ម្ចាស់​ហាង​សំលៀក​បំពាក់​ CARINO៖ ៥​ចំណុច​ត្រូវ​ដឹង​​មុន​ចេញ​បើក​ហាង​សំលៀកបំពាក់​



ចាប់​ផ្ដើម​អាជីវកម្ម​ណា​មួយ មិន​មែន​ចង់​ធ្វើ​ភ្លាម​ចាប់​ផ្ដើម​ភ្លែត​នោះ​ទេ។ ជូន​កាល​យើង​ឃើញ​អ្នក​ដទៃ​ធ្វើ​បាន​ជោគជ័យ ព្រោះ​ចង់​ជោគជ័យ​ដូច​គេ​ក៏​ទៅ​ធ្វើ​តាម​គេ ប៉ុន្តែ​ក៏​មិន​ប្រាកដ​ថា​អាច​ជោគជ័យ​ដូច​គេ​នោះ​ទេ ដូច្នេះ​មុន​ធ្វើ​អ្វី​មួយ​យើង​ត្រូវ​មាន​ការ​ត្រៀម​ខ្លួន​ទុក​ជា​មុន។ ជា​មួយ​នឹង​បទពិសោធន៍​លើ​អាជីវកម្ម​សំលៀកបំពាក់​ជា​ច្រើន​ឆ្នាំ លោក​ស្រី ទឹម លក្ខណា ស្ថាបនិក​ហាង​លក់​សំលៀកបំពាក់​ខ្មែរ​យីហោ CARINO បាន​ចែក​រំលែក​នូវ​ចំណុច​សំខាន់​៥​ដែល​សហគ្រិន​គួរ​ត្រៀម​ខ្លួន​ទុក​ជា​មុន​ប្រសិន​បើ​ចង់​បើក​ហាង​សំលៀកបំពាក់​។

ចំណុច​ទី១​គឺ ទាមទារ​ឲ្យ​យើង​ត្រូវ​ស្គាល់​ច្បាស់​អំពី​ប្រព័ន្ធ​នៃ​វិស័យ​នោះ៖ លោក​ស្រី​លក្ខណា​ប្រាប់​ថា ការ​បើក​អាជីវកម្ម​ផ្នែក​កាត់ដេរ​សំលៀកបំពាក់​នេះ មិន​មែន​ទាមទារ​ឲ្យ​យើង​ត្រូវ​តែ​ចេះ​កាត់ដេរ​នោះ​ទេ​ ប៉ុន្តែ​វា​ទាមទារ​ឲ្យ​យើង​ត្រូវ​តែ​ដឹង​លើ​រឿង​ទាំង​អស់​នោះ ព្រោះ​ប្រសិន​បើ​យើង​មិន​យល់​ពី​ការងារ​ទាំង​អស់​នោះ​ទេ នៅ​ពេល​ដែល​យើង​ជួល​បុគ្គលិក​ធ្វើ​ការ យើង​នឹង​ពិបាក​គ្រប់គ្រង ព្រម​ទាំង​អាច​ប្រឈម​នឹង​ការ​គ្រប់គ្រង​ពី​បុគ្គលិក​វិញ​ទៀត​ផង។

ទី២ កំណត់​អតិថិជន​គោលដៅ​ឲ្យ​ច្បាស់លាស់៖ តើ​ផលិតផល​របស់​យើង​ចង់​លក់​ឲ្យ​អតិថិជន​ប្រភេទ​ណា? អតិថិជន​វ័យ​ប៉ុន្មាន? កុំ​ដោយសារ​តែ​ឃើញ​គេ​លក់​ផលិតផល​នោះ​ដាច់​យើង​ទៅ​លក់​ដែរ ក៏​មិន​ប្រាកដ​ថា​ដាច់​ដូច​គេ​នោះ​ទេ។ ដូច្នេះ​យើង​ត្រូវ​ស្វែង​យល់​ពី​ខ្លួនឯង និង​អតិថិជន។

ទី៣ វត្ថុធាតុដើម៖ ប្រសិន​បើ​យើង​ជា​អ្នក​ផលិត (ហាង​កាត់ដេរ​សំលៀក​បំពាក់) បើ​ដាក់​ចិត្ត​ថា​ធ្វើ​ហើយ យើង​ក្នុង​នាម​ជា​ម្ចាស់​គប្បី​ស្គាល់​ពី​វត្ថុ​ធាតុ​ដើម​នៃ​ផលិតផល​របស់​យើង។

ទី៤ ទីតាំង និង​ការ​រចនា​ម៉ូត​ហាង៖ ទីតាំង​គឺ​ជា​រឿង​ដែល​សំខាន់ យើង​ត្រូវ​រក​ទីតាំង​ណា​ដែល​សាក​សម​ជា​មួយ​ផលិតផល​របស់​យើង ហើយ​អ្វី​ដែល​ពិសេស​គឺ​ការ​រចនា​ហាង​របស់​យើង​ឲ្យ​សាក​សម​ជា​មួយ​ផលិតផល​ដើម្បី​ជា​ការ​ទាក់ទាញ​អតិថិជន។

ទី៥ ស្វែង​រក​អតិថិជន៖ ត្រូវ​ដឹង​ថា​បច្ចុប្បន្ន​យើង​គឺ​ជា​អ្នក​ដែល​ទៅ​ស្វែង​រក​អតិថិជន មិន​មែន​អតិថិជន​មក​រក​យើង​ទេ ដូច្នេះ​យើង​ត្រូវ​មាន​ការ​រៀបចំ​ទុក​ជា​មុន បើ​មិន​ដូច្នោះ​ទេ​វា​អាច​នឹង​ធ្វើ​ឲ្យ​មាន​ការ​ប៉ះពាល់​ច្រើន​ដល់​យើង៕

ដោយ៖ ជួប ស្រីរ័ត្ន

X
5s