបឲ្យភ្ញៀវដូចគ្នា ប៉ុន្តែយើងមិនប្រឆាំងនឹងគ្នានោះទេ មានន័យថាយើងត្រូវចេះសហការជាមួយនឹងក្រុមហ៊ុនMediaផ្សេងៗ ដូច្នេះនៅពេលដែលយើងខ្វះខាតអ្វីមួយ ឧទាហរណ៍ដូចជា ក្រុមការងារ ឬឧបករណ៍ផ្សេងៗ យើងអាចជួលគ្នា ឬខ្ចីគ្នាប្រើទៅវិញទៅមកបាន ព្រោះថាបើយើងដើរតែម្នាក់ឯងយើងមិនអាចគ្រប់គ្រងបានទាំងអស់នោះទេ ដូច្នេះយើងត្រូវដើរទៅមុខទាំងអស់គ្នា។
ចំណុចសំខាន់ចុងក្រោយគឺ យើងមិនត្រូវទម្លាក់តម្លៃខ្លួនឯងទេ៖ បើយើងនិយាយពីការធ្វើអាជីវកម្មប្រភេទនេះ យើងត្រូវបូកទាំងតម្លៃកាមេរ៉ាតើយើងទិញមកតម្លៃប៉ុន្មាន ហើយយើងបានចំណាយពេលវេលាក្នុងការរៀនសូត្រអស់ប៉ុន្មានមុនពេលចេញទៅថតឲ្យភ្ញៀវ ហើយតើថ្លៃកុំព្យូទ័រដែលយើងទិញមកដើម្បីកាត់រូបឲ្យគេតម្លៃប៉ុន្មាន បូកសរុបចំណុចទាំងអស់នេះហើយទើបយើងអាចចេញតម្លៃទៅ ប៉ុន្តែអ្វីដែលសំខាន់ទៀតនោះគឺ តម្លៃត្រូវសាកសមជាមួយរូបភាពដែលយើងផលិតមក៕
ដោយ៖ ជួប ស្រីរ័ត្ន
