មិនគួរមើលរំលងចំណុច ២នេះទេ ប្រសិនបើអ្នកចង់បង្កើតអាជីវកម្មមួយ
ក្រឡេកទៅមើលសហគ្រិន ដែលកំពុងរីកចម្រើនលើអាជីវកម្មនិងលេចធ្លោខ្លាំងក្នុងសង្គម បានធ្វើឲ្យមនុស្សមិនតិចនោះទេពុះកញ្ជ្រោលនឹងចង់ធ្វើដូចពួកគាត់។ ប៉ុន្តែ មិនមែនគ្រប់អាជីវកម្មសុទ្ធតែអាចធ្វើទៅបានទទួលជោគជ័យទាំងអស់នោះទេ ពោលគឺអ្នកត្រូវមានការត្រៀមខ្លួនឲ្យបានគ្រប់ជ្រុងជ្រោយជាមុន មុនពេលសម្រេចចិត្តចាប់ផ្ដើមធ្វើអាជីវកម្មណាមួយ។
លោក សុខ លាភ ស្ថាបនិកក្រុមហ៊ុន System Expert ជាក្រុមហ៊ុនប្រឹក្សាយោបល់និងផ្ដល់សេវាកម្មផ្នែកប្រព័ន្ធបច្ចេកវិទ្យាសម្រាប់ក្រុមហ៊ុន បានចែករំលែកថា ការត្រៀមខ្លួនដ៏ល្អបំផុតគឺ ដំបូងយើងត្រូវសិក្សាពីបញ្ហាដែលកើតឡើងនៅក្នុងសង្គមជាក់ស្ដែង និងចេះសង្កេតពីបញ្ហាទាំងនោះ ព្រោះវាអាចនឹងជាឱកាសសម្រាប់យើងក្នុងការចាប់ផ្ដើមអាជីវកម្ម។
បន្ទាប់ពីសម្លឹងមើលឱកាសតាមរយៈការសង្កេតពីបញ្ហានៅក្នុងសង្គមដែលធ្វើឲ្យយើងអាចកំណត់បានពីគោលដៅនិងមានគំនិតអាជីវកម្មរួចហើយ ចំណុចសំខាន់បន្ទាប់គឺយើងត្រូវស្វែងរកធនធានមនុស្ស។ ត្រូវស្វែងរកមនុស្សណាដែលយើងប្រាកដថា ពួកគាត់អាចធ្វើជាក្រុមការងារល្អរបស់យើង និងជួយយើងឲ្យសម្រេចគោលដៅរួមបាន ពីព្រោះថាការធ្វើម្នាក់ឯងគឺពិតជាពិបាកឲ្យយើងឆាប់សម្រេចគោលដៅណាស់។
លោកបន្ថែមថា ការជ្រើសរើសមនុស្សគឺជាចំណុចសំខាន់ណាស់ដែលត្រូវគិត ឧទាហរណ៍ថាប្រសិនអាជីវកម្មដែលយើងចាប់ផ្ដើមមិនមែនជាអាជីវកម្មបែបបច្ចេកវិទ្យានោះទេ (Technical) យើងត្រូវស្វែងរកអ្នកដែលមានជំនាញផ្នែកនេះ ដើម្បីឲ្យពួកគាត់អាចជួយជ្រោមជ្រែងយើងបាន។ ជារួម យើងត្រូវស្វែងរកមនុស្សដែលមានជំនាញសាកសម ដែលយើងគិតថាអាចជួយអាជីវកម្មរបស់យើងបាន៕
ដោយ៖ ជួប ស្រីរ័ត្ន
