ស្ថាបនិកវ័យក្មេងឦសានកាហ្វេប្រាប់វិធីសាស្ត្រ៣យ៉ាង ធ្វើឲ្យអតិថិជនឆាប់ស្គាល់
អាជីវកម្មដែលទើបតែចាប់ផ្ដើមថ្មីថ្មោង អាចនិយាយថាវាពិបាកបន្តិចហើយក្នុងការធ្វើឲ្យអតិថិជនស្គាល់នូវម៉ាកយីហោរបស់ខ្លួន។ ដូច្នេះតើម្ចាស់អាជីវកម្មគួរមានយុទ្ធសាស្ត្រយ៉ាងណាខ្លះដើម្បីម៉ាកយីហោរបស់ខ្លួនឆាប់ទទួលបានការគាំទ្រ? ជាការឆ្លើយតបនឹងសំណួរ សហគ្រិនស្ត្រីវ័យក្មេង កញ្ញា សុវណ្ណ ណាគ្រី ស្ថាបនិកនៃហាងកាហ្វេឦសាន បានចែករំលែកនូវវិធីសាស្ត្រផ្ទាល់ខ្លួនខាងក្រោមនេះ។
សហគ្រិនស្ត្រីស្រស់សោភារូបនេះប្រាប់ថា ពីមុនខ្មែរយើងមួយចំនួនហាក់មិនសូវជាគាំទ្រម៉ាកយីហោនៅក្នុងស្រុកប៉ុន្មាននោះទេ ហើយនេះក៏ជាមូលហេតុមួយដែលធ្វើឲ្យកញ្ញាសម្រេចចិត្តបង្កើតម៉ាកយីហោក្នុងស្រុកឡើងក្នុងគោលបំណងពង្រឹងការគាំទ្រឡើងវិញ។ បន្ទាប់ពីបង្កើតម៉ាកយីហោឡើង កាហ្វេឦសានចាប់ផ្ដើមពង្រឹងគុណភាពផលិតផល បូករួមនិងការវិចខ្ចប់។ រហូតមកដល់រយៈពេល២ឆ្នាំចុងក្រោយនេះឃើញថាអតិថិជនបានចាប់ផ្ដើមទទួលស្គាល់។
កញ្ញា ណាគ្រី បន្តថាចំណុចដែលសំខាន់មួយទៀតនោះ គឺត្រូវពង្រឹងបុគ្គលិក ធ្វើយ៉ាងណាឲ្យពួកគាត់ច្បាស់ពីផលិតផលដែលយើងលក់ និងមិនក្លែងបន្លំគុណភាពទំនិញ។ ចំពោះកាហ្វេឦសាន បុគ្គលិកត្រូវដឹងថាកាហ្វេដែលលក់នោះយកមកពីកន្លែងណាខ្លះ មានប្រភេទគ្រាប់កាហ្វេអ្វីខ្លះ ហើយតើត្រូវលក់នៅក្នុងតម្លៃប៉ុន្មាន ដូច្នេះជារួមពួកគាត់ត្រូវយល់ច្បាស់ពីចំណុចសំខាន់របស់ផលិតផល។
ចំណុចសំខាន់ចុងក្រោយកញ្ញាប្រាប់ថា ដោយសារបច្ចុប្បន្នជាសម័យកាលបច្ចេកវិទ្យាដូច្នេះ ការធ្វើទីផ្សារក៏ចាំបាច់ត្រូវពឹងផ្អែកលើប្រព័ន្ធអ៊ីនធឺណិតផ្គួបផ្សុំផងដែរ៕
ដោយ៖ ជួប ស្រីរ័ត្ន
