គតិបណ្ឌិតចំនួន ៩ឃ្លា របស់កវីជនជាតិពែក្សលោក Rumi ដែលអ្នកគួរយកទៅរិះគិតពិចារណា
Rumi គឺជាបញ្ញវន្តអ៊ីស្លាម កវីនិពន្ធកំណាព្យ និងជាទេវវិទូមួយរូបរបស់ពែក្សនៅក្នុងសតវត្សទី១៣។ គាត់រស់នៅក្នុងអំឡុងឆ្នាំ១២០៧ដល់ឆ្នាំ១២៧៣។ កំណាព្យរបស់គាត់ត្រូវបានគេយកទៅបកប្រែជាច្រើនភាសានៅជុំវិញពិភពលោក រហូតធ្វើឲ្យគាត់ត្រូវបានគេលើកឡើងកិត្តិសព្ទថាជាអ្នកកំណាព្យដែលមានភាពល្បីល្បាញជាងគេបំផុត លើសពីនេះគាត់ក៏ជាអ្នកកំណាព្យមួយរូបដែលស្នាដៃរបស់គាត់បានលក់ដាច់ជាងគេនៅក្នុងសហរដ្ឋអាមេរិកផងដែរ។ ស្នាដៃរបស់គាត់ភាគច្រើនទទួលបានការគាំទ្រនៅក្នុងប្រទេសទួរគី ប្រទេសអាហ្សេបៃហ្សង់ សហរដ្ឋអាមេរិក និងអាស៊ីខាងត្បូង។ ថ្ងៃនេះយើងបានដកស្រង់នូវគតិបណ្ឌិតរបស់លោក Rumi ចំនួន៩ឃ្លា ដែលអ្នកគួរយកទៅរិះគិតពិចារណា៖
១) «ពួកយើងស្ពាយនៅខាងក្នុងខ្លួនយើងនូវភាពអស្ចារ្យដែលយើងស្វែងរកនៅពិភពខាងក្រៅ។»
២) «ជីវិតគឺជាតុល្យភាពនៃការតោងឲ្យជាប់និងការប្រលែងចោល។»
៣) «ចូរអនុញ្ញាតឲ្យភាពស្ងប់ស្ងាត់នាំអ្នកចូលទៅកាន់ស្នូលនៃជីវិត។»
៤) «ម្សិលមិញខ្ញុំវៃឆ្លាត ហេតុនេះខ្ញុំចង់ផ្លាស់ប្ដូរពិភពលោក។ ថ្ងៃនេះខ្ញុំមានបញ្ញា ហេតុនេះខ្ញុំចង់ផ្លាស់ប្ដូរខ្លួនឯង។»
៥) «ជនដែលមិនចាំតែកត់ត្រាអ្វីៗ មនុស្សដែលមិនចង់មានបានជាងនេះ ឬភ័យខ្លាចក្នុងការបាត់បង់ ជនដែលមិនមានចំណាប់អារម្មណ៍សូម្បីបន្តិចនៅក្នុងអត្តចរិតរបស់ខ្លួនឯង គាត់នេះឯងមានសេរីភាព។»
៦) «សេចក្ដីអត់ធ្មត់គឺជាកូនសោនៃសេចក្ដីរីករាយ។»
៧) «ស្វែងរកចម្លើយនៅក្នុងសំណួររបស់អ្នក។»
៨) «ចំណង់នៅក្នុងការចង់ដឹងពីវិញ្ញាណរបស់ខ្លួនឯងនឹងបញ្ចប់រាល់ចំណង់ទាំងឡាយ។»
៩) «ជនដែលមានភាពសុខស្ងប់ គឺជាមនុស្សដែលមិនខ្វាយខ្វល់ពីការដែលមានច្រើនជាងមុនឬតិចជាងមុន មិនជាប់ជំពាក់ជាមួយឈ្មោះនិងភាពល្បីល្បាញ គាត់មានសេរីភាពពីសេចក្ដីទុក្ខដែលកើតចេញពីពិភពលោក និងជាពិសេសគឺខ្លួនឯង។»
ដោយ៖ ស្រីពៅ
